ត្រាំ គំរាមដកអាមេរិកចេញពីកិច្ចព្រមព្រៀងនុយក្លេអ៊ែរជាមួយរុស្ស៊ី

2018-10-21 02:44:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីអាមេរិកលោក ដូណាល់ ត្រាំ បានបញ្ជាក់កាលពីថ្ងៃសៅរ៍ថាអាមេរិកគ្រោងនឹងដកខ្លួនចេញពីកិច្ចព្រមព្រៀងនុយក្លេអ៊ែរជាមួយរុស្ស៊ី។

ថ្លែងទៅកាន់សារព័ត៌មាន ប្រធានាធិបតីរូបនេះឲ្យដឹងថា "យើងគឺជាអ្នកនៅក្នុងកិច្ចព្រមព្រៀងនេះ និងគោរពតាមលក្ខខណ្ឌទាំងអស់ ប៉ុន្តែរស្ស៊ីមិនបានគោរពតាមនោះទេ។ ដូច្នេះយើងនឹងលុបកិច្ចព្រមព្រៀងចោល ហើយដកខ្លួនចេញតែម្ដង។” លោកបន្ដថា "រុស្ស៊ីបានបំពានកិច្ចព្រមព្រៀងអស់រយៈពេលច្រើនឆ្នាំមកហើយ។ ខ្ញុំមិនដឹងថាហេតុអ្វីប្រធានាធីបតីអូបាម៉ា មិនចរចាឬដកខ្លួនចេញ។ ដូច្នេះយើងនឹងមិនអនុញ្ញាតឲ្យពួកគេបំពានកិច្ចព្រមព្រៀងហើយផលិតអាវុធបាន ខណៈពេលដែលយើងមិនអាចផលិតបាននោះទេ។”

គួរឲ្យដឹងថា កិច្ចព្រមព្រៀងនុយក្លេអ៊ែរនេះត្រូវបានស្គាល់ឈ្មោះថា INF ដែលត្រូវបានចុះហត្ថលេខាដោយប្រធានាធិបតិ Ronald Reagan កាលពីឆ្នាំ ១៩៨៧ ជាមួយសហភាពសូវៀតស្ដីពីលុបបំបាត់នុយក្លេអ៊ែរ និងមីស៊ីលទាំងអស់ក្នុងរយៈចម្ងាយជិត (៥០០ ដល់ ១ ០០០គីឡូម៉ែត្រ) និងរយៈចម្ងាយមធ្យម (១ ០០០ ដល់ ៥ ៥០០គីឡូម៉ែត្រ) រវាងភាគីទាំងពីរ៕