ចង្វាក់ប្រយុទ្ធយ៉ាងល្អធ្វើឲ្យ Arsenal បន្តឈ្នះ៧ប្រកួតជាប់គ្នានៅ EPL

2018-10-23 01:55:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កាំភ្លើងធំ Arsenal បានបន្តឈ្នះ៧ប្រកួតជាប់ៗគ្នា បន្ទាប់ពីបង្ហាញចង្វាក់ប្រយុទ្ធយ៉ាងល្អ រួមទាំងយកឈ្នះទៅលើ Leicester City ៣-១ កាលពីយប់មិញក្នុងការប្រកួតសប្ដាហ៍ទី៩ នៃក្របខ័ណ្ឌកំពូលរបស់អង់គ្លេស English Premier League ក្នុងទឹកដីរបស់ Arsenal ។

បើគិតទៅលើការប្រកួតទាំងអស់របស់ Arsenal ពួកគេបានចាញ់ពីរប្រកួតបើកឆាកដំបូង ដោយចាញ់ក្រុមខ្លាំង Chelsea ៣-២ និងចាញ់ Man City ២-០។ តាំងពីរចាញ់នោះមកពួកគេមិនដែលស្មើឬចាញ់ឡើយពោលគឺឈ្នះរហូត ហើយបើសរុបទាំងឈ្នះយប់មិញផងនោះពួកគេបន្តឈ្នះ៧ប្រកួតជាប់ៗគ្នា។

សម្រាប់ជំនួបយប់មិញ បើកការប្រកួតក្រុមទាំងពីរវាយសម្រុកគ្នាយ៉ាងខ្លាំង រហូតដល់នាទីទី៣១ ខ្សែការពាររបស់ម្ចាស់ផ្ទះ Hector Bellerin បានព្យាយាមរារាំងបាល់មិនឲ្យដៃគូកាត់ចូលកណ្ដាល ប៉ុន្តែប៉ះជើងខ្ទាតចូលទីខ្លួនឯង។ រហូតដល់នាទីទី៤៥ ចុងវគ្គទី១ ទើបខ្សែបម្រើ Mesut Özil តាមបានស្មើ ១-១ ។ ចប់វគ្គទី១ក្រុមទាំងពីរស្មើគ្នា១-១។

ដោយមើលឃើញពីភាពចន្លោះប្រហោងនៅតំបន់ប្រយុទ្ធរបស់ខ្លួន Unai Emery ដែលជាអ្នកចាត់ការបានប្ដូរខ្សែប្រយុទ្ធឆ្នើមរបស់ខ្លួន P. Aubameyang ចូលជំនួសខ្សែការពារ S. Lichtsteiner នៅនាទីទី៦១។ ប្ដូរចូលបានតែ២នាទីប៉ុណ្ណោះ Aubameyang រកបានគ្រាប់បាល់នាំមុខ ២-១ វិញនៅនាទីទី៦៣ និង៣នាទីបន្ទាប់ខ្សែប្រយុទ្ធរូបនេះដដែលរកបានគ្រាប់បាល់ទី២ នៅនាទីទី៦៦ ពោលធ្វើឲ្យ Arsenal នាំមុខ ៣-១ គិតត្រឹមនាទីទី៦៦។ ក្រុមទាំងពីរបន្តបង្កើតឱកាសនៅមុខទីដៃគូរៀងខ្លួន ប៉ុន្តែមិនមានក្រុមណាអាចរកគ្រាប់បាល់បានទៀតឡើយ រហូតដល់ចប់ការប្រកួតក្រុមទាំងពីរបញ្ចប់ដោយលទ្ធផល ៣-១ ៕