១២ ចំណុចងាយៗ ធ្វើឱ្យរថយន្តអ្នកស៊ីប្រេងតិច

2018-10-23 03:44:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នតម្លៃប្រេងនៅតែឡើងចុះៗគ្មានថ្ងៃឋិតថេរ ដែលជាកត្តាមួយធ្វើឱ្យអ្នកប្រើប្រាស់យានជំនិះព្រួយបារម្ភ។ ពាក់ព័ន្ធនឹងបញ្ហានេះ យើងសូមលើកយក ១២ ចំណុច ធ្វើឱ្យរថយន្តស៊ីប្រេងតិច មកបង្ហាញជូនដូចខាងក្រោម៖

១. ពិនិត្យសម្ពាធខ្យល់កង់

កង់ធូរធ្វើឱ្យរថយន្តស៊ីប្រេងច្រើន ដូច្នេះចូរត្រួតពិនិត្យខ្យល់កង់រថយន្ត ឱ្យបានយ៉ាងហោចណាស់ ម្ដងក្នុងមួយខែ ព្រោះវាអាចកាត់បន្ថយអត្រាស៊ីប្រេងបាន៥%។

២. ប្រើប្រព័ន្ធគ្រប់គ្រងល្បឿន

ពេលបើកបរ បើសិនជាអាច ចូរប្រើប្រព័ន្ធគ្រប់គ្រងល្បឿន Cruise Control ឬ Speed Control ព្រោះប្រព័ន្ធនេះអាចជួយសន្សំសំចៃប្រេងបាន៦%។

៣. ពិនិត្យក្បាលអាគុយ

ចូរឧស្សាហ៍ពិនិត្យអាគុយរថយន្ត។ បើក្បាលអាគុយមានច្រែះ ត្រូវជូតសម្អាតឱ្យបានស្អាត ព្រោះវាធ្វើឱ្យម៉ាស៊ីនភ្លើងធ្វើការខ្លាំង និងស៊ីប្រេងច្រើន។

៤. កុំឈប់រថយន្តយូរពេក (ច្រើនជាង១នាទី)

ត្រង់ចំណុចនេះមានន័យថា ពេលកំពុងបើកបរហើយឈប់រថយន្តនោះ គឺមិនគួរឈប់ឱ្យច្រើនជាង១នាទីទេ ព្រោះរថយន្តនឹងស៊ីប្រេង កន្លះហ្គាឡុងទៅ១ហ្គាឡុង ( ១ហ្គាឡុងជាង៣លីត្រ ) ក្នុង១ម៉ោង តែបើរថយន្តស៊េរីទំនើបអាចស៊ីតិចជាងនេះ។ ៥. ប្ដូរតម្រងខ្យល់ឱ្យបានញឹកញាប់

បើរថយន្តបើកបរលើផ្លូវសំបូរដោយធូលីដី ម្ចាស់រថយន្តត្រូវប្ដូរតម្រងខ្យល់ឱ្យបានញឹកញាប់បន្តិច។ ៦. ឧស្សាហ៍ត្រួតពិនិត្យម៉ាស៊ីន និងគ្រឿងក្រោម

ម៉ាស៊ីនជាផ្នែកសំខាន់នៃរថយន្ត ហើយបើម៉ាស៊ីនមានបញ្ហា ត្រង់ចំណុចណាមួយ ដូចជា Sensor អុកស៊ីហ្សែន ប៊ូស៊ី និងតម្រងខ្យល់ តម្រងប្រេងទៀតសោត នឹងធ្វើឱ្យរថយន្តស៊ីប្រេងច្រើន ម្ល៉ោះហើយអ្នកបើកបរ គួរយករថយន្តទៅពិនិត្យនៅយានដ្ឋាន។ ចំណែកគ្រឿងក្រោមក៏អ៊ីចឹងដែរ ត្រូវពិនិត្យឱ្យទៀងទាត់ ក្រែងមានបញ្ហាត្រង់ផ្នែកណាមួយ។ ៧. បើករថយន្តក្នុងល្បឿននៅលេខខ្ពស់

រថយន្តមានចំនួនលេខខុសគ្នា ខ្លះមាន៥លេខ ខ្លះមាន៦លេខ ដូច្នេះលេខទី៥ និងទី៦នេះ ជាលេខខ្ពស់។ ឧទាហរណ៍ បើបើកក្នុងល្បឿនលឿន៦០គីឡូម៉ែត្រក្នុងមួយម៉ោងលើផ្លូវហាយវេ នៅត្រឹមលេខ៣ រថយន្តនឹងស៊ីប្រេង២៥% ច្រើនជាងលេខ៥ឬលេខ៦។

៨. មិនត្រូវបើករថយន្តច្រងាប់ច្រងិល

បើកលឿន ហើយបន្ថយល្បឿនលឿន រថយន្តនឹងស៊ីប្រេងច្រើន។ បើបើករថយន្តតាមលក្ខណៈធម្មតា (Drive smoothly) មិនជាន់ហ្វ្រាំង ឬហ្គែរខ្លាំងៗ នឹងកាត់បន្ថយអត្រាស៊ីប្រេងបានច្រើន។ តាមការស្រាវជ្រាវបង្ហាញថា បើកដោយប្រើតិចនិកល្អ ធ្វើឱ្យរថយន្តសន្សំប្រេងបាន៣០%។

៩. មិនត្រូវផ្ទុកទម្ងន់ធ្ងន់ពេក

ចំណុចទី៩នេះ បើមិនចង់ឱ្យរថយន្តស៊ីប្រេងច្រើន សូមកុំផ្ទុកទម្ងន់លើរថយន្តធ្ងន់ពេក។ ទម្ងន់ស្រាល រថយន្តបញ្ចេញឧស្ម័នកាបូនិក និងស៊ីប្រេងតិច។ ១០. ជ្រើសប្រេងឱ្យត្រូវរថយន្ត ចូរជ្រើសប្រេងសាំងគុណភាពល្អ ឱ្យត្រូវនឹងរថយន្តដែលកំពុងប្រើប្រាស់។

១១. កុំជាន់ហ្វ្រាំងពេកពេលបើក

អ្នកបើកបរមួយចំនួន មិនចោលទម្លាប់ជាន់ហ្វ្រាំងរថយន្ត ពេលបើកបរឡើយ។ ទម្លាប់អាក្រក់នេះ ធ្វើឱ្យម៉ាស៊ីនរត់តឹង ឆាប់ធ្លាក់ និងស៊ីប្រេងច្រើន។ ១២. ជៀសវាងបើកលើផ្លូវពិបាក

ដើម្បីឱ្យរថយន្តសន្សំសំចៃប្រេងបាន៣០% អ្នកបើកបរមិនគួរបើកលើផ្លូវមានក្រួស ភក់ ឬផ្លូវពិបាកផ្សេងៗទៀត៕

ប្រភព៖ Theglobeandmail ប្រែសម្រួល៖ អ៊ុំ សុភក្តិ