ជួយទិញអាវយឺតកូនខ្មែរនៅពិព័រណ៍ ITET យកថវិកាទៅអភិវឌ្ឍកម្មវិធីក្តារចុចលើ Android

2014-11-16 00:17:13
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក គ្រុយ វណ្ណា ដែលជាអ្នកបង្កើតក្តារចុចឆ្លាតវៃសម្រាប់ប្រើនៅលើ iOS បានចូលរួមពិព័រណ៍ ITET 2014។ អ្វីគួរឲ្យចាប់អារម្មណ៍ក្នុងឱកាសនោះ លោកមានអាវយឺតដ៏ស្រស់ស្អាតដែលមានរចនាអក្សរខ្មែរ ក្តារចុចឆ្លាតវៃ ដើម្បីលក់ជូនប្រិយមិត្តដែលបានចូលរួមនៅក្នុងពិព័រណ៍។

លោកគ្រុយ វណ្ណា បានឲ្យដឹងថា ក្នុងឱកាសពិព័រណ៍ ITET 2014 លោកមានអាវយឺតដ៏ស្រស់ស្អាតដែលមានរចនាអក្សរខ្មែរ ក្តារចុចឆ្លាតវៃ ជាកម្មវិធីដែលលោកបានបង្កើតនៅលើ iOS ដើម្បីលក់ជូនដល់ប្រិយមិត្តដែលចូលរួមទស្សនាពិព័រណ៍រយៈពេល ៣ ថ្ងៃ។ លោកថា ថវិកាបានពីការលក់អាវយឺតនេះ លោកនឹងយកចំណាយលើការអភិវឌ្ឍកម្មវិធីក្តារចុចឆ្លាតវៃ ដែលលោកគ្រោងធ្វើនៅលើ Android។

ក្នុងរយៈពេលជិតពីរថ្ងៃនៃការតាំងពិព័រណ៍ អាវយឺតដែលលោកគ្រុយ វណ្ណា លក់បានតែជាង ២០ អាវតែប៉ុណ្ណោះ។ ប៉ុន្តែលោកសង្ឃឹមតាមរយៈ Sabay ប្រិយមិត្តនឹងចាប់អារម្មណ៍ និងជួយទិញកាន់តែច្រើន។

ប្រិយមិត្តនិងមិត្តយុវវ័យបើចាប់អារម្មណ៍ អាចមករកទិញបានអាវយឺតក្តារចុចឆ្លាតវៃ ដែលដាក់លក់នៅក្នុងពិព័រណ៍ ITET រយៈពេល ៣ ថ្ងៃនៅសាលពិព័រណ៍កោះពេជ្រ ឬក៏អាចទំនាក់ទំនងតាមលេខទូរសព្ទ ០១១ ៩៥៥ ៥៩៥៕

លោក គ្រុយ វណ្ណា និស្សិតខ្មែររៀននៅប្រទេសជប៉ុនបានបង្កើតក្តារចុចថ្មីមួយ ដែលអាចធ្វើឲ្យការសរសេរអក្សរខ្មែរនៅលើទូរសព្ទកាន់តែលឿនជាងមុន។ កម្មវិធីនេះមានឈ្មោះថា “ក្ដារចុចឆ្លាតវៃ” ដែលដាក់ឲ្យប្រើប្រាស់នៅលើ iOS 8។ ក្រោយពេលទទួលបានជោគជ័យ និងគាំទ្រពីប្រិយមិត្ត លោកកំពុងមានគម្រោងអភិវឌ្ឍន៍ក្តារចុចឆ្លាតវៃនេះនៅលើ Android បន្តទៀតនៅពេលឆាប់ៗនេះ។

លោកបញ្ជាក់ថា សម្រាប់ក្តារចុចឆ្លាតវៃដែលលោកគ្រោងធ្វើនៅលើ Android នៅពេលបញ្ចប់ នឹងដាក់ឲ្យប្រិយមិត្តទាញយកទៅប្រើប្រាស់ដោយសេរី៕