កែវ រំចង់ មានមហិច្ឆតាចូលប្រឡូកសង្វៀនធំ ONE Championship

2018-11-01 02:08:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំង កែវ រំចង់ ដែលជាកីឡាករមានឈ្មោះបោះសំឡេងច្រើនឆ្នាំនៅក្នុងប្រទេសកម្ពុជាមានបំណងចូលប្រឡូកលើឆាកអន្តរជាតិមួយស្ថាប័នប្រដាល់ពិភពលោក ONE Championship។

ក្រោយជាសះស្បើយពីរបួសដែលធ្វើឲ្យរូបគេបាត់មុខពីសង្វៀនយ៉ាងយូរ កែវ រំចង់បានវិលត្រឡប់ចូលសង្វៀនវិញហើយទទួលបានជ័យជម្នះជាបន្តបន្ទាប់តាមរយៈជំនាញទាត់មិនជើងក្រោមដ៏មានទម្ងន់។ បច្ចុប្បន្នរូបគេកំពុងហ្វឹកហាត់ត្រៀមប្រកួតមួយនៅក្នុងពិធីបុណ្យអុំទូកនាពេលខាងមុខ។

កែវ រំចង់ កាលឈ្នះខ្សែក្រវាត់ពីអតីតអ្នកប្រដាល់ អូត ភូថង កាលពីប៉ុន្មានឆ្នាំមុន

ថ្វីបើកីឡាករវ័យ២៨ឆ្នាំចូលចិត្តបញ្ចេញថ្វីដៃនៅមុខអ្នកគាំទ្ររបស់ខ្លួនក្នុងស្រុកក៏ដោយ ក៏ជើងខ្លាំងកម្ពុជាម្នាក់នេះចង់បញ្ចេញជំនាញកម្រិតកំពូលឲ្យទូទាំងពិភពលោកបានឃើញ។ ឥឡូវនេះ ONE Championship កំពុងធ្វើការយ៉ាងជិតស្និទ្ធជាមួយកីឡាករក្នុងព្រះរាជាណាចក្រកម្ពុជាតាមរយៈវិបសាយ Sabay ដើម្បីផ្សព្វផ្សាយសិល្បៈក្បាច់គុនខ្មែរដល់អ្នកទស្សនារាប់លាននាក់ ហើយ លោក រំចង់យល់ថា ស្ថាប័ននេះអាចរៀបចំការប្រកួតស័ក្ដិសមមួយដើម្បីសម្រាប់រូបគេបង្ហាញសមត្ថភាពលើឆាកអន្តរជាតិ។

កែរ រំចង់ បាននិយាយថា ៖«សម្រាប់ខ្ញុំ ខ្ញុំចង់បង្ហាញសមត្ថភាពរបស់ខ្ញុំដល់ពិភពលោកឲ្យបានស្គាល់ពីក្បាច់គុនខ្មែរដ៏អស្ចារ្យរបស់យើង»។

ម្ចាស់ខ្សែក្រវាត់ច្រើនរូបនេះបានប្រឡូកក្នុងវិស័យប្រដាល់ក្បាច់គុនខ្មែររយៈពេលជាង១០ឆ្នាំហើយ ប៉ុន្តែឥឡូវនេះគិតថា ខ្លួនមានលក្ខណៈសម្បត្តិគ្រប់គ្រាន់សម្រាប់តទល់នឹងដៃគូប្រកួតមានកម្រិតខ្លាំងៗនៅក្នុងសង្វៀន ONE Super Series។ ប្រសិនបើ កែវ រំចង់ ទទួលបានកុងត្រាពី ONE កីឡាករកម្ពុជារូបនេះអាចនឹងត្រូវផ្គូផ្គងឲ្យប៉ះម្ចាស់ជើងឯកប្រដាល់ពិភពលោកដូចជាកីឡាករ Nieky Holzken ហៅ "The Natural" ឬកីឡាករ Andy Souwer ជាដើម។

កែវ រំចង់ ជឿជាក់ថា លោកនឹងទទួលបានដំណឹងល្អពីស្ថាប័នប្រដាល់ ONE ដោយផ្អែកលើបទពិសោធប្រកួតប្រដាល់សេរីលើសង្វៀនជាង១៦០លើក។ អ្នកប្រដាល់ខេត្តបាត់ដំបងរូបនេះនិយាយថា ៖ «លក្ខណៈពិសេសរបស់អ្នកប្រដាល់ខ្មែរគឺយើងជំនាញប្រើកែង។ [គូប្រកួតរបស់យើង] ភាគច្រើនភ័យខ្លាចបច្ចេកទេសប្រើកែងរបស់យើងណាស់។ កីឡាករខ្មែរពូកែអត់ធ្មត់ ហើយអាចស៊ូទ្រាំនឹងការលំបាកបានគ្រប់បែបយ៉ាង»។

កែវ រំចង់ ក្រាបសំពះលោក កែវ សំអាង ដែលជាឪពុក និងជាគ្រូបង្វឹក

ក្រៅពីត្រៀមរងចាំដំណឹងពី ONE Super Series កែវ រំចង់ មានបំណងប្រាថ្នាកសាងជីវិតឲ្យក្លាយជាគ្រូបង្វឹកម្នាក់ដល់ក្មេងៗជំនាន់ក្រោយឲ្យស្គាល់ពីក្បាច់គុនបុរាណខ្មែរនិងចង់រស់នៅជីវិតសាមញ្ញ។

រំចង់ និងឪពុកគឺលោក កែវ សំអាងបានបង្កើតក្លឹបប្រដាល់«ដំបងក្រញូងកីឡា»នៅខេត្តបាត់ដំបងដែលជាទឹកដីកំណើតរបស់គាត់ដែលបង្កើតឡើងក្នុងគោលបំណងជួយជំរុញលើកទឺកចិត្តដល់ក្មេងៗជំនាន់ក្រោយអាចដើរតាមគន្លងគាត់។

«ខ្ញុំចង់បង្កើតក្លឹបកីឡាមួយនៅបាត់ដំបងសម្រាប់យុវវ័យយើង។ យើងនឹងព្យាយាមលើកទឹកចិត្តឱ្យពួកគាត់បានចូលរួមក្នុងវិស័យកីឡាដើម្បីសុខភាព ដូច្នេះពួកគាត់អាចជៀសឆ្ងាយពីគ្រឿងញៀន»។ រំចង់បានបញ្ជាក់។

ជើងខ្លាំងកម្ពុជារូបនេះបានចូលរួមចំណែកជួយវិស័យសិល្បៈក្បាច់គុនខ្មែរនៅប្រទេសកម្ពុជាបានសុះសាយទាំងក្នុង និងនៅប្រទេសជិតខាង ព្រមទាំងនៅបារាំងថែមទៀត។ ប្រសិនបើរូបគេមានឱកាសចូលរួមជាមួយ ONE Super Series ថ្ងៃណាមួយនោះ រឹតតែធ្វើឲ្យប្រជាប្រិយភាពខ្លួន ក៏ដូចជាគុនខ្មែរល្បីសុះសាយខ្លាំងឡើង៕

អត្ថបទ៖ Matias Andres