ម៉ូតូ១៦គ្រឿង និងរថយន្ត៩គ្រឿងប្រណាំងឆ្លងកាត់តំបន់និរតី៣ខេត្ត

2018-11-01 07:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តប្រភេទ RALLY ៩គ្រឿង និងម៉ូតូ១៦គ្រឿងត្រូវប្រកួតគ្នាឆ្លងកាត់ខេត្តមាត់សមុទ្រ៣ក្នុងព្រឹត្តិការណ៍ Khmer Rally Raid ដែលត្រូវឆ្លងកាត់ឧបសគ្គក្នុងគោលបំណងចូលរួមចំណែកអភិរក្ស និងការពារធនធានធម្មជាតិ និងបរិស្ថានក្នុងប្រទេសកម្ពុជាពីថ្ងៃទី២ដល់ថ្ងៃទី៤ ខែវិច្ឆិកា ឆ្នាំ២០១៨។

ទិដ្ឋភាពធ្វើសន្និសីទ (រូបថត៖ ចាន់ វិចិត្រ)

ក្នុងសន្និសីទសារព័ត៌មានដែលបានរៀបចំនៅក្រសួងបរិស្ថានកាលពីថ្ងៃទី៣១ ខែវិច្ឆិកា លោកលោក ហួ សិទ្ធិគុណ អនុប្រធានសហព័ន្ធកីឡាយានយន្តកម្ពុជា និងស្ថាបនិកក្លឹប KARA កម្ពុជាបានឲ្យដឹងថា ព្រឹត្តិការណ៍ប្រណាំងរថយន្តឆ្លងកាត់ឧបសគ្គ Khmer Rally Raid ជាលើកទី២ឆ្នាំនេះត្រូវប្រកួតឆ្លងកាត់ខេត្តកំពង់ស្ពឺ កំពត និងព្រះសីហនុ។ ទិសដៅប្រណាំងនៅខេត្តទាំង៣នេះដើម្បីបង្ហាញសក្ដានុពលតំបន់អភិរក្សធនធានធម្មជាតិ និងជីវចម្រុះ អេកូ-ទេសចរណ៍របស់កម្ពុជា។

លោកបន្តថា ព្រឹត្តិការណ៍នេះចាប់ផ្តើមប្រកួតនៅថ្ងៃទី២ ដោយចេញដំណើរពីភ្នំពេញ ឆ្ពោះទៅខេត្តកំពង់ស្ពឺ ព្រះសីហនុ កំពត និងត្រឡប់បញ្ចប់នៅថ្ងៃទី៤ ខែវិច្ឆិកា នៅភ្នំពេញដោយមានម៉ូតូ ១៦គ្រឿង និងរថយន្តប្រភេទ RALLY ៩ គ្រឿងចូលរួម។ កីឡាករទាំងអស់មាន៨០នាក់ដែលមានមកពីប្រទេសថៃ អូស្ត្រាលី វេល ស្កុតឡែន និងម្ចាស់ផ្ទះកម្ពុជា។

ការប្រកួតនេះអនុវត្តតាមរូបមន្ត ASIA CROSS COUNTRY RALLY ដែរ ដោយតម្រូវឲ្យអត្តពលិកទាំងម៉ូតូ និងរថយន្តមើលផែនទីបង្ហាញផ្លូវឆ្ពោះដើម្បីប្រណាំងទៅគោលដៅពីចេញដំណើរ និងគោលដៅបញ្ចប់ ក្នុងថ្ងៃនីមួយៗ។ អ្នកប្រណាំងអស់ត្រូវឆ្លងកាត់ផ្លូវចម្ងាយ៦០០គីឡូម៉ែត្រកាត់ឧបសគ្គជើងភ្នំ កាត់តាមចំការ និងព្រៃជាដើម។

លោក នេត្រ ភក្ត្រា (រូបថត៖ ចាន់ វិចិត្រ)

លោក នេត្រ ភក្រ្តា រដ្ឋលេខាធិការក្រសួងបរិស្ថានបានរៀបរាប់ថា ការប្រណាំងរថយន្ត Khmer Rally Raid ២០១៨នេះមានគោលបំណងធំសំខាន់៤គឺទី១ចូលរួមអភិរក្សជីវចម្រុះ និងសត្វព្រៃ ទី២ ចូលរួមអនុវត្តច្បាប់ការពារធនធានធម្មជាតិ និងបរិស្ថាន ទី៣បង្ហាញពីធម្មភាពដ៏ស្រស់ត្រកាលរបស់កម្ពុជា និងទី៤បង្ហាញជីវភាពរស់នៅរបស់ប្រជាពលរដ្ឋក្នុងសហគមន៍ទាំងនោះ។

កន្លងមកសហព័ន្ធកីឡាយានយន្តកម្ពុជា និងក្លឹប KARA ធ្លាប់បានរៀបចំព្រឹត្តិការណ៍ប្រណាំងរថយន្តបែបនេះនៅតំបន់ឥសាន្តដែលមានខេត្តស្ទឹងត្រែង រតនគីរី និងមណ្ឌលគីរីជាដើម ប៉ុន្តែលើកនេះប្តូរមកទិសនិរតីប្រទេសដែលជា «តារារះនាទិសនិរតី»៕

អត្ថបទ៖ ជាន ចាន់រ៉ា