ធ្លាយពីរយៈពេលដែល De Bruyne អាចអវត្តមានដោយសាររបួសថ្មី

2018-11-02 13:24:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Manchester City កីឡាករ Kevin De Bruyne បានរងរបួសជង្គង់បន្ទាប់ពីការប៉ះទង្គិចក្នុងការប្រកួត League Cup ទល់នឹងក្លឹប Fulham នៅយប់ម្សិលមិញនេះ ដែលបណ្ដាលឲ្យគេអាចនឹងខកខានយ៉ាងតិច ១ខែ។

ការរងរបួសលើកនេះអាចធ្វើឲ្យ De Bruyne ខកខាន ៦ប្រកួតដែលក្នុងនោះ រូបគេអាចនឹងបាត់បង់ឱកាសក្នុងការជួយក្រុម ក្នុងប្រកួត Premier League នឹងក្លឹបគូប្រជែងរួមទីក្រុងគឺ ក្លឹប Manchester United ព្រមទាំងប្រកួតក្នុងក្របខ័ណ្ឌកំពូលអឺរ៉ុបទល់នឹងក្លឹបបារាំង Lyon ដែលកំពុងតែប្រកៀកនឹងក្លឹប Manchester City។

ប្រសិនបើករណីធ្ងន់ធ្ងរ ខ្សែបម្រើបែលហ្សិករូបនេះ ប្រឈមនឹងអវត្តមាន ៦សប្ដាហ៍ដោយខកខាន ៤ប្រកួតថែមទៀតដែលមានដូចជា ប្រកួត Premier League ទល់នឹងក្លឹប Watford ក្លឹប Chelsea និងក្លឹប Everton រីឯក្នុង UCL វិញគឺប្រកួតទល់នឹងក្លឹបអាល្លឺម៉ង់ Hoffenheim ក្នុងកីឡដ្ឋាន Etihad។

សូមបញ្ជាក់ផងដែរថា ការប្រកួត League Cup ទល់នឹងក្លឹប Fulham កាលពីយប់ថ្ងៃព្រហស្បតិ៍នេះ គឺជាការបង្ហាញខ្លួនក្នុងស្រុកជាលើកដំបូងរបស់ De Bruyne បន្ទាប់អវត្តមាន ២ខែដោយសារតែរបួសជង្គង់កាលពីខែសីហាកន្លងទៅ៕

ប្រភព៖ telegraph ប្រែសម្រួល៖ ហ៊ីម រស្មី