មាស ម៉ើ ប៉ះជើងខ្លាំងហុល្លង់មុនដាច់ឆ្នាំ២០១៨

2018-11-04 03:04:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងយុទ្ធគុនចម្រុះកម្ពុជា មាស ម៉ើ រំពឹងលទ្ធផលល្អប្រសើរមុនពេលឆ្នាំ២០១៨បញ្ចប់ទៅនៅពេលរូបគេបោះជំហានសាជាថ្មីសង្វៀនធំប្រចាំអាស៊ី ONE: HEART OF THE LION នៅប្រទេសសិង្ហបុរីថ្ងៃទី៩ ខែវិច្ឆិកា។ ជើងខ្លាំងវ័យ២៨ឆ្នាំកម្ពុជាត្រូវបានផ្គូផ្គងឲ្យជួបជើងខ្លាំងហុល្លង់ Anthony Engelen នៅសង្វៀន Indoor Stadium។

មាស ម៉ើ ពេលហ្វឹកហាត់

មាស ម៉ើ បានបង្កើតកំណត់ត្រាដ៏ភ្ញាក់ផ្អើលនៅពេលរូបគេស្វែងរកបានជ័យជម្នះ៥លើកជាប់គ្នាក្នុងអាជីពប្រដាល់គុនចម្រុះគិតតាំងពីឆ្នាំ២០១៤មក ប៉ុន្តែប៉ុន្មានប្រកួតចុងក្រោយមិនទទួលបានលទ្ធផលគួរជាទីគាប់ចិត្តឡើយ។

អតីតជើងឯកគុនចម្រុះ Khmer Warrior Champion មានបទពិសោធកីឡាច្រើនប្រភេទក្នុងនោះកីឡាប្រដាល់គុនខ្មែរ ចំបាប់ និងយូដូដែលធ្វើឲ្យរូបគេក្លាយជាអ្នកប្រដាល់ MMA របស់កម្ពុជាដ៏ជោគជ័យម្នាក់។

រូបគេជាកីឡាករដែលមានទេពកោសល្យម្នាក់ដែលកំពុងហ្វឹកហាត់នៅក្លឹប Cambodian Top Team ក្នុងរាជធានីភ្នំពេញដែលមានមិត្តរួមក្រុម រិន សារ័ត្ន និងស សីជាដើម។ អ្នកគាំទ្រដឹងហើយថា ២ប្រកួតចុងក្រោយរបស់គេនៅសង្វៀន ONE Championship មិនគាប់ប្រសើរឡើយ ប៉ុន្តែមុនដាច់ឆ្នាំ២០១៨ រូបគេប្តេជ្ញាធ្វើឲ្យបានល្អ។

បើនិយាយពីដៃគូរបស់គេវិញជាកីឡាករហុល្លង់ដែលត្រូវបានគេដឹងថា មានស្នៀតក្រោមល្អ និងកម្លាំងក៏ស៊ុហ្វបានល្អ ដូច្នេះអាចនឹងបង្កការលំបាកខ្លាំងដល់មាស ម៉ើ។ ជើងខ្លាំង Engelen អាយុ៣៣ឆ្នាំថ្វីត្បិតមានដើមកំណើតនៅហុល្លង់ ប៉ុន្តែរូបគេបានរស់នៅទីក្រុងហ្សារកាតា ប្រទេសឥណ្ឌូណេស៊ី។

មាស ម៉ើ

រវាងជើងខ្លាំងទាំងពីរត្រូវបានគេគិតថា ពិបានស្មានរឿងលទ្ធផលណាស់ ពីព្រោះសុទ្ធតែអ្នកមានស្នៀតក្រោមល្អដូចគ្នា។ ច្បាស់ណាស់ថា អ្នកទាំងពីរនឹងធ្វើឲ្យកក្រើកសង្វៀនក្នុងកីឡដ្ឋានប្រទេសសិង្ហបុរីមិនខានឡើយ។

រឹតតែអស្ចារ្យសម្រាប់ព្រឹត្តិការណ៍ធំ ONE: HEART OF THE LION គឺនារីជើងខ្លាំងម្ចាស់ខ្សែក្រវាត់ពិភពលោករបស់ម្ចាស់ផ្ទះសិង្ហបុរី Angela Lee ត្រូវប៉ះម្ចាស់ខ្សែក្រវាត់ពិភពលោកដូចគ្នារបស់ប្រទេសចិន Xiong Jing Nan។ ចំណែកម្ចាស់ខ្សែក្រវាត់ពិភពលោករបស់ប្រេស៊ីល Bibiano Fernandes ត្រូវប្រឈមនឹងម្ចាស់ខ្សែក្រវាត់ពិភពលោកថ្មីៗ Kevin Belingon៕

អត្ថបទ៖ ជាន ចាន់រ៉ា