អត់ទៅ STEM ម៉េចបាន មានការប្រកួត Robot "ស៊ូម៉ូ" តែកុំភ្លេចបបួល crush ទៅផង!

2018-11-08 09:31:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីមហោស្រពពិព័រណ៍វិទ្យាសាស្ត្រកម្ពុជា(STEM)ប្រចាំឆ្នាំលើកទី ១៤ កំពុងជិតចូលមកដល់ហើយ ហើយនឹងមានឱកាសចូលរួមព្រឹត្តិការណ៍ដ៏ធំសម្បើម និងគួរឱ្យរំភើបជាប្រវត្តិសាស្ត្រនៅក្នុងឆ្នាំនេះ ដែលមានការប្រកួតរ៉ូបូត គម្រោងសិល្បៈ និងការបង្ហាញស្នាដៃថ្មីៗដែលសិស្សផ្នែកវិទ្យាសាស្រ្តបានប្រឹងប្រែងស្រាវជ្រាវផងដែរ។

ព្រឹត្តិការណ៍នេះរៀបចំដោយអង្គការពិព័រណ៍វិទ្យាសាស្ត្រកម្ពុជា អង្គការស្ទីមកម្ពុជា និងក្រសួងអប់រំ យុវជន និងកីឡា ដែលនឹងប្រព្រឹត្តទៅនៅ ថ្ងៃសុក្រ ទី៣០ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០១៨ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

ការចូលរួមអបអរមុខវិជ្ជាស្ទែម(STEM) ដូចជាវិទ្យាសាស្ត្រ បច្ចេកវិទ្យា វិស្វកម្ម និងគណិត ព្រមទាំងការបន្ថែមសិល្បៈផងដែរនោះ កម្មវិធីពិព័រណ៍ចំនួនពីរថ្ងៃនេះនឹងជួយឱ្យសិស្ស-និស្សិតចូលរួមនៅក្នុងសកម្មភាពជាក់ស្ដែង និងរីករាយជាមួយ “ពិព័រណ៍របស់កុមារ” និទស្សន៍ស្ទែមលើឆាក បាឋកថាស្ទែម ការសំដែងទាក់ទងនឹងស្ទែម គម្រោងស្ទែមសរុបចំនួន ១០០ គម្រោងសម្រាប់ថ្ងៃនីមួយៗនៃកម្មវិធី និទស្សន៍រ៉ូបូត និងការប្រកួតរ៉ូបូត ”ស៊ូម៉ូ” ទៀតផង។

ការចុះបើកជូនចំពោះសិស្សានុសិស្សចាប់ពីថ្នាក់ទី ៤ ដល់ទី ១២ រួមនិងនិស្សិតសកលវិទ្យាល័យ ហើយសម្រាប់ព័ត៌មានអំពីការចុះឈ្មោះដាក់តាំងគម្រោង សូមចូលទៅកាន់ www.stemcambodia.org ។

ចំពោះកាលបរិច្ឆេទឈប់ទទួលពាក្យត្រូវបានលើកទៅថ្ងៃទី ០៩ ខែវិច្ឆិកា ឆ្នាំ២០១៨ វិញ។ ហេតុនេះ សូមរួសរាន់ឡើងដើម្បីចុះឈ្មោះ និងទទួលបានឱកាសដើម្បីតាំងបង្ហាញទេពកោសល្យលើផ្នែកស្ទែមរបស់អ្នកនៅក្នុងព្រឹត្តិការណ៍នេះ។

ការចុះឈ្មោះដាក់តាំងគម្រោងស្ទែម គឺឥតគិតថ្លៃ ហើយគម្រោងទាំងនោះអាចមានលក្ខណៈជាការស្វែងយល់ ផ្ដល់ព័ត៌មាន និងបង្ហាត់បង្ហាញ ដូចនេះបើទោះជាពេលវេលានៅមានកំណត់នៅមុនព្រឹត្តិការណ៍នេះក៏ដោយក្ដី លោកអ្នកនៅតែមានឱកាសដើម្បីចូលរួមបង្ហាញស្នាដៃដដែល។

ចំណែកឯកាលបរិច្ឆេទផុតកំណត់ទទួលស្នាដៃសិល្បៈរបស់ប្អូនៗសិស្សកម្រិតបឋមសិក្សា ក្រោមការឧបត្ថម្ភដោយអង្គការសត្វព្រៃនិងរុក្ខជាតិអន្តរជាតិ គឺនៅថ្ងៃទី១៥ ខែវិច្ឆិកា ហើយការប្រកួតសំណេររបស់សិស្សកម្រិតវិទ្យាល័យ ក្រោមការឧបត្ថម្ភដោយ Decathlon ជាមួយរង្វាន់ដ៏អស្ចារ្យ គឺឈប់ទទួលយកនៅថ្ងៃទី១២ ខែវិច្ឆិកា ខាងមុខនេះហើយ។

ចំពោះកាលបរិច្ឆេទឈប់ទទួលពាក្យសម្រាប់អ្នកដែលមានបំណងចង់ឡើងសំដែងលើវេទិកាទាក់ទងនឹងប្រធានបទស្ទែម គឺនៅថ្ងៃទី ១៥ ខែវិច្ឆិកា។

រីឯអ្នកដែលមានបំណងផ្ដល់បាឋកថាអំពីស្ទែម សូមមេត្តាចុះឈ្មោះឱ្យបានត្រឹមថ្ងៃទី ១២ ខែវិច្ឆិកា ខាងមុខនេះ។

សម្រាប់ព័ត៌មានលម្អិតទាក់ទងនឹងការចុះឈ្មោះខាងលើនេះ សូមពិនិត្យត្រង់ផ្នែក “Get Involved” នៅលើអាសយដ្ឋានវេប www.stemcambodia.org ។

តារាងពេលវេលាផ្លូវការអំពីសកម្មភាពទាំងនេះនឹងចេញផ្សាយលើបណ្ដាញអនឡាញ នៅពេលឆាប់ៗនេះហើយ។ ខណៈសាធារណជនកំពុងរំភើបជាមួយនឹងការមកដល់នៃព្រឹត្តិការណ៍នេះ អ្នកដែលមានបំណងចង់ដាក់តាំងពិព័រណ៍គម្រោងរបស់ខ្លួន ក៏នៅមានឱកាសចុះឈ្មោះផងដែរ។

គំនិតផ្ដួចផ្ដើមចំនួនពីរក្នុងចំណោមគម្រោងជាច្រើន ពោលគឺការប្រកួតរ៉ូបូត និងគម្រោងសិល្បៈដើម្បីបរិស្ថានបានផ្ដល់នូវចំណុចចាប់ផ្ដើមមួយដល់សាធារណជនរួចមកហើយដើម្បីត្រៀមនៅមុនពេលប្រារព្ធកម្មវិធីមហោស្រពពិព័រណ៍វិទ្យាសាស្ត្រកម្ពុជាប្រចាំឆ្នាំ។

ការប្ដេជ្ញាបន្តរៀបចំ និងកិច្ចគាំទ្រធំធេងលើគ្រប់ផ្នែករបស់ក្រសួងអប់រំ ចំពោះពិព័រណ៍នេះ ជួយឱ្យប្រាកដថា ព្រឹត្តិការណ៍នេះបន្តរីកសុសសាយជាបន្តបន្ទាប់នៅឆ្នាំក្រោយៗទៀត។ ជាការតបស្នង ព្រឹត្តិការណ៍អាចចូលរួមដោយសេរីដូចរាល់ឆ្នាំ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

ចំពោះក្រុមហ៊ុនពាណិជ្ជកម្មគ្រឹះស្ថានអប់រំ ឬក្រុមហ៊ុនចំណីអាហារដែលមានបំណងចង់ចូលរួម សូមទាក់ទងមកកាន់អង្គការពិព័រណ៍វិទ្យាសាស្ត្រភ្លាមៗតាមរយៈអ៊ីមែល info@stemcambodia.ngo ។ សម្រាប់ព័ត៌មានបន្ថែមអំពីព្រឹត្តិការណ៍នេះ ឬឱកាសចូលរួមដូចបានបញ្ជាក់ជូនខាងលើ សូមចូលទៅកាន់ www.stemcambodia.org ឬទូរស័ព្ទ +៨៥៥ (២៣) ៧២ ៧២ ៦២៕

អត្ថបទ៖ រក្សា

ពាក្យទាក់ទង