មិនខ្លាចខ្សត់អ្នកលេង! Facebook បិទចោលពាន់លានគណនីត្រឹមរយៈពេល ៥ ខែ

2018-11-16 12:18:24
ចំនួនមតិ 0 | ចំនួនចែករំលែក 0

ចន្លោះមិនឃើញ

របាយការណ៍ចេញផ្សាយដោយក្រុមហ៊ុន Facebook មុននេះបន្តិចបានលំអិតពីយុទ្ធនាការប្រយុទ្ធប្រឆាំងនឹងការបង្ហោះព័ត៌មានក្លែងក្លាយ ការឃោសនាអំពើភេរវកម្ម និងទង្វើឥតបានការជាច្រើនលើមាតិការបស់ខ្លួន។ គិតត្រឹមខែមេសា ដល់ខែកញ្ញា ឆ្នាំ ២០១៨ ក្រុមហ៊ុនកត់សម្គាល់ឃើញថាមានជាង ១,៥ ពាន់លានគណនី ត្រូវបានបិទចោល។

តួលេខនេះមានការកើនឡើងតាំងពីត្រីមាសទី ១ ដោយមានត្រឹម ៥៣៤ លានគណនី កើនដល់ ៨០០ លានគណនីនៅត្រីមាសទី ២ និង ៧៥៤ លានផ្សេងទៀតក្នុងត្រីមាសទី ៣ ដោយទាំងនោះសុទ្ធសឹងជាគណនីក្លែងក្លាយ ដែលបង្កចលាចលលើបណ្ដាញសង្គម។

ក្នុងសេចក្ដីថ្លែងការណ៍របស់ Facebook បានចុះផ្សាយថា៖ "តួលេខនេះបានរងផលប៉ះពាល់ដោយសារកត្តាខាងក្រៅ ដូចជាការវាយប្រហារលើអ៊ីនធឺណិត (Cyberattack) ធ្វើឲ្យមានកំណើនគណនីក្លែងក្លាយលើ Facebook បន្សំនឹងជនមិនល្អព្យាយាមបង្កើតគណនីក្លែងក្លាយរាប់មិនអស់ដោយស្វ័យប្រវត្តិតាមរយៈការប្រើប្រាស់ Script ឬ Bot ក្នុងគោលបំណងរាតត្បាតសកម្មភាពខុសច្បាប់ជាច្រើន"។

រំឭកថាសារនេះនៅតែជាចំណុចអវិជ្ជមានដែលធ្វើឲ្យអ្នកប្រើប្រាស់បាត់បង់ទំនុកចិត្តលើ Facebook ព្រោះបណ្តាញសង្គមយក្សមានមូលដ្ឋាននៅសហរដ្ឋអាមេរិកហាក់ជួបរឿងអាស្រូវផ្ទួនគ្នាក្នុងឆ្នាំតែមួយមានតាំងពីការបែកធ្លាយប្រព័ន្ធសុវត្ថិភាព និងអាស្រូវជាមួយ Cambridge Analytica ពោលគឺលោក Mark Zuckerberg ចាំបាច់ត្រូវមានវិធានការឲ្យបានដិតដល់ជុំវិញបញ្ហាដែលកំពុងប្រឈម។