រុស្ស៊ី បាញ់ និងរឹបអូសនាវាអ៊ុយក្រែន ៣គ្រឿង ក្រោយកើតភាពតានតឹងកាន់តែខ្លាំង

2018-11-26 04:03:54
ចំនួនមតិ 0 | ចំនួនចែករំលែក 0

ចន្លោះមិនឃើញ

រុស្ស៊ី បានបើកការបាញ់ប្រហារ និងរឹបអូសនាវាអ៊ុយក្រែន ចំនួន៣គ្រឿង នៅលើឧបទ្វីប Crimean ខណៈភាពតានតឹងរវាងប្រទេសទាំងពីរកំពុងកើនឡើងខ្លាំង។ ជាមួយគ្នានេះដែរ នាវិកលើនាវាអ៊ុយក្រែនចំនួន ៣នាក់បានរងរបួស។

ទោះបីជាយ៉ាងណា ប្រទេសទាំងសងខាងបានចោទកំហុសដាក់គ្នាទៅវិញទៅមកចំពោះហេតុការណ៍ខាងលើនេះ។ រុស្ស៊ី ចោទប្រកាន់ថា នាវាទាំងនោះបានចូលក្នុងដែនទឹករបស់ខ្លួនខុសច្បាប់ ប៉ុនប៉ងធ្វើសកម្មភាពខុសច្បាប់ និងមិនខ្វល់ពីការព្រមានរបស់ខ្លួនឡើយ។

ចំណែកខាងអ៊ុយក្រែនវិញ បានអះអាងថា ខ្លួនបានផ្ដល់ដំណឹងជាមុនដល់ភាគីរុស្ស៊ីពីគម្រោងដើម្បីធ្វើនាវាចរណ៍ពីតំបន់រមណីយដ្ឋាន Odessa ក្នុងដែនសមុទ្រខ្មៅរបស់អ៊ុយក្រែន ទៅកាន់កំពង់ផែ Mariupol ដែលនៅឆ្នេរភាគខាងជើងនៃសមុទ្រ Azov។

នៅក្នុងអំឡុងកិច្ចប្រជុំរបស់ក្រុមប្រឹក្សាសន្តិសុខជាតិ និងការពារជាតិរបស់ប្រទេសអ៊ុយក្រែន លោកប្រធានាធិបតី Petro Poroshenko បានរៀបរាប់ពីសកម្មភាពរបស់រុស្ស៊ីថា «មិនត្រឹមត្រូវ និងឆ្កួតលីលា»។

យ៉ាងណាមិញ ប្រទេសរុស្ស៊ីបានស្នើសុំឲ្យមានកិច្ចប្រជុំបន្ទាន់មួយនៃក្រុមប្រឹក្សាសន្តិសុខអង្គការសហប្រជាជាតិ ដោយឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ Nikki Haley បាននិយាយថា នឹងធ្វើឡើងនៅវេលាម៉ោង ១១ព្រឹកនៅទីក្រុង New York ថ្ងៃច័ន្ទ ទី២៦ វិច្ឆិកា ២០១៨ នេះតែម្ដង៕