ចេះតែខ្ជិល? មកដឹងតិចនិក ៩ជម្នះភាពខ្ជិលច្រអូសខ្លួនឯងដើម្បីសម្រេចការងារធំ មានជីវិតជោគជ័យ
- 2018-11-27 10:50:59
- ចំនួនមតិ 0 | ចំនួនចែករំលែក 0
ចេះតែខ្ជិល? មកដឹងតិចនិក ៩ជម្នះភាពខ្ជិលច្រអូសខ្លួនឯងដើម្បីសម្រេចការងារធំ មានជីវិតជោគជ័យ
ចន្លោះមិនឃើញ
ភាពខ្ជិលច្រអូស គឺជាទម្លាប់អាក្រក់មួយ ដែលតែងកើតលើមនុស្សគ្រប់រូប។ វាមើលទៅហាក់ដូចជារឿងធម្មតា តែបើអ្នកចេះតែបណ្តែតបណ្តោយឲ្យវាដឹកនាំជីវិត វានឹងទៅជាទម្លាប់មួយដែលពិបាកបោះបង់ចោល ហើយជីវិតអ្នកនឹងមិនអាចរីកចម្រើនឡើងឡើយ។
ដូច្នេះវាពិតជាចាំបាច់ត្រូវជម្នះភាពខ្ជិលច្រអូសខ្លួនឯងឲ្យបានឥលូវនេះ បើចង់បានជីវិតជោគជ័យ និងរីកចម្រើន ដោយប្រើវិធីសាស្ត្រងាយៗ ៩ ចំណុច ខាងក្រោម៖
១. បំបែកការងារធំ ទៅជាការងារតូចៗ ៖ ពេលខ្លះ អ្នកចាប់ផ្ដើមខ្ជិល ពេលឃើញការងារធំមួយ មិនដឹងថាត្រូវចាប់ផ្តើម និងបញ្ចប់ដោយរបៀបណា ឬត្រូវចំណាយពេលច្រើនម៉ោងជាដើម។ ដូចនេះ ត្រូវបំបែកវាជាតូចៗ ហើយធ្វើម្ដងមួយ ទើបអាចមានអារម្មណ៍ថាមិនសូវមានសម្ពាធ។
២. ដកឃ្លាមកសម្រាក គេង និងហាត់ប្រាណ ៖ ក្នុងករណីខ្លះ ភាពខ្ជិលកើតឡើងដោយសារអស់កម្លាំង និងអស់ថាមពលពីខ្លួន។ ចំណោះស្រាយ គឺអាចផ្ដល់ការសម្រាកខ្លះដល់ខ្លួនឯងសិន កុំបន្តធ្វើទាំងខ្ជិល ដោយគ្មានបានផលអ្វី។ អាចគេងបន្តិច រួចហាត់ប្រាណ ដើម្បីឲ្យទទួលបានភាពស្រស់ថ្លាឡើងវិញ។
៣. គិតពីប្រយោជន៍នៃការងារ ៖ អ្វីដែលអ្នកកំពុងធ្វើ ត្រូវគិតពីប្រយោជន៍របស់វា ទើបធ្វើដោយមិនខ្ជិល។ ចៀសវាងគិតពីការលំបាក ឬឧបសគ្គ ដែលអាចរាំងស្ទះកម្លាំងចិត្តរបស់អ្នក រហូតឈានទៅរកភាពខ្ជិល។ គួរគិតពីចំណុចវិជ្ជមាន នៃអ្វីដែលកំពុងធ្វើ នោះអ្នកនឹងមានកម្លាំងចិត្តបន្ត។
៤. គិតដល់លទ្ធផល នៃភាពខ្ជិល ៖ ត្រូវគិតថា មានអ្វីកើតឡើង បើអ្នកបណ្ដោយខ្លួនឲ្យខ្ជិល និងមិនបានបំពេញការងារដែលខ្លួនត្រូវធ្វើនេះ។ បន្ទាប់ពីគិតហើយ ត្រូវចាប់ផ្ដើមធ្វើភ្លាម នោះអ្នកនឹងជក់ដៃធ្វើ ដោយលែងមានពាក្យថាខ្ជិលទៀតហើយ។
៥. កុំចាប់ធ្វើរឿងច្រើនមុខក្នុងពេលតែមួយ ៖ ត្រូវផ្ដោតលើរឿងតែមួយ ដើម្បីបញ្ចប់ដោយជោគជ័យ មុនចាប់ផ្ដើមឈោងចាប់ការងារមួយទៀត។ នៅពេលមានការងារច្រើន អ្នកនឹងមានអារម្មណ៍ថា "លើសហើយ" រួចក៏ចាប់ផ្ដើមខ្ជិល។
៦. ប្រាប់ខ្លួនឯងថាត្រូវធ្វើ ៖ ត្រូវរំឭកខ្លួនឯងជាប្រចាំថា ពេលវេលាមិនចាំឡើយ បើមិនធ្វើហើយ ២៤ម៉ោងប្រាកដជាកន្លងហួសយ៉ាងលឿន។ ដាស់តឿនខ្លួនឯងថា ទាល់តែធ្វើ ទើបមានលទ្ធផល ទាល់តែធ្វើ ទើបអាចសម្រេចគោលបំណងបាន បើគេធ្វើបាន យើងក៏អាចធ្វើបានដែរ។
៧. ចាត់ទុកការងារ ជាការហាត់ប្រាណ ៖ ត្រូវគិតថាការងារទាំងអស់ ប្រៀបដូចជាការហាត់ប្រាណ ធ្វើឲ្យរាងកាយកាន់តែរឹងមាំ ធ្វើច្រើន កាន់តែសកម្ម។
៨. គិតថាខ្លួនឯងចង់ក្លាយជាអ្វី ៖ មនុស្សដែលមានគោលដៅច្បាស់ ធ្វើអ្វីមួយដោយគ្មានពាក្យថាខ្ជិលឡើយ។ ដើម្បីសម្រេចបំណងដែលខ្លួនចង់បាន និងដឹងថាខ្លួនចង់ក្លាយជាអ្វី នោះអ្នកអាចលើកទឹកចិត្តខ្លួនឯង លាចាកពីពាក្យថា ខ្ជិលបាន។
៩. រៀនតាមគំរូបុគ្គលជោគជ័យ ៖ មើលបុគ្គលជោគជ័យ ថាគេធ្វើយ៉ាងណា ទើបមិនឲ្យភាពខ្ជិលត្រួតត្រាបាន។ នៅពេលសកម្មកាន់តែច្រើន ភាពខ្ជិលក៏ចាកចេញម្ដងបន្តិច ហើយអ្នកនឹងកាន់រឹងមាំ៕