មិនគួរបិទបើកកុំព្យូទ័រច្រើនដងពេកទេក្នុងមួយថ្ងៃ អ្នកជំនាញណែនាំប្រយ័ត្នទៅ

2018-12-02 01:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើប្រើកុំព្យូទ័រច្រើនដងក្នុងមួយថ្ងៃ ល្អបំផុតកុំបិទម៉ាស៊ីន។ បើប្រើក្នុងរយៈពេលខ្លី ១ ឬ ២ ម៉ោង ឬមួយដងក្នុងមួយថ្ងៃ អាចបិទប្រព័ន្ធបាន។ ការទុកឲ្យកុំព្យូទ័របើកដំណើរការយូរ អាចបន្ថយបន្ទុកម៉ាស៊ីនធ្វើការ ជាងបិទបើកច្រើនដងក្នុងមួយថ្ងៃ។ រាល់ពេលម៉ាស៊ីនបើក មានចរន្តមួយបុកចូលជំរុញសមាសធាតុខាងក្នុងឲ្យដំណើរការ ហើយបើបើកច្រើនដងក្នុងមួយថ្ងៃ អាចបន្ថយអាយុជីវិតកុំព្យូទ័របាន។ នេះបើតាមលោក Steven Leslie ជាអ្នកជំនាញពី Geek Squad។

មានហានិភ័យកាន់តែច្រើន ចំពោះកុំព្យូទ័រចាស់ ដោយមានសមាសធាតុរំកិល ដូចជា Hard Disk Drive ខណៈ Solid State Drive មិនមាន អាចធន់នឹងការប្រើប្រាស់ជាង។ កុំព្យូទ័រក៏កើនកម្តៅផងដែរ ពេលប្រព័ន្ធបើក ហើយកម្តៅជាសត្រូវរាល់សមាសធាតុរបស់ម៉ាស៊ីន។

បើក្រឡេកមើលមួយជ្រុងទៀតមានភាពផ្ទុយពីនេះ។ សមាសធាតុខ្លះមានចំនួនជុំកំណត់មួយ ដូចជាផ្ទាំង LCD នៅមានគុណភាពល្អបានត្រឹម ១៥ ០០០ ម៉ោង ឬ ២ឆ្នាំ។ ដូចនេះ ល្អបំផុត គួរបិទម៉ាស៊ីន ឬអេក្រង់ពេលមិនប្រើប្រាស់។ ថ្ម និង Hard drive ក៏មានចំនួនជុំកំណត់ដែរ ដែលគួរបិទម៉ាស៊ីន ឬ Sleep ពេលមិនប្រើ ដើម្បីពន្យារជីវិតសមាសធាតុទាំងនេះ។ នេះបើតាមលោក Ajay Gupta ជានាយកផ្នែកគ្រប់គ្រងផលិតផលកុំព្យូទ័ររបស់ HP។

ហេតុផលពិតប្រាកដ ផ្អែកលើតម្រូវការប្រើប្រាស់ជាក់ស្តែង

ហេតុផលត្រូវបើកចោល

ប្រើ PC ជា Server ឬ ចង់ចូលប្រើប្រាស់ម៉ាស៊ីនពីចម្ងាយ
ទុកឲ្យប្រព័ន្ធធ្វើកំណែទម្រង់ កម្មវិធីកម្ចាត់មេរោគធ្វើការស្កេន ឬសកម្មភាពមួយចំនួនទៀត ដែលអ្នកមិនស្ថិតនៅកន្លែង។
មិនចង់រង់ចាំដំណើរការចាប់ផ្តើមប្រព័ន្ធ

ហេតុផលត្រូវបិទ

ខាតភ្លើងអគ្គិសនី មិនចង់ចំណាយច្រើន ខណៈមិនប្រើ
មិនចង់ត្រូវបានរំខាន ដោយ Notification ឬ សំឡេងកង្ហារ (Fan) ក្នុងម៉ាស៊ីន
ល្បឿនកុំព្យូទ័រធម្មតាមានលក្ខណៈល្អប្រសើរពេល បិទបើក

មុខងារ Sleep ល្អ ដោយម៉ាស៊ីនប្រើថាមពលកម្រិតទាប ដោយមិនបិទទាំងស្រុង។ ចំពោះ Hibernate កុំព្យូទ័របញ្ឈប់ការប្រើថាមពល និងប្រើវិញពេលត្រូវការ។ Hibernate មិនជាជម្រើសល្អនោះទេ ដោយមានលក្ខណៈស្រដៀងនឹងការបិទបើកប្រព័ន្ធដែរ។ នេះបើតាមការបញ្ជាក់បន្ថែមពីលោក Leslie។

ដូចនេះបើចង់ទុកកុំព្យូទ័របើកចោល គួរប្រើជម្រើស Sleep អាចសន្សំសំចៃថាមពល ខណៈមិនសូវដាក់សំពាធឲ្យសមាសធាតុខាងក្នុងដំណើរការ៕