អាកាសយានិកជប៉ុន ជាប់ពន្ធនាគារ ១០ខែ ក្រោយរកឃើញជាតិអាកុលលើសកម្រិត

2018-12-01 03:39:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អាកាសយានិកជប៉ុនម្នាក់ដែលត្រូវបានរកឃើញថាមានជាតិអាកុលលើសកម្រិត ៩ដងមុនពេលហោះហើរកាលពីខែតុលាកន្លងទៅ ត្រូវបានកាត់ទោសឲ្យជាប់ពន្ធនាគាររយៈពេល ១០ខែ។

លោក Katsutoshi Jitsukawa អាយុ ៤២ឆ្នាំដែលជាបុគ្គលិកអាកាសចរជប៉ុន បានធ្លាក់ការធ្វើតេស្ដខ្យល់ដង្ហើមមុនពេលហោះហើរពីទីក្រុង Heathrow ទៅកាន់តូក្យូកាលពីថ្ងៃទី ២៨ខែតុលាម៉ោង ៦:៥០នាទីល្ងាច។ តាមការធ្វើតេស្ដបង្ហាញថា លោក Jitsukawa មានផ្ទុកជាតិអាកុល ១៨៩មីលីក្រាមក្នុងមួយរយមីលីលីត្រឈាមនៅក្នុងខ្លួន ខណៈកម្រិតកំណត់អនុញ្ញាតត្រឹម ២០មីលីក្រាមប៉ុណ្ណោះ។

សញ្ញាប្រកាសអាសន្ន ត្រូវបានបន្លឺឡើងក្រោយបុគ្គលិកម្នាក់ធំក្លិនស្រាខ្លាំង និងបានទូរស័ព្ទទៅកាន់ប៉ូលិសដើម្បីធ្វើតេស្ដ។ លោក Jitsukawa និយាយថាខ្លួនបានផឹកស្រាចំនួនពីរដបមុនមួយយប់នៃថ្ងៃដែលត្រូវហោះហើរ។

ទោះយ៉ាងណាក៏ដោយ បន្ទាប់ពីការចាប់ខ្លួនលោក Jitsukawa ក្រុមហ៊ុនអាកាសចរណ៍ជប៉ុន បានធ្វើការសុំទោសចំពោះហេតុការណ៍នេះ ហើយបាននិយាយថា "សុវត្ថិភាពនៅតែជាអាទិភាពបំផុតរបស់យើង" ដោយបន្ថែមថាខ្លួននឹង "អនុវត្តសកម្មភាពបន្ទាន់ដើម្បីទប់ស្កាត់ការកើតឡើងដូចនេះនាពេលអនាគត៕