VAR នឹងធ្វើការផ្លាស់ប្ដូរកំហុសសំខាន់៤នៅ Premier League

2018-12-03 08:45:19
ចំនួនមតិ 0 | ចំនួនចែករំលែក 0

ចន្លោះមិនឃើញ

វីដេអូជំនួយដល់អាជ្ញាកណ្ដាល ឬហៅខ្លីថា VAR នឹងបង្ហាញវត្តមានជាលើកដំបូងនៅក្របខ័ណ្ឌកំពូល Premier League ចាប់ពីរដូវកាលក្រោយទៅ បន្ទាប់ពីទទួលជោគជ័យនៅ World Cup ប្រទេសរុស្ស៊ី។

ពាក់ព័ន្ធនឹងការដាក់ដំណើរការ VAR អតីតអាជ្ញាកណ្ដាលដ៏ល្បីរបស់អង់គ្លេស Howard Webb ដែលធ្លាប់កាត់ក្ដីវគ្គផ្ដាច់ព្រ័ត្រ World Cup ២០១០នៅអាហ្វ្រិកខាងត្បូងបានបង្ហាញទស្សនៈផ្ទាល់ខ្លួនថា VAR នឹងជួយអាជ្ញាកណ្ដាល Premier League លើការសម្រេចចិត្តសំខាន់៤៖

១. បាល់ចូលទី៖ VAR នឹងជួយពិនិត្យថាបាល់ចូលទីនោះ ចូលឬអត់, មានការបង្កកំហុស ឬក៏មាន Offside ដែរឬទេ...។

២. ប៉េណាល់ទី៖ អាជ្ញាកណ្ដាលអាចនឹងពិភាក្សាជាមួយ VAR ពីការផ្ដល់បាល់ពិន័យប៉េណាល់ទីក៏អត់ ពិសេសគឺការប្រើល្បិចរបស់កីឡាករ ការប៉ះដៃ និងការបង្កកំហុសក្នុងប្រអប់ ជាដើម...។

៣. កាតក្រហម៖ ការផ្ដល់កាតក្រហមគឺ ប៉ះពាល់ខ្លាំងដល់ទម្រង់លេងរបស់ក្រុមនីមួយៗលើទីលាន ព្រោះវានឹងធ្វើឲ្យបាត់បង់សមាជិក ឈានដល់ការប្រែប្រួលលទ្ធផល ដូច្នេះ VAR នឹងជួយអាជ្ញាកណ្ដាលមើលថាតើការពិន័យកាតក្រហមត្រឹមត្រូវឬអត់។

៤. កំហុសទូទៅ៖ ក្រៅពីចំណុចសំខាន់៣ខាងលើ ការសម្រេចចិត្តនានាលើទីលាន ដែលនាំឲ្យមានការតវ៉ាក៏អាចពឹងពាក់ VAR ផងដែរដូចជាបាល់ចេញ, បាល់បោះ, បាល់ជ្រុង, បាល់ពិន័យ Free kick, ការពិន័យកាតខុសកីឡាករជាដើម ល និងល៕

ប្រភព៖ Premier League ប្រែសម្រួល៖ វីរ័ត្ន