សុខ ចាន់មាន និងមិត្តរួមក្រុម ចាញ់ដៃគូក្នុងជើងឯកថ្នាក់ជាតិជាមួយលទ្ធផលមិនគួរឲ្យជឿ
- 2018-12-06 02:44:30
- ចំនួនមតិ 0 | ចំនួនចែករំលែក 0
សុខ ចាន់មាន និងមិត្តរួមក្រុម ចាញ់ដៃគូក្នុងជើងឯកថ្នាក់ជាតិជាមួយលទ្ធផលមិនគួរឲ្យជឿ
ចន្លោះមិនឃើញ
ក្រុមរបស់ម្ចាស់មេដាយមាសប៉េតង់ពិភពលោក សុខ ចាន់មាន បានប្រកួតចាញ់ក្រុមមកពីយោធភូមិភាគពិសេស១ ក្នុងលទ្ធផលដាច់តែម្ដង ១៣-២ ក្នុងការប្រកួតជ្រើសរើសជើងឯកថ្នាក់ជាតិឆ្នាំ២០១៨ដែលបញ្ចប់ទៅកាលពីម្សិលមិញនេះនៅពហុកីឡដ្ឋានជាតិ។
សុខ ចាន់មាន, សុខ ច័ន្ទម៉ុល, យឹង សោភ័ណ្ឌ និងកីឡាករអៀត សុផាត តំណាងឲ្យក្លឹបក្រសួងការពារជាតិ បានប្រកួតចាញ់ក្រុមកីឡាកររបស់ក្លឹប យោធភូមិភាគពិសេស១ ថោង ឈឿន, ហេង ស៊ូមាន, សៅ សុភារ៉ាន់ និងឈុន សុផាត នៅវគ្គផ្ដាច់ព្រ័ត្រលើវិញ្ញាសា ៣ទល់ ៣ បុរសកម្រិតក១។ លទ្ធផលបរាជ័យ ដាច់ខាងលើគឺពិតជាមិនគួរឲ្យជឿថា ម្ចាស់មេដាយពិភពលោកចាញ់ក្នុងលទ្ធផលដល់ថ្នាក់នេះ។ ទាក់ទងការចាញ់នេះសុខចាន់មាន ធ្លាប់បាននិយាយថា វាអាចមកពីការលេងមិនយល់ចិត្តគ្នា។
ក្រោយប្រកួតចប់ត្រូវបានគេរកឃើញជើងឯកផ្នែកបុរសកម្រិតក១វិញ្ញាសា៣ទល់៣ ជើងឯកបានទៅក្លឹបយោធភូមិភាគពិសេស១ លេង២បានទៅក្រសួងការពារជាតិ លេខ៣បានទៅក្លឹបអគ្គភស្តុភាហិរញ្ញវត្ថុក្រសួងការពារជាតិ និងលេខ៤បានទៅក្លឹបសេនារាសីហ៍។
ផ្នែកបុរសកម្រិតក២វិញ្ញាសា៣ទល់៣ ជើងឯកបានទៅក្រសួងមហាផ្ទៃ១ លេខ២បានទៅក្លឹបនាគរាជ២ លេខ ៣ បានទៅក្លឹបទីស្ដីការគណៈរដ្ឋមន្រ្តី១ និងលេខ៤បានទៅក្លឹបនាគរាជ១។
ផ្នែកនារីវិញ្ញាសា ៣ទល់ ៣ លេខ១បានទៅយោធភូមិភាគពិសេស លេខ ២ បានទៅក្លឹបក្រសួងមហាផ្ទៃ លេខ ៣ បានទៅក្លឹបទីស្ដីការគណៈរដ្ឋមន្រ្តី១ និងលេខ ៤ បានទៅមជ្ឈមណ្ឌល ខ.ភ.ម។
ព្រឹត្តិការណ៍នេះមានការប្រកួតតែលើបីវិញ្ញាសាខាងលើប៉ុណ្ណោះ ហើយមានកីឡាករចូលរួមសរុបចំនួន ១៩៥៕