អាមេរិកបង្អួតសាច់ដុំទាំងផ្លូវទឹក និងផ្លូវអាកាសជាថ្មី ផ្ញើសារព្រមានដល់រុស្ស៊ី

  • 2018-12-07 01:58:26
  • ចំនួនមតិ 0 | ចំនួនចែករំលែក 25

ចន្លោះមិនឃើញ

យោធា​អាមេរិក បាន​ឆ្លើយ​តប​នឹង​រុស្ស៊ី​នា​សប្ដាហ៍​នេះ​ដោយ​ដាក់​កង​ទ័ព​ទាំង​ផ្លូវ​ទឹក និង​ផ្លូវ​អាកាស​ជា​ថ្មី​ដោយ​ហៅ​ទង្វើ​របស់​រដ្ឋាភិបាល​ក្រុង​មូស្គូ​ថា មិន​ស្រប​ច្បាប់ និង​អស្ថិរភាព។

នៅ​ក្នុង​ប្រតិបត្តិការ​កងទ័ព​អាមេរិក​ប៉ុន្មាន​ថ្ងៃ​ចុង​ក្រោយ​នេះ យន្ដហោះ OC-135 បាន​ធ្វើ​ការ​ហោះហើរ​អង្កេត​ការណ៍​កាល​ពី​ថ្ងៃ​ព្រហស្បតិ៍​ដើម្បី​បង្ហាញ​ពី​ការ​ប្ដេជ្ញា​របស់​អាមេរិក​ចំពោះ​អ៊ុយក្រែន។ លើស​ពី​នេះ​ទៀត កង​ទ័ព​ជើង​ទឹក​អាមេរិក ក៏​បាន​រំកិល​នាវា​បាញ់​មីស៊ីល USS McCampbell ទៅ​ជិត​ឆ្នេរ​ជប៉ុន​ដើម្បី​ជា​ការ​រំខាន​ដល់​រុស្ស៊ី​នៅ​តំបន់​កំពុង​មាន​ជម្លោះ។

ជាមួយ​គ្នា​ដែរ អាមេរិក​ត្រូវ​បាន​គេ​រាយការណ៍​ថា​ចាប់​ផ្ដើម​ធ្វើ​ការ​រៀប​ចំ​សំខាន់​ៗ​ដើម្បី​រំកិល​នាវា​ប្រយុទ្ធ​ទៅ​កាន់​សមុទ្រ​ខ្មៅ​ឲ្យ​បាន​ឆាប់​រហ័ស​ដើម្បី​ឆ្លើយ​តប​នឹង​ការ​ដែល​រុស្ស៊ី​រឹប​អូស​នាវា​អ៊ុយក្រែន និង​ចាប់​ខ្លួន​មនុស្ស​កាល​ពី​សប្ដាហ៍​មុន។ យោង​តាម​អ្នក​នាំ​ពាក្យ​មន្ទីរ​បញ្ចកោណ​លោក Eric Pahon ឲ្យ​ដឹង​ថា "ទង្វើ​របស់​រុស្ស៊ី​ក្នុង​ការ​វាយ​ប្រហារ​នាវា​អ៊ុយក្រែន​នៅ​សមុទ្រ​ខ្មៅ គឺ​ជា​សកម្មភាព​បង្ក​ហេតុ និង​គំរាម​កំហែង​ដ៏​គ្រោះ​ថ្នាក់​បំផុត។"

យ៉ាង​ណា​មិញ មក​ទល់​ពេល​នេះ គេ​មិន​ទាន់​ឃើញ​ប្រតិកម្ម ឬ​ការ​ឆ្លើយ​តប​ណា​មួយ​ពី​រដ្ឋាភិបាល​រុស្ស៊ី​ជុំ​វិញ​សកម្មភាព​របស់​កងទ័ព​អាមេរិក​នៅ​ឡើយ​ទេ ខណៈ​ប្រធានាធិបតី​វ្លាឌីមៀរ ពូទីន​បន្ដ​រក្សា​ភាព​ស្ងៀម​ស្ងាត់​ក្រោយ​វាយ​ប្រហារ​នាវា​អ៊ុយក្រែន៕


ប្រភព៖ CNN   ប្រែសម្រួល ៖ រ័ត្ន