E-Sports អាស៊ីប្រជុំជាមួយ E-Sports អាស៊ាន ម្សិលមិញសម្រេចលើកត្តាសំខាន់៣
- 2018-12-09 04:59:53
- ចំនួនមតិ 0 | ចំនួនចែករំលែក 0
E-Sports អាស៊ីប្រជុំជាមួយ E-Sports អាស៊ាន ម្សិលមិញសម្រេចលើកត្តាសំខាន់៣
ចន្លោះមិនឃើញ
សហព័ន្ធកីឡាអេឡិចត្រូនិកកម្ពុជាបានចូលរួមជាមួយសហព័ន្ធកីឡាអេឡិចត្រូនិកអាស៊ីដែលមានសហព័ន្ធកីឡា E-Sports ជាតិពីប្រទេសផ្សេងៗនៅតំបន់អាស៊ានក៏បានចូលរួមដែរនៅទីក្រុងបាងកក ប្រទេសថៃកាលពីថ្ងៃទី៨ ខែធ្នូ ឆ្នាំ២០១៨។
លោក លន់ សាមឌី អគ្គលេខាធិការនៃសហព័ន្ធកីឡាអេឡិចត្រូនិកកម្ពុជាដែលបានចូលរួមប្រជុំបានឲ្យដឹងថា កិច្ចប្រជុំសម្រេចបានលទ្ធផល៣សំខាន់។ ទី១ការដាក់បញ្ចូលសហព័ន្ធកីឡាអេឡិចត្រូនិកកម្ពុជា (EFC) ចូលជាសមាជិករបស់សហព័ន្ធកីឡាអេឡិចត្រូនិកអាស៊ីដោយមានការជ្រោមជ្រែងពីសហព័ន្ធអាស៊ី ពីព្រោះទាល់តែចូលជាសមាជិកអាស៊ីទើបអាចចូលរួមប្រកួតកីឡាស៊ីហ្គេមបានដែលមានប្រភេទកីឡា E-Sport ដែរ។ សហព័ន្ធកីឡាអេឡិចត្រូនិកអាស៊ីក៏នឹងជួយដល់ការបណ្តុះបណ្តាលកីឡា E-Sports ផ្សេងៗដល់កម្ពុជា។
លោកបានបន្តថា ទី២ពាក់ព័ន្ធទៅនឹងការប្រកួតកីឡាស៊ីហ្គេមឆ្នាំ២០១៩ដែលមានប្រភេទកីឡា E-Sports ដែរ។ តាមការគ្រោងទុក វិញ្ញាសានឹងប្រកាសជាផ្លូវការនាថ្ងៃទី១៦ ខែធ្នូនេះ។ បន្ទាប់មកនឹងចេញគោលការណ៍ និងលក្ខន្តិកៈសម្រាប់ការប្រកួត។ ប៉ុន្តែមុនចេញគោលការណ៍ និងលក្ខន្តិកៈ សហព័ន្ធ E-Sports អាស៊ីនឹងសិក្សាស្វែងយល់អំពីស្ថានភាព E-Sports នៅអាស៊ី ហើយគ្រោងកោះប្រជុំម្តងទៀតដើម្បីលំអិតអំពីកិច្ចការ E-Sports នៅស៊ីហ្គេម។
កិច្ចប្រជុំនេះក៏បានសម្រេចកិច្ចការមួយទៀតគឺសហព័ន្ធ E-Sports អាស៊ីគ្រោងនឹងរៀបចំការប្រកួតកីឡាអេឡិចត្រូនិកកម្រិតសាកលវិទ្យាល័យនៅតំបន់អាស៊ាន (ASEAN E-Sports University Championship) ដើម្បីអភិវឌ្ឍ E-Sports នៅតំបន់អាស៊ាន។ ទោះបីជាយ៉ាងណានៅមិនទាន់លំអិតអំពីព្រឹត្តិការណ៍នេះនៅឡើយទេ។
កិច្ចប្រជុំដែលរៀបចំនៅទីក្រុងបាងកក ប្រទេសថៃម្សិលមិញត្រូវបានអញ្ជើញចូលរួមជាអធិបតីដោយលោក Sebastain Lau អគ្គលេខាធិការនៃសហព័ន្ធកីឡាអេឡិចត្រូនិកអាស៊ី និងតំណាងសហព័ន្ធ E-Sports នៅតំបន់អាស៊ាន៕