កម្ពុជាធ្វើជាម្ចាស់ផ្ទះការប្រកួតសម្រស់បវរកញ្ញាផែនដីសម្រាប់ឆ្នាំ២០១៩ ខាងមុខនេះ

2018-12-10 07:36:23
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះក្រុមហ៊ុន C-light បានរៀបចំសន្និសីទកាសែតស្ដីអំពីការប្រកួតសម្រស់បវរកញ្ញាផែនដីអន្តរជាតិសម្រាប់ឆ្នាំ២០១៩ (Miss Planet International ) នៅផ្សារទំនើបអ៊ីអន២ សែនសុខ ដោយកម្ពុជាធ្វើជាម្ចាស់ផ្ទះ។

អ្នកនាង Halley Amin ពាក់អាវក្រហមឈរកណ្ដាល

ថ្លែងក្នុងពិធីសន្និសីទការសែតអ្នកនាង Halley Amin អគ្គនាយកប្រតិបត្តិការបវរកញ្ញាផែនដីអន្តរជាតិ ឲ្យដឹងថា ការប្រកួត Miss Planet International 2019 ដែលកម្ពុជាធ្វើជាម្ចាស់ផ្ទះនឹងត្រូវធ្វើឡើងចាប់ពីថ្ងៃទី ១៤ ខែ កុម្ភៈ ឆ្នាំ២០១៩ ដល់ថ្ងៃទី ២៣ ខែកុម្ភៈ ឆ្នាំ២០១៩ ដោយមានបវរកញ្ញាមកពីបណ្ដាប្រទេសជុំវិញពិភពលោកជាង៦០ ប្រទេសចូលរួមប្រកួត។

បវរកញ្ញា ឡាវ( ឆ្វេង ) និងបវរកញ្ញា ថៃ(ស្ដាំ)

មូលហេតុដែលកម្ពុជាធ្វើជាម្ចាស់ផ្ទះលើកដំបូងក្នុងការប្រកួតកម្មវិធីខាងលើដោយសារតែ Miss Planet International បង្កើតឡើងដោយខ្មែរតែម្ដង។ ដូច្នេះក្នុងឆ្នាំនេះកម្ពុជានឹងនាំពិភពលោកឲ្យមកស្គាល់កម្ពុជាវិញម្ដង។

“ការរៀបចំ Miss Planet International នៅកម្ពុជានេះខ្ញុំសង្ឃឹមថានឹងជោគជ័យ ហើយកម្ពុជាយើងកាន់តែល្បីខ្លាំងជាងហ្នឹងទៀតជាមួយវិស័យទេសចរណ៍ វប្បធម៌ប្រពៃណីទំនៀមទម្លាប់សាសនា ជាពិសេសគឺបានបង្ហាញសម្រស់ដ៏ស្រស់ផូរផង់របស់នារីខ្មែរនៅលើឆាកអន្តរជាតិ"។

ក្នុងពិធីសន្និសីទកាសែតខាងលើមានការចូលរួមពីតារាថៃអ្នកនាង ផេនខេក ម្ចាស់បទខាំផែង និង Miss Planet International ថៃ និងឡាវមកចូលរួមផងដែរដើម្បីមកដើរម៉ូដ និងបកស្រាយចម្រៀងជូនហ្វេនៗកម្ពុជានាល្ងាចម៉ោង៥នេះនៅផ្សារទំនើបអ៊ីអន២ សែនសុខ៕

អត្ថបទ៖ ឆុង ស៊ីណាន