រកឃើញកំពូលអ្នកប្រណាំងលើភ្នំកម្ពុជា ២០១៨ មានទាំងប្រុសស្រី ក្មេងចាស់

2018-12-12 05:03:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រណាំងកង់លើភ្នំកម្ពុជា ដែលមានទាំងខ្មែរ និងបរទេសទេសចូលរួម បានរកឃើញកំពូលជើងខ្លាំងទាំង ១២ រូបហើយបន្ទាប់ពីការប្រឹងប្រែងដ៏ស្វិតស្វាញអស់ជាច្រើនខែ គិតចាប់តាំងពីខែ មេសា រហូតដល់ ថ្ងៃទី ៩ ធ្នូ ២០១៨ នៅលើទីលានទាំង ៥ នៃការប្រណាំងកង់ភ្នំកម្ពុជាស៊េរីឆ្នាំ ២០១៨ ភេសជ្ជៈប៉ូវកម្លាំង Wurkz នៅទីតាំងខុសៗគ្នា។

៥ ទីលាននេះ មានដូចជា ទីលានប្រណាំងកង់ភ្នំព្រែកលាភ ភ្នំឧទ្យានជាតិកែប ភ្នំជាលខេត្តកំពង់ស្ពឺ ភ្នំប្រសិទ្ធិខេត្តកណ្តាល ហើយមកផ្តាច់ព្រាត់នៅភ្នំឧទ្យានជាតិគិរីរម្យកំពង់ស្ពឺ។ ឯអ្នកឈ្នះទាំងអស់រួមមាន៖

ឯកឧត្ដម វង្ស ខាន់ពៅ អគ្គលេខាធិការសហព័ន្ធទោចក្រយាន្តកម្ពុជា បានបញ្ជាក់ថា៖ "ការប្រណាំងកង់ភ្នំកម្ពុជាស៊េរីឆ្នាំ ២០១៨ ភេសជ្ជៈប៉ូវកម្លាំង Wurkz នេះ ទទូលបានលទ្ធផលល្អប្រសើរច្រើន ទាំងចំនួនកីឡាករចូលរួម និងការរៀបចំផ្លូវសម្រាប់វគ្គប្រកួតនីមួយៗ។ តួយ៉ាងដូចជាទីតាំងផ្លូវថ្មី នៅភ្នំឧទ្យានជាតិកែប និង ភ្នំឧទ្យានជាតិគិរីរម្យជាដើម ដែលកាន់តែមានលក្ខណៈស្រដៀងទៅនឹងស្តង់ដារការប្រណាំងលំដាប់ស៊ីហ្គេម"។

ចំណុចមួយទៀតដែលលោកកត់សម្គាល់នោះគឺ សមត្ថភាពរបស់កីឡាករជម្រើសជាតិកម្ពុជា ៣ រូបមានការរីកចម្រើនខ្លាំងនៅក្នុងការប្រណាំងទាំង ៥ ជុំនេះ ទាំងបច្ចេកទេស និងល្បឿននៃការជិះ ក្នុងនោះរួមមានដូចជាកីឡាករ លោក យឿន ភីយុទ្ធ លោក សាំង សីហា និង លោក គីម ចន្ធូ។

លោកសង្ឃឹម ការរីកចម្រើននេះនឹងអាចផ្តល់ឱកាសឲ្យកីឡាករទាំង ៣ រូបនេះកាន់តែច្រើនថែមទៀតក្នុងការយកពានជយលាភីក្នុងការប្រកួតនៅក្រៅប្រទេសនាពេលឆាប់ៗខាងមុខនេះ។

រីឯលោក លាង ពៅ (ភីធើរ) អគ្គនាយកក្រុមហ៊ុន ខ្មែរ ប៊ែរវើរីជីស បានលើកឡើងដែរថា៖ "យើងពិតជាមានមោទនភាព និងសេចក្ដីសោមនស្សរីករាយណាស់បានចូលរួមជាមួយនឹងភាពជោគជ័យនៃដំណើរការរៀបចំការប្រណាំងកង់ភ្នំកម្ពុជា ស៊េរីឆ្នាំ ២០១៨ ដែលប្រព្រឹត្តទៅអស់ជិត ៨ ខែ នេះ។ យើងពេញចិត្តនឹងការរៀបចំរបស់គណៈកម្មាធិការ និងការចូលរួមរបស់កីឡាករ កីឡាការនីទាំងក្នុងស្រុក និងកីឡាករអន្តរជាតិ ហើយយើងនឹងបន្តជ្រោមជ្រែងអោយការប្រណាំងនេះកាន់តែមានលក្ខណៈអធិកអធមបន្ថែមទៀតនូវឆ្នាំក្រោយ ដើម្បីបង្កនូវភាពសប្បាយរីករាយសម្រាប់អ្នកអ្នកចូលរួម ហើយទាក់ទាញមិត្តភ័ក្ដិនិងក្រុមគ្រួសាររបស់កីឡាករអោយចូលរួមសប្បាយរីករាយជាមួយកម្មវិធីនេះ"៕

អត្ថបទ៖ សុខណា

ពាក្យទាក់ទង