គន្លឹះ ៧ ជួយឲ្យរូបថតបែប Landscape ចេញពីទូរសព្ទអ្នក ស្អាតប្លែកពីគេ!

2018-12-25 06:25:34
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននឹងចូលដល់ប្រធានបទ របៀបថតរូបបែប Landscape អ្នកគួរដឹងពីប្រភេទនៃរូបភាពនេះសិន។ តាមរយៈការស្រាវជ្រាវ រូបថតបែបទេសភាព ឬ រូប Landscape មានយ៉ាងតិច ៥ ប្រភេទធំៗ និងបែកចែកផ្នែកតូចៗច្រើនទៀត ទៅតាមពេលវេលា និងទីកន្លែង។ ប៉ុន្តែក្រុមការងារសុំមិនចូលឲ្យជ្រៅដល់ប្រភេទនោះពេកទេ គ្រាន់តែចែករំលែកគន្លឹះថតរូបបែប Landscape មួយតាមទូរសព្ទ ដែលគេហៅថា (Nature) ការថតរូបធម្មជាតិមានព្រៃឈើ មានភ្នំ មានទឹក ធ្វើយ៉ាងណាឲ្យរូបនោះមានភាពប្រសើរ អាចមើលទៅទាក់ភ្នែក។

១) កាន់ទូរសព្ទផ្តេក

អ្នកប្រាកដជាដឹងហើយថា រូបបែបទេសភាព ដែលយើងឃើញនឹងភ្នែកមានទម្រង់ផ្ដេកវែង ដូចនេះ បើអ្នកកាន់ទូរសព្ទ ហើយចង់ថតយករូបបែបនោះ ជំហានដំបូងគឺ បើកកាមេរ៉ាទូរសព្ទរួចដាក់ផ្ដេក ហើយថត នោះអ្នកនឹងមើលឃើញពីភាពទាក់ទាញរបស់វា។

២) មុននឹងចុចថត ត្រូវបើក HDR Mode

នៅលើកាមេរ៉ាទូរសព្ទទំនើបៗពេលឥឡូវនេះ មានមុខងារ HDR សឹងតែគ្រប់ម៉ូឌែល។ មុខងារនេះជំនួយដល់ពន្លឺនៃរូប ឲ្យកាន់តែច្បាស់ត្រជាក់ភ្នែក។

៣) រើសម៉ោង ដែលអ្នកចូលចិត្តថត

ពេល ២៤ ម៉ោងក្នុងមួយថ្ងៃ ធម្មជាតិក៏ប្រែប្រួលពណ៌ទៅតាមពន្លឺព្រះអាទិត្យដែលចាំងមកផែនដីដែរ ដូចនេះហើយ បើអ្នកចូលចិត្តថតរូបបែបទេសភាពពេលព្រឹក សូមងើបពីព្រលឹម បើអ្នកចូលចិត្តថតពេលថ្ងៃត្រង់ មានពន្លឺចាំងត្រង់ស្អាត ចូរថតនៅម៉ោង ១២ ឬ១ រសៀល បើចូលចិត្តថតពេលថ្ងៃរៀបលិច សូមរង់ចាំឲ្យព្រះអាទិត្យអស្ដង្គត នោះអ្នកនឹងយកបានរូប Lanscape ស្អាតប្លែក។

៤) កុំភ្លេចថតរូប ឲ្យមានអត្ថន័យបង្កប់ក្នុងរូប

ចំណុចនេះ សំដៅដល់រូបថតដែលមានជីវិត។ ឧទាហរណ៍ងាយៗ ដូចជា រូបព្រៃឈើបៃតងខ្ចី មានទឹកនៅខាងក្រោមពណ៌ខៀវស្រងាត់ មានភ្នំនៅខាងក្រោយ ឬភ្នំព័ទ្ធសងខាងជាដើម។

៥) ឈរថត កុំឲ្យបញ្ច្រាសពន្លឺព្រះអាទិត្យ

ជាទូទៅ កាមេរ៉ាទូរសព្ទមិនខ្លាំងដូចកាមេរ៉ា DSLR ដែលមានដាក់ឡេនធំនោះទេ។ គឺថា បើអ្នកថតបញ្ច្រាសថ្ងៃ នោះ Subject ឬរូបដែលអ្នកចង់បានគឺ ងងឹតមើលអត់ឃើញ។ ដូចនេះ សូមរកទីតាំងណា ដែលអាចថតបានបណ្ដោយថ្ងៃ ទើបជាការត្រឹមត្រូវ។

៦) អនុវត្តរូបមន្តល្បី rule of thirds

អ្នកថតរូបយូរឆ្នាំ គេអាចមិនខ្វល់ពីរូបមន្តនេះទេ ប៉ុន្តែសម្រាប់អ្នកទើបចាប់ផ្តើម ហើយមានតែកាមេរ៉ាទូរសព្ទចង់ថតរូបបែបទេសភាពដែរ គួរតែអនុវត្តរូបមន្តល្បី rule of thirds នេះឲ្យបានជាប្រចាំ។ ចំពោះរបៀបថត អ្នកត្រូវរក Subject ឬរបស់ដែលអ្នកចង់បង្ហាញគេ ដាក់ឲ្យនៅចំចំណុចប្រសព្វនៃបន្ទាត់ Grid នៅខាងឆ្វេងក៏បាន ស្ដាំក៏បាន។

៧) ថតយករូប បែបបញ្ឈរទ្រវែង

ចំណុចទី១ ឲ្យអ្នកដាក់កាមេរ៉ាផ្ដេក តែចំណុចចុងក្រោយនេះ គឺឲ្យអ្នកដាក់កាមេរ៉ាបញ្ឈរវិញ។ ចំពោះមូលហេតុគឺ រូបបែបទេសភាព មានរសអាម្មណ៍ផ្សេងគ្នា។ ឧទាហរណ៍ថា បើអ្នកនៅខាងក្រោមដើមឈើ ហើយឃើញស្លឹកឈើពណ៌បៃតងស្រងាត់ ចង់ថតឲ្យស្អាត ដូចនេះ គួរថតបញ្ឈរឲ្យឃើញដើមឈើខ្ពស់ មានស្លឹកឈើគ្របជាដើម។ មួយវិញទៀត បើអ្នកនៅខាងក្រោមទឹកជ្រោះ ចង់ថតឲ្យឃើញទឹកជ្រោះខ្ពស់កម្រិតណា អ្នកក៏គួរតែថតបញ្ឈរដែរ៕