មូលនិធិ ក.ស.ទ ប្រមូលថវិកាបាន ៩ លានដុល្លារពីប្រតិបត្តិករទូរគមនាគមន៍
- 2018-12-27 05:02:02
- ចំនួនមតិ 0 | ចំនួនចែករំលែក 0
មូលនិធិ ក.ស.ទ ប្រមូលថវិកាបាន ៩ លានដុល្លារពីប្រតិបត្តិករទូរគមនាគមន៍
ចន្លោះមិនឃើញ
ក្រុមប្រឹក្សាភិបាលមូលនិធិកាតព្វកិច្ចសេវាសកលទូរគមនាគមន៍ (ក.ម.ក.ស.ទ.) ទើបបានរៀបចំសន្និសីទសារព័ត៌មានបង្ហាញពីវឌ្ឍនភាពការងាររបស់មូលនិធិកាតព្វកិច្ចសេវាសកល-ទូរគមនាគមន៍ (មូលនិធិ ក.ស.ទ.) នៅទីស្តីការក្រសួងប្រៃសណីយ៍និងទូរគមនាគមន៍។
ក្នុងឱកាសសន្និសីទសារព័ត៌មាន ឯកឧត្តម កាន ច័ន្ទមេត្តា រដ្ឋលេខាធិការ និងជាអនុប្រធានទីមួយ (ក.ម.ក.ស.ទ.) បានបង្ហាញលទ្ធផលនៃការអនុវត្តច្បាប់ស្តីពីទូរគមនាគមន៍ដែលបានបង្កើតមូលនិធិ ក.ស.ទ. និងការបង្កើតក្រុមប្រឹក្សាភិបាលមូលនិធិកាតព្វកិច្ចសេវាសកល-ទូរគមនាគមន៍។
លោកបញ្ជាក់ថា ក្នុងឆ្នាំ២០១៧ មានប្រតិបត្តិករទូរគមនាគមន៍ចំនួន ៨៧% (២៧/៣១ ក្រុមហ៊ុន) បានចូលរួមអនុវត្តកាតព្វកិច្ចបង់វិភាគទានចូលមូលនិធិ ក.ស.ទ. និងប្រមូលបានមូលនិធិសរុប ៧០ % ស្មើនឹងទឹកប្រាក់ប្រមាណ ៩ លានដុល្លារអាមេរិក។
ឯកឧត្តមបានបញ្ជាក់ដែរថា ក្នុងឆ្នាំ២០១៧ នេះ ក.ម.ក.ស.ទ. បានអនុម័តគម្រោងពង្រីកវិសាលភាពគ្របដណ្តប់សេវាទូរសព្ទចល័តជំនាន់ទី៣/៤ (3G/4G) សរុបចំនួន ១៣១ ស្ថានីយ ដោយអនុញ្ញាតឱ្យធ្វើការសាងសង់ស្ថានីយថ្មីចំនួន៤១ ស្ថានីយ និងការធ្វើ Upgrade និង Reconfiguration ទៅលើស្ថានីយដែលមានស្រាប់ចំនួន៩០ ស្ថានីយ។
១. វឌ្ឍនភាពចុងក្រោយចំពោះគម្រោងសាងសង់ថ្មី៖
-គម្រោង/ស្ថានីយបានសាងសង់រួចរាល់មានចំនួន ៧ ស្ថានីយ នាខែវិច្ឆិកា ឆ្នាំ២០១៨
-គម្រោង/ស្ថានីយដែលកំពុងសាងសង់ មានចំនួន ១៩ ស្ថានីយ និងត្រូវបញ្ចប់រួចរាល់នៅយ៉ាងយូរត្រឹមខែកុម្ភៈ ឆ្នាំ២០១៩ និងគម្រោង/ស្ថានីយដែលយឺតយ៉ាងក្នុងការសាងសង់ដោយសារទឹកជំនន់និងកំពុងដោះស្រាយទីតាំងសាងសង់ មានចំនួន១៥ ស្ថានីយ ដែលរំពឹងថានឹងត្រូវបានដោះស្រាយរួចរាល់ឆាប់ៗ យ៉ាងយូរត្រឹមខែមេសា ឆ្នាំ២០១៩។
២. វឌ្ឍនភាពចុងក្រោយចំពោះគម្រោងធ្វើការ Upgrade និង Reconfiguration ទៅលើស្ថានីយដែលមានស្រាប់៖
-ចំនួន៨៣ ស្ថានីយ ត្រូវបានចប់ជាស្ថាពរ នាខែវិច្ឆិកា ឆ្នាំ២០១៨
-ចំនួន៧ ស្ថានីយ ត្រូវរំពឹងថានឹងត្រូវបញ្ចប់ត្រឹមខែមករា ឆ្នាំ២០១៩។
ឯកឧត្តមបានលើកឡើងដល់ប្រតិបត្តិការទូរគមនាគមន៍ ដែលបានចូលរួមបង់វិភាគទាននិងសហការក្នុងការអនុវត្តសកម្មភាពការងាររបស់មូលនិធិកាតព្វកិច្ចសេវាសកលទូរគមនាគមន៍។ ពេលនោះ លោកក៏បានក្រើនរំលឹកដល់ប្រតិបត្តិករទូរគមនាគមន៍មួយចំនួនតូច ដែលមិនទាន់បានបំពេញកាតព្វកិច្ចបង់វិភាគទានមូលនិធិ ក.ស.ទ. ឆ្នាំ២០១៧ រួសរាន់បង់វិភាគទានមុននឹងក្រុមប្រឹក្សាមូលនិធិ ក.ស.ទ. ចាត់វិធានការបន្ទាប់។
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
