ក្រុមជើងឯកឆ្នាំចាស់មណ្ឌលព្រះសីហនុញញើតក្រុមខ្លាំង២នេះជាងគេ
- 2019-01-05 03:30:00
- ចំនួនមតិ 0 | ចំនួនចែករំលែក 0
ក្រុមជើងឯកឆ្នាំចាស់មណ្ឌលព្រះសីហនុញញើតក្រុមខ្លាំង២នេះជាងគេ
ចន្លោះមិនឃើញ
ក្រុមជើងឯកឆ្នាំចាស់នៃមណ្ឌលខេត្តព្រះសីហនុក្នុងព្រឹត្តិការណ៍កំពូលបាល់ទាត់ធំបំផុត Tiger Street Football Festival គឺ Hurricane FC A បានសម្តែងការបារម្ភខ្លះៗចំពោះក្រុមមួយចំនួនដែលចូលរួមប្រកួតក្នុងព្រឹត្តិការណ៍ឆ្នាំ២០១៩នេះ។
ព្រឹត្តិការណ៍ប្រចាំឆ្នាំ២០១៩នេះបើកឆាកមុនគេគឺមណ្ឌលខេត្តព្រះសីហនុដែលត្រូវពាក់មុខយក្សដាក់គ្នានៅថ្ងៃសៅរ៍ អាទិត្យ ទី៥ ៦ ខែមករានេះ។ កីឡាករ អន រីណារង្សី តំណាងក្រុម Hurricane FC A ដែលត្រូវការពារតំណែងជើងឯកឆ្នាំចាស់របស់ខ្លួនបាននិយាយថា ក្រុមរបស់ពួកគេបានត្រៀមខ្លួនរួចរាល់អស់ហើយដើម្បីត្រៀមខ្លួនការពារតំណែងជើងឯកឆ្នាំចាស់។ អ្វីដែលជាការប្តេជ្ញាគឺការពារជើងឯកឲ្យបានសម្រេចដើម្បីបានឱកាសឡើងទៅភ្នំពេញដូចឆ្នាំ២០១៨កន្លងទៅ។
រីណារង្សីបញ្ជាក់ថា ចាប់តាំងពីបានក្លាយជាជើងឯកប្រចាំមណ្ឌលព្រះសីហនុឆ្នាំ២០១៨មក ពួកគេមិនដែលនៅទំនេរឡើយពោលគឺលេងបាល់ជារៀងរាល់សប្ដាហ៍ដើម្បីបង្កើនកម្រិតគុណភាពឲ្យកាន់តែល្អ ពីព្រោះដឹងថា ឆ្នាំ២០១៩នេះត្រូវលេងបន្តទៀត។ ជាពិសេសលេងការពារតំណែងជើងឯកឆ្នាំចាស់។
តំណាងក្រុមនេះបានឲ្យដឹងថា ក្រុមរបស់ខ្លួនសម្លឹងឃើញក្រុមបីបួនដែលជាក្តីបារម្ភឬជាឧបសគ្គរបស់ពួកគេក្នុងការឈានឆ្ពោះទៅការពារឲ្យបានជោគជ័យ។ ក្រុមដែលបារម្ភជាងគេគឺ យុវជនកំពងផែស្វយ័តព្រះសីហនុ A និង ក្រុមស្នងការខេត្តព្រះសីហនុ A។ ថ្វីបើក្រុមរបស់ខ្លួនធ្លាប់ឈ្នះក្រុមខ្លាំងទាំងពីរនេះក៏ដោយ ប៉ុន្តែពួកគេនៅតែខ្លាចរអា ពីព្រោះរាល់ពេលជួបគ្នាម្តងៗតឹងតែងខ្លាំង។
កីឡាករ អន រីណារង្សី បង្ហាញអារម្មណ៍ថា រឿងបានកៅអីឡើងទៅជុំផ្តាច់ព្រ័ត្រជាប្រការដ៏រំភើបរីករាយ ប៉ុន្តែកាន់តែពិសេសទៀតនោះគឺបានជួបផ្ទាល់នឹងអតីតកំពូលតារាបាល់ទាត់លំដាប់ពិភពលោក ដែលមានកេរ្តិ៍ឈ្មោះល្បីល្បាញខ្លាំង និងជាសំណព្វចិត្តរបស់យុវជនរាប់សែននាក់ទូទាំងពិភពលោកជាយូរមកហើយ។
សូមបញ្ជាក់ថា ក្រុមស្នងការខេត្តព្រះសីហនុជាជើងឯក Tiger Street Football Festival កាលពីឆ្នាំ២០១៧ប្រចាំមណ្ឌលខេត្តព្រះសីហនុ៕