វីវរហើយ! UEFA បញ្ជាក់ថា Man City អាចត្រូវដកចេញពីការប្រកួត Champions League

2019-01-05 08:06:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានស៊ើបអង្កេតផ្នែកហិរញ្ញវត្ថុរបស់ UEFA បានបញ្ជាក់ថាម្ចាស់ជើងឯក Premier League អាចត្រូវបានដកចេញពីការប្រកួតក្របខ័ណ្ឌ Champions League បន្ទាប់ពីរឿងអាស្រូវការប្រើប្រាស់ហិរញ្ញវត្ថុរបស់ក្លឹប។ នេះបើតាមទីភ្នាក់ងារព័ត៌មានរុស្ស៊ី RT បានចុះផ្សាយកាលពីថ្ងៃសុក្រ។

Yves Leterme ប្រធានស៊ើបអង្កេតផ្នែកហិរញ្ញវត្ថុរបស់ UEFA បានបញ្ជាក់ថាក្រុមរបស់ Pep Guardiola អាចប្រឈមនឹងការដាក់ទណ្ឌកម្មធ្ងន់ធ្ងរប្រសិនបើរកឃើញថា Man City ពិតជាបានរំលោភបញ្ញត្តិស្តីពី ការប្រកួតប្រជែងហិរញ្ញវត្ថុដោយយុត្តិធម៌ (Financial Fair Play ហៅកាត់ថា FFP)

ការចោទប្រកាន់នេះត្រូវបានធ្វើឡើង បន្ទាប់ពីមហាសេដ្ឋីប្រទេសអារ៉ាប់រួម Sheikh Mansour ម្ចាស់ក្លឹប Man City បានជះលុយ ៦០ លានផោន (៧៥,៨ លានដុល្លារ) លើការចំណាយរបស់ក្លឹប ហើយបន្លំថាជាលុយបានមកពី sponsors (ការផ្សាយពាណិជ្ជកម្ម)។

បញ្ញត្តិ ស្តីពី ការប្រកួតប្រជែងហិរញ្ញវត្ថុដោយយុត្តិធម៌ (Financial Fair Play) របស់ UEFA ដែលបានអនុវត្តកាលពី ឆ្នាំ ២០១២ ចែងថា "ក្លឹបអាចចំណាយមិនលើសពី ៣០លានអឺរ៉ូ នៃចំណូលដែលក្លឹបរកបាន សម្រាប់រយៈពេល៣ឆ្នាំ" ឬមិនឲ្យចំណាយលើសពី១០លានអឺរ៉ូ ធៀបនឹងចំណូលក្នុង១ឆ្នាំៗ។

Man City បាននាំយកខ្សែបម្រើ Riyad Mahrez របស់ក្លិប Leicester City កាលពីរដូវក្តៅមុនក្នុងតម្លៃ ៧៥,៨ លានដុល្លារ។

Man City បាននាំយកខ្សែបម្រើ Riyad Mahrez របស់ក្លិប Leicester City កាលពីរដូវក្តៅមុនក្នុងតម្លៃ ៧៥,៨ លានដុល្លារ

ដោយឡែក កាលពីឆ្នាំ២០១៤ UEFA បានចោទប្រកាន់ Man City ថាបានល្មើសច្បាប់ FFP ដោយបានចាយ ២១១ លានដុល្លារ ជាការចំណាយលើសខ្ទង់ចំណូល។ ជាលទ្ធផល ក្រុមមេឃខៀវត្រូវបាន UEFA ពិន័យ ២២,៧ លានដុល្លារ។ ប្រភពខាងលើបន្ត។

UEFA ក៏ធ្លាប់បានបើកការស៊ើបអង្កេតលើក្លឹប PSG កាលពីខែកញ្ញា ឆ្នាំ២០១៧ ដោយចោទប្រកាន់ថាបានល្មើសច្បាប់ FFP ព្រោះ គ្រាន់តែចំណាយលើការទិញ Neymar និង Mbappe ជិតស្មើចំណូលដែលក្លឹបខំរកពេញមួយឆ្នាំ ហើយ UEFA អាចនឹងបង្ខំ PSG លក់ Mbappe វិញ។ តែផ្ទុយទៅវិញ មកទល់នឹងពេលនេះ Mbappe នៅតែបន្តលេងឲ្យ PSG ហើយបានក្លាយទៅជាកីឡាករដែលមានតម្លៃខ្លួនថ្លៃបំផុតលំដាប់ទី២ (២៤៤,៩ លានដុល្លារ) របស់ពិភពលោកនាពេលបច្ចុប្បន្ន៕

ប្រភព៖ RT ប្រែសម្រួល៖ សុខ លាងហ៊ត