ជាពិធីការនីយូរឆ្នាំ វីតវីត បង្ហើបចង់បន្ថែមជំនាញថ្មីតែបារម្ភរឿងមួយទៅវិញ
- 2019-01-14 08:20:00
- ចំនួនមតិ 0 | ចំនួនចែករំលែក 0
ជាពិធីការនីយូរឆ្នាំ វីតវីត បង្ហើបចង់បន្ថែមជំនាញថ្មីតែបារម្ភរឿងមួយទៅវិញ
ចន្លោះមិនឃើញ
កញ្ញា វីតវីត ធ្លាប់តែបង្ហាញខ្លួននៅមុខទស្សនិកជនក្នុងនាមជាពិធីការីនី និងតារាបង្ហាញម៉ូដ ដោយមិនធ្លាប់សម្ដែងភាពយន្តម្ដងណាឡើយ។ ប្រឡូកក្នុងសិល្បៈច្រើនឆ្នាំមកនេះ តារាស្រីរាងខ្ពស់ស្រលះ រូបនេះ ស្រាប់តែបង្ហើបឲ្យដឹងថា ខ្លួនក៏ស្រលាញ់ និងមានកូនចិត្តចង់សម្ដែងភាពយន្តដែរ។
កូនទី២ ក្នុងចំណោម៣នាក់ បន្តថា ទោះជាខ្លួនមិនធ្លាប់មានបទពិសោធន៍លើការសម្ដែងក៏ពិតមែន តែបើផលិតករចាប់អារម្មណ៍ ប្រហែលជារូបនាងអាចពិចារណា។ អ្នកមានស្រុកកំណើតនៅទីក្រុងភ្នំពេញ ឲ្យដឹងថា តួមានចរិតបែបណា ក៏ខ្លួនអាចសម្ដែងបានទាំងអស់ មិនថា សុភាព ឡិកឡក់ កាច ពិសពុល នោះទេ ប៉ុន្តែវីតវីត ចាប់អារម្មណ៍ខ្លាំងលើរឿងបុរាណច្រើនជាង។
យ៉ាងណា ស្រីស្អាតរូបនេះ នៅបារម្ភរឿងមួយផងដែរ ព្រោះជាធម្មតា សុខភាពរបស់ខ្លួនមិនសូវល្អនោះទេ ហើយឃើញរៀមច្បងថតភាពយន្តភាគច្រើន ហត់ខ្លាំង។ ដូច្នេះខ្លួនខ្លាចស៊ូមិនរួច តែបើនិយាយពីចិត្តវិញ ស្រលាញ់ខាងសម្ដែង។ មួយរយៈនេះ ការងារសិល្បៈរបស់ វីតវីត មមាញឹកគួរសម ដោយទទួលការងារខាងក្រៅច្រើនជាងនៅតាមទូរទស្សន៍ ។
ដោយសារតែរវល់ច្រើន ស្រីស្អាតកម្ពស់ ១៦៥ សង់ទីម៉ែត្រ បញ្ជាក់ផងដែរថា ពេលនេះខ្លួនមិនទាន់មានម្ចាស់ចិត្តនៅឡើយទេ ប៉ុន្តែរូបនាងក៏មិនខ្វល់ខ្វាយពីបញ្ហានេះដែរ ព្រោះនាងចង់សន្សំប្រាក់ឲ្យបានច្រើន និងមានពេលវេលាដើរលេងឲ្យសប្បាយចិត្តសិន៕