ច្បាស់ការហើយ រិទ្ធ ប្រុសពៅ នឹងចូលផលិតកម្មថោនឆាប់ៗនេះ

2019-01-16 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទស្សនិកជនប្រាកដជាធ្លាប់ដឹងហើយថា រិទ្ធ ប្រុសពៅ ជាតារាចម្រៀងមានឈ្មោះបោះសំឡេងម្នាក់ព្រមទាំងអ្នកជំនាញវិស័យខាងកុនផងដែរនោះ ពេលនេះរកបានទ្រនំហើយគឺផលិតកម្មថោន។ នេះបើតាមម្ចាស់បទ "មាននឹកបងទេអូន" បញ្ជាក់មកកាន់ Sabay ផ្ទាល់តែម្ដងថាខ្លួនពិតជាត្រៀមចូលផលិតកម្មថោន ពិតប្រាកដមែន។

តារារូបនេះបញ្ជាក់ទៀតថា ខ្លួននឹងចាប់ផ្ដើមការងារនៅផលិតកម្មថ្មីនេះចាប់ពីខែមិនាឆ្នាំ ២០១៩ ដោយសារខ្លួនត្រូវការពេលសម្រាកខ្លះៗ មុននឹងបញ្ចេញបទចម្រៀងថ្មីៗ។ ដោយសារតែខ្លួនជាតារាមានជំនាញសឹងតែគ្រប់មុខផងនោះ រិទ្ធ នឹងចាប់ផ្ដើមធ្វើការនៅផលិតកម្មថ្មី ក្នុងមុខងារដល់ទៅ៣ឯណោះ គឺជាអ្នកចម្រៀង អ្នកនិពន្ធបទចម្រៀង ព្រមទាំងអ្នកដឹកនាំវីដេអូចម្រៀង។

ចំពោះរឿងរ៉ាវផ្សេងៗពាក់ព័ន្ធនឹងគម្រោងថ្មីៗ តារារូបនេះសុំមិនទាន់បញ្ចេញសិន ដោយទុកឲ្យអ្នកគាំទ្រលោករងចាំមើលទាំងអស់គ្នា ថាលោកនឹងមានរបស់អ្វីថ្មីបង្ហាញនៅផលិតកម្មថោន៕

អត្ថបទ៖ ធារ៉ូ