ច្បាស់ការណ៍! យឹម តាស្រង់ បញ្ជាក់មូលហេតុពិតរឿងដើរចេញពីថោនទាំងស្ងាត់ៗ

2019-01-17 02:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណឹងល្ហិចល្ហៀងពីការចាកចេញរបស់អ្នកនិពន្ធទំនុកច្រៀងល្បីឈ្មោះប្រចាំផលិតកម្មថោន គឺលោក យឹម តាស្រង់ ត្រូវបានម្ចាស់សាម៉ីខ្លួនទទួលស្គាល់ថា ជាការពិត។ លោកបានប្រាប់ថា បានដើរចេញពីទ្រនំយូរឆ្នាំមួយនេះដោយស្ងាត់ៗ អស់ពេលជាង៤-៥ ខែមកហើយ។

សម្រាប់មូលហេតុវិញ មិនមានការអាក់អន់ចិត្ត ឬខឹងអ្វីជាមួយម្ចាស់ផលិតកម្មថោនឡើយ តែម្ចាស់និពន្ធបទ "មួយណាក៏ដូចមួយណា" រៀបរាប់ថា មកពីលោកចង់រកផ្លូវដើរមួយដោយខ្លួនឯង បន្ទាប់ពីធ្វើការឲ្យគេជាង១០ឆ្នាំមកហើយ។ បើនិយាយពីទំនាក់ទំនងរបស់លោក និងទ្រនំចាស់វិញ នៅតែល្អប្រសើរ មិនមានអ្វីផ្លាស់ប្ដូរនោះឡើយ។

ពេលនេះ លោក យឹម តាស្រង់ បានងាកមកបើកក្រុមហ៊ុនខ្លួនឯង មានឈ្មោះថា "Home Music” ដែលផ្ដោតលើចម្រៀង កំប្លែងៗ និងកម្មវិធីកម្សាន្តផ្សេងៗ។ ក្នុងក្រុមហ៊ុនរបស់លោក ក៏ប្រមែប្រមូលបានតារាចម្រៀងល្បីៗមកចូលរួមដូចជា កុមារា ឃឿន បូរី អ្នកនាង រ័ត្ន រចនា និងតារាចម្រៀងជាច្រើនរូបទៀតផងដែរ។ ការបើកក្រុមហ៊ុនថ្មីនេះ លោកសង្កត់ធ្ងន់ថា មិនបានតាំងចិត្តចង់ប្រកួតប្រជែងនឹងក្រុមហ៊ុន ឬផលិតកម្មណានោះឡើយ ដោយលោកធ្វើវាឡើងដោយខ្លួនឯង តាមក្ដីស្រលាញ់និងចំណង់ចំណូលចិត្តប៉ុណ្ណោះ។

លោកប្រាប់ថា តាមពិតមានផលិតកម្មធំៗជាច្រើនបានទាក់ទងមក ឲ្យធ្វើការជាមួយ ប៉ុន្តែលោកបានបដិសេធទាំងអស់។ ហេតុផល ព្រោះលោកលែងមានអារម្មណ៍ធ្វើការឲ្យគេទៀតហើយ ឆន្ទៈរបស់លោកតាស្រង់ពេលនេះ គឺធ្វើអ្វីដែលខ្លួនឯងចង់ធ្វើ និងបំពេញក្ដីស្រលាញ់ខ្លួនឯង ដែលប្រឡូកក្នុងវិស័យនេះ យូរឆ្នាំ៕

អត្ថបទ៖ លឹម សុនា