​ទិញ​អត់ Motorola RAZR ​ល្បីកាល ១៥ ​ឆ្នាំ​មុន​គ្រោង​ផលិត​សារ​ថ្មី​តម្លៃ ១៥០០ ដុល្លារ

  • 2019-01-17 02:45:00
  • ចំនួនមតិ 0 | ចំនួនចែករំលែក 0

ចន្លោះមិនឃើញ


​ទូរសព្ទ​បត់​បាន​របស់ Motorola ម៉ូឌែល RAZR ​ដែល​ល្បី​ល្បាញ​កាល​ពី ១៥ ឆ្នាំ​មុន គ្រោង​នឹង​ត្រឡប់​មក​ចូល​ទីផ្សារ​ស្មាតហ្វូន​សារ​ជា​ថ្មី​នៅ​ឆ្នាំ ២០១៩ ​ដោយ​ត្រៀម​ប្រកាស​ក្នុង​កម្មវិធី ​MWC 2019 នា​ខែ​កុម្ភៈ​ខាង​មុខ​នេះ។ ​នេះ​បើ​តាម​ការ​ចុះ​ផ្សាយ​របស់​ទស្សនាវដ្តី Wall Street Journal ។

​បើ​គិត​ពី​ម៉ូឌែល Motorola RAZR មាន​ច្រើនណាស់ដូចជា ​ចេញ​ដំបូង RAZR ឆ្នាំ ២០០៤ ក្លាយ​ជា​ទូរសព្ទ​ដែល​លក់​ដាច់​ខ្លាំង​បំផុត កាល​នោះ​ក្រុមហ៊ុន​បាន​ជួល​តារា​ល្បីៗ​ជា​ច្រើន​មក​ធ្វើ​ជា អ្នក​តំណាង​ផលិត​ផល​ដូច​ជា ខ្សែ​បម្រើ​ប្រយុទ្ធ​ជំនាញ​ខាង Free kick គឺ David Beckham និង​តារា​ចម្រៀង Paris hilton ដែល​ជួយឲ្យ​ក្រុមហ៊ុន​លក់ RAZR ​ដាច់​បាន​ជាង ១៣០ លានគ្រឿង​។

បន្ទាប់​មក RAZR V3 ចេញ​ក្នុង​ឆ្នាំ ២០០៧​ តំណាល​គ្នា​ជាមួយ​នឹង iPhone ប៉ុន្តែ​ចំនួនលក់ធ្លាក់ចុះ អាចមកពីកត្តាស្មាតហ្វូន Touchscreen ចេញដំបូងរបស់ Apple ចាប់ផ្តើមល្បីខ្លាំង។

​ការ​ត្រៀម​ត្រឡប់​មក​វិញ​នេះ មិន​មែន​ជា​រឿង​ថ្មី​នោះ​ទេ​សម្រាប់ Motorola RAZR ​នេះ។ ក្រុមហ៊ុន​បាន​បញ្ចេញ Razr ច្រើន​ដង​មក​ហើយ​គឺ RAZR ឆ្នាំ ២០១១ និង​ម៉ូឌែល Droid Razr M និង Razr HD នៅ​ឆ្នាំ ២០១៦ តែ​មិន​ជោគជ័យ ហើយ​ម្ដង​នេះ​នៅ​ឆ្នាំ ២០១៩ ​អាច​នឹង​ត្រឡប់​មក​វិញ​ជា​ថ្មី។

​តាម​ការ​ចុះ​ផ្សាយ​របស់​ទស្សនាវដ្តី Wall Street Journal ​ក្រុមហ៊ុន Lenovo ដែល​ជា​អាណាព្យាបាល​របស់ Motorola បាន​ចុះប៉ាតង់​រួចរាល់តាំងពីឆ្នាំ ២០១៧ ឯឆ្នាំនេះ​សង្ឃឹម​ថា​នឹង​បោះ​ទុន​រាប់​លាន​ដុល្លារ​លើ​ការ​ផលិត RAZR ជា​ថ្មី ឲ្យ​ក្លាយ​ស្មាតហ្វូន​ប្រណិត​បំផុត​ដែល​ដាក់​លក់​ក្នុង​តម្លៃ​ប្រមាណ​ជា ១៥០០ ដុល្លារ​ ចេញ​ក្នុង​ឆ្នាំ ២០១៩ ​ដែល​មាន​បំពាក់​បច្ចេកវិទ្យា 5G ៕

ប្រភព៖ The Wall Street Journal   ប្រែ​សម្រួល៖ រក្សា