អ្វីដែល Chelsea ត្រូវធ្វើគឺជួយ Sarri ឲ្យក្លាយជា Guardiola របស់ពួកគេ

2019-01-27 10:21:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នករិះគន់បានបើកការវាយប្រហារទៅលើលោក Maurizio Sarri កាលពីសប្តាហ៍មុន ដោយសារតែធុញទ្រាន់នឹងបច្ចេកទេសគ្រូបង្វឹក និង ការដាក់កីឡាករខុសតួនាទីរបស់ពួកគេ។

រឿងរ៉ាវនេះស្រដៀងគ្នាទៅនឹង ស្ថានភាពរបស់ Pep Guardiola កាលពី២ឆ្នាំមុន។ ប៉ុន្តែ១ឆ្នាំក្រោយមក Guardiola បាននាំភាពជោគជ័យដល់ក្លឹបមេឃខៀវ នេះមិនមែនដោយសារតែគ្រូបង្វឹកអេស្ប៉ាញប្តូរយុទ្ធសាស្ត្រទៅតាមអ្នករិះគន់ទេ តែដោយសារអតីតគ្រូបង្វឹក Barcelona ប្រកាន់ខ្ជាប់ទៅនឹងបច្ចេកទេសដែលលោកជឿថាអាចកែប្រែ Man City បាន។

Sarri ប្រាកដណាស់ថានឹងដើរតាមគន្លងនេះ ប៉ុន្តែវាស្ថិតនៅលើ Chelsea ថាតើឆ្លាតគ្រប់គ្រាន់ដើម្បីទទួលយកការផ្លាស់ប្ដូរនោះឬអត់។

ចម្លើយនៅត្រង់ថាតើ Roman Abramovich អាចទទួលយកលទ្ធផលមិនល្អសម្រាប់រដូវកាលនេះបានឬទេ ដូចដែល Guardiola បានធ្វើឲ្យមានការភ្ញាក់ផ្អើលនៅរដូវកាលទី៣ បន្ទាប់ពីលោកទៅដឹកនាំក្លឹបនៅក្របខ័ណ្ឌ Premier League ខណៈដែល Sarri ដឹងច្បាស់ណាស់ថាមិនមានគ្រូបង្វឹកណាអាចឈរជើងនៅ Stamford Bridge លើសពី៣រដូវកាលឡើយចាប់តាំងពី Mourinho ដឹកនាំ Chelsea ដំបូងចន្លោះឆ្នាំ ២០០៤-០៧។

មានហេតុផល១ដែល មហាសេដ្ឋីរុស្ស៊ីអាចនឹងព្យាយាមរក្សាលោក Sarri ឲ្យបានយូរពោលគឺជាមនុស្សទី២បន្ទាប់ពី Mourinho។

Abramovich ចាប់ផ្តើមស្រលាញ់បាល់ទាត់ដំបូងនៅពេលដែលលោកមើល Manchester United ផ្តួល Real Madrid ៤-៣ នៅទឹកដី Old Trafford កាលពីខែមេសាឆ្នាំ២០០៣។ ប៉ុន្តែម្ចាស់ក្លឹបរូបនេះមិនអាចស្វែងរកគ្រូបង្វឹកមានសមត្ថភាពម្នាក់ដែលអាចជួយ Chelsea ឲ្យខ្លាំងក្នុងរយៈពេលវែងបានឡើយ។ ហេតុផលចម្បងមកពីគ្រូបង្វឹកទាំងនោះមានអ្វីដែល Abramovich ខ្វះគឺ ការអត់ធ្មត់។

គ្រូបង្វឹកកំពូលៗ នៃក្របខ័ណ្ឌ Premier League ដែលចូលចិត្តប្រើប្រព័ន្ធប្រយុទ្ធនឹងកម្រជោគជ័យណាស់នៅរដូវកាលដំបូងរបស់ពួកគេនៅអង់គ្លេស។ ប៉ុន្តែ Antonio Conte អាចធ្វើបាន ពីព្រោះអតីតគ្រូ Chelsea រូបនេះពឹងលើប្រព័ន្ធការពារដែលរឹងមាំរួចជាស្រេច។ ប៉ុន្តែគ្រូបង្វឹកដែលអាចកសាងក្រុមមួយខ្លាំងបានត្រូវស្វែងយល់អំពីគោលការណ៍ស្មុគស្មាញ ដែលអាចចំណាយពេលរាប់ខែឬរាប់ឆ្នាំ។

Mauricio Pochettino បានលេខ៥ នៅអាណត្តិដំបូងរបស់លោកនៅ Tottenham ដោយទទួលបានពិន្ទុតិចជាង Andre Villas-Boas និង Tim Sherwood ដែលត្រូវ Spurs បណ្ដេញចេញទៅទៀត។ Guardiola បានបញ្ចប់ក្នុងចំណាត់ថ្នាក់លេខ៣។ Liverpool របស់ Jurgen Klopp បានបញ្ចប់ក្នុងចំណាត់ថ្នាក់លេខ៨។ ប៉ុន្តែគ្រូបង្វឹកទាំងនោះមានពេលវេលាគ្រប់គ្រាន់ ហើយឥឡូវនេះក្លឹបរបស់ពួកគេកំពុងក្លាយជាក្លឹបដែលខ្លាំងបំផុតក្នុងលោក។

ក្នុងចំណោមឈ្មោះទាំងនេះ Sarri និង Guardiola លេចធ្លោជាងគេ ដោយសារតែស្ទីលរបស់គ្រូបង្វឹកទាំង២នេះ។ កាលពីរដូវកាលដំបូងនៅ Man City លោក Guardiola ជួយក្លឹបឈ្នះ៦ប្រកួតដំបូងជាប់ៗគ្នា មុនពេលដែលទម្រង់លេងរបស់ក្រុមធ្លាក់ចុះវិញ។ រីឯ Sarri បានដឹកនាំ Chelsea ឈ្នះ៥ប្រកួតដំបូង ប៉ុន្តែបច្ចុប្បន្នស្ថានភាពក៏មិនខុសពី Guardiola កាលជំនាន់នោះដែរ។

ដូចដែល Guardiola ធ្លាប់ធ្វើ Sarri ក៏ដាច់ខាតត្រូវការជួសជុលកីឡាកររបស់លោកផងដែរ។ ការជម្រុះកីឡាករចាស់ៗនៅក្នុងក្លឹបប្រាកដជានាំឲ្យមានប្រតិកម្ម។ Guardiola បានផ្លាស់ប្ដូរកីឡាករ Pablo Zabaleta, Gael Clichy, Aleksandar Kolarov, Bacary Sagna នោះគឺជាអ្វីដែល Sarri កំពុងធ្វើ ដែលកីឡាករមួយចំនួនក្នុងជំនាន់ Conte ត្រូវបាន Sarri មិនដាក់ឲ្យលេងតែម្តង។

បច្ចុប្បន្ននេះ Sarri បានខ្ចីជើង Gonzalo Higuain ពីក្លឹប Juventus ហើយ Eden Hazard ក៏អាចលេងនៅ role ស្លាបរបស់គេវិញដែរ។

ការរិះគន់មួយចំនួនទៅលើក្បួន Sarri-ball ថាមិនដំណើរការ ខណៈដែល គ្រូបង្វឹកអ៊ីតាលីចង់លេងប្រព័ន្ធបុកតែខ្វះគុណភាពខ្សែប្រយុទ្ធ។ Alvaro Morata មិនទាន់ដល់កម្រិតដែល Sarri ចង់បាននៅឡើយ។

សម្រាប់ Guardiola ត្រូវបានអនុញ្ញាតឱ្យចុះហត្ថលេខាលើកីឡាករជាច្រើនក្នុងឆ្នាំដំបូងរបស់លោកមាន John Stones, Leroy Sané, Gabriel Jesus, Ilkay Gundogan, Nolito និង Claudio Bravo ។ រីឯ Sarri នាំយក Jorginho និង ខ្ចីជើង Mateo Kovacic ហើយ ការចុះហត្ថលេខាលើ Kepa Arrizabalaga មិនប្រាកដថាល្អជាងទុក Thibaut Courtois ទេ។

ខណៈដែល Sarri អាចប្រើខ្សែប្រយុទ្ធវ័យ១៨ឆ្នាំ Callum Hudson-Odoi ប៉ុន្តែបែរជាទៅទិញ Christian Pulisic ខ្សែបម្រើស្លាបវ័យក្មេងដែល Chelsea បានចុះហត្ថលេខាពី Borussia Dortmund ដែលត្រូវរង់ចាំរហូតដល់ចប់រដូវកាលទើបអាចមនាំទៅកាន់ Stamford Bridge បាន។

Gary Neville បានអះអាងថា Sarri "ដឹង" ថាគាត់នឹងត្រូវគេបណ្ដេញចេញក្នុងរយៈពេល២ឆ្នាំ"។ នោះគឺជារឿងចៀសមិនផុត ហើយបើសំណាងមិនល្អ Abramovich អស់ការអត់ធ្មត់ ប្រហែល Pulisic មិនទាន់មកដល់ទីក្រុងឡុងផង Sarri ត្រូវ Chelsea បណ្ដេញចេញបាត់ទៅហើយ។

ស្ថានភាពរបស់ Mourinho និង Conte ខុសពី Sarri។ ខុសត្រង់ថា គ្រូបង្វឹកទាំង២នាក់នោះ បានរៀបចំរចនាសម្ព័ន្ធដែលអាចនាំឲ្យ Chelsea ជោគជ័យលឿន ទោះមិនយូរអង្វែងក៏ដោយ។ ប៉ុន្តែក្រោម Sarri ការធ្វើដំណើរទៅកាន់តំណែងកំពូលរបស់ Chelsea យឺតជាង ព្រោះជាយុទ្ធសាស្ត្រដែល Guadiola, Sarri និង គ្រូបង្វឹកកំពូលៗជាច្រើន សុទ្ធតែដឹងថា ត្រូវការពេល ហើយលទ្ធផលចុងក្រោយនឹងអស្ចារ្យយូរអង្វែង៕

ប្រភព៖ Four Four Two ប្រែសម្រួល៖ សុខ លាងហ៊ត