ប្រធានក្លឹប Muangthong នឹងនាំកីឡាករល្អៗមក ព្រោះដឹងថាប៉ះក្រុមកម្ពុជា មិនងាយឈ្នះទេ

2019-01-31 04:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Karn Jantarat ប្រធាននិងជានាយកប្រតិបត្តិរបស់ក្លឹប Muangthong United បានបញ្ជាក់ថាក្រុមរបស់លោកនឹងនាំយកកីឡាករល្អៗ ដើម្បីលេងទល់ក្រុម Cambodia All Stars ព្រោះដឹងថាមិនងាយយកឈ្នះពួកគេស្រួលៗទេ។

ក្រុមបាល់ទាត់ Muangthong United នឹងមកប្រកួតមិត្តភាពជាមួយក្រុម Cambodia All Stars ជាលើកទី៣នៅថ្ងៃទី៩ខែកុម្ភៈឆ្នាំ២០១៩ខាងមុខនេះ។ ការប្រកួតនេះដែរ នឹងធ្វើឱ្យអ្នកគាំទ្រពេញចិត្តជាខ្លាំង ព្រោះថាខាងក្រុមថៃ បានបញ្ជាក់ថាពួកគេនឹងយកកីឡាករល្អៗមកទាំងអស់ ដើម្បីលេងទល់ក្រុមខាងកម្ពុជា ត្បិតអីការប្រកួតកន្លងមកពិតជាស្វិតស្វាញខ្លាំងណាស់។

លោក Kan Jantarat ប្រធានក្លឹប Muangthong United បាននិយាយថាលោកពេញចិត្តក្នុងការនាំក្រុមរបស់ខ្លួនមកលេងទល់ក្រុមតារាបាល់ទាត់នៅកម្ពុជា។ ខណៈដែលការប្រកួត៣លើកកន្លងមក ក្រុម Muangthong បានដឹងច្បាស់ពីសមត្ថភាពខាងក្រុមកម្ពុជា។ ដូច្នេះហើយ នៅលើកទី៣នេះ ពួកគេនឹងនាំយកកីឡាករល្អៗបំផុតក្នុងក្រុមមកលេងប្រកួត ដើម្បីឱ្យអ្នកចូលរួមទស្សនាកាន់តែសប្បាយចិត្ត។

ក្រុម Cambodia All Stars នៅឆ្នាំនេះដឹកនាំដោយលោក ភា សុភក្ត្រា ហើយក៏បានបញ្ចេញបញ្ជីឈ្មោះរួចរាល់អស់ហើយដែរ។ ក្នុងនោះ ក្រុមមួយនេះនឹងអវត្តមានកីឡាករសំខាន់របស់កម្ពុជា២រូប គឺ ចាន់ វឌ្ឍនាកា និង ធារី ចន្ថាប៊ីន ដោយសារតែពួកគេជាប់ភារកិច្ចជាមួយក្លឹបអាជីពនៅប្រទេសម៉ាឡេស៊ី៕

អត្ថបទ៖ មុន្នីរម្យ