មុខងារដែលមេ Facebook ធ្លាប់ប្រើផ្ដាច់មុខតែឯង ពេលនេះមានជាសាធារណៈហើយ

2019-02-07 02:51:55
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធី Facebook Messenger ពេលនេះមានបន្ថែមមុខងារថ្មី អាចឲ្យអ្នកលុបសារដែលផ្ញើចេញទៅបាន ហេតុនេះក្នុងករណីដែលអ្នកផ្ញើសារទៅកាន់មនុស្សខុស អ្នកអាចលុបចេញពីប្រអប់ Chat បាន។

វាដំណើរការដោយនៅពេលអ្នកចុចលើសារដែលបានផ្ញើចេញទៅក្នុងរយៈពេល ១០ នាទី នឹងមានជម្រើសពីរឲ្យជ្រើសរើស។ នោះគឺ Remove for Everyone និង Remove for You។ បើសិនចុចលើ Remove for Everyone សារដែលផ្ញើចេញទៅ នឹងជំនួសដោយពាក្យថា "You removed a message"។

មុខងារថ្មីនេះគឺស្រដៀងនឹងមុខងារដែលមានផ្ដាច់មុខសម្រាប់តែគណនីលោក Mark Zuckerberg ស្ថាបនិក Facebook។ កាលពីខែមេសា ឆ្នាំ ២០១៨ គេបានរកឃើញថាសារដែលផ្ញើចេញពីគណនី Mark Zuckerberg បានបាត់ស្រមោល យ៉ាងអាថ៌កំបាំង។ ក្រោយមកទើប Facebook បញ្ជាក់ថាសាររបស់ Mark គឺមានពេលផុតកំណត់ ដោយធ្វើបែបនេះដើម្បីបង្កើនសុវត្ថិភាពដល់គណនី។

ក្រោយពីគេដឹងថា Mark អាចលុបសារបាន ប៉ុន្តែអ្នកប្រើប្រាស់ធម្មតាមិនអាច ក៏មានការទាមទារឲ្យមានការស្មើភាពសម្រាប់អ្នកប្រើទាំងអស់។ បន្ទាប់មកទើប Facebook ប្រកាសថានឹងបញ្ចេញមុខងារលុបសារនេះ ជូនដល់អ្នកប្រើប្រាស់ទាំងអស់។

គួរដឹងថាមុខងារថ្មីនេះបញ្ចេញឲ្យប្រើប្រាស់ទូទាំងពិភពលោកចាប់ពីពេលនេះ ដោយតម្រូវឲ្យអ្នកប្រើប្រាស់អាប់ដេតកម្មវិធី Messenger ទៅកាន់ជំនាន់ចុងក្រោយ៕

ចុចអាន៖

ប្រភព៖ The Verge ប្រែសម្រួល៖ សុខហេង