Pep ចេញមុខការពារ sarriball ថាជាក្បួនខ្លាំង បើទោះជាមានគេមិនយល់ពីក្បួននេះ

2019-02-09 03:19:18
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Pep Guardiola បាននិយាយថាយុទ្ធសាស្រ្តរបស់ Maurizio Sarri នៅ Chelsea ត្រូវបានគេយល់ច្រឡំ។

Guardiola បានស្ងើចនឹងការងារលោក Sarri នៅ Napoli នៅពេលពួកគេប៉ះគ្នានៅក្របខ័ណ្ឌ Champions League កាលពីរដូវកាលមុន និង បានសរសើរគ្រូបង្វឹកក្លឹបតោខៀវថាបានបដិវត្តការប្រកួតបាល់ទាត់នៅអង់គ្លេស ពិសេសនៅពេលចាប់ផ្តើមរដូវកាល។

Sarri អាចដោះស្រាយបញ្ហាឆាប់រហ័សនៅក្លឹប Chelsea ដោយមិនដែលស្គាល់បរាជ័យសោះសម្រាប់១២ប្រកួតដំបូង ដែលបានបង្កើតកំណត់ត្រា ក្នុងក្របខ័ណ្ឌ Premier League ប៉ុន្តែក្រោយមកយុទ្ធសាស្ត្រប្រកួតរបស់លោករងការរិះគន់ដោយចាញ់ក្រុមកំពូលតារាង១២ពិន្ទុ។

ក្បួន sarriball ត្រូវបានគេស្គាល់ថាជាការលេងបាល់លឿន សម្រុកលឿន ដោយឲ្យតម្លៃទៅលើប្រព័ន្ធប្រយុទ្ធ និង គុណភាពល្បឿនកីឡាករ។

ក្នុងបទសម្ភាសន៍ឲ្យ Sky Sports គ្រូបង្វឹករបស់ Man City យល់ថាការវិនិច្ឆ័យទៅលើក្បួនប្រកួតរបស់ Sarri គឺអយុត្តិធម៌ណាស់។

“ក្នុងនាមជាអ្នកទស្សនា និង ជាគ្រូបង្វឹក ខ្ញុំព្យាយាមស្វែងយល់ពីអ្វីដែលគ្រូបង្វឹកដូចគ្នាកំពុងព្យាយាមធ្វើ" ។

“ខ្ញុំឃើញ Chelsea ខ្ញុំអាចយល់ពីអ្វីដែលពួកគេចង់ធ្វើ។ ប្រហែលអ្នកផ្សេង មិនអាចមើលឃើញពីបំណងដែលពួកគេ [Chelsea] ចង់ធ្វើនោះទេ។ ប៉ុន្តែពួកគេបានធ្វើ"។

“នៅពេលអ្នកមើលពីក្រុម មើលពីកីឡាករដែលគេមាន...។ ខ្សែប្រយុទ្ធល្អបំផុតនៅទីនោះ ពួកគេមានខ្សែបម្រើល្អបំផុត អ្នកចាំទីល្អ និង ខ្សែការពារពោរពេញដោយបទពិសោធន៍។ ពួកគេច្បាស់ណាស់ថាពួកគេចង់ធ្វើអ្វី។ ថ្ងៃស្អែក អាចជាថ្ងៃអន្សារបស់យើង"។

គ្រូបង្វឹកកំពូលៗ នៃក្របខ័ណ្ឌ Premier League ដែលចូលចិត្តប្រើប្រព័ន្ធប្រយុទ្ធនឹងកម្រជោគជ័យណាស់នៅរដូវកាលដំបូងរបស់ពួកគេនៅអង់គ្លេស។ គ្រូបង្វឹកដែលអាចកសាងក្រុមមួយខ្លាំងបានត្រូវស្វែងយល់អំពីគោលការណ៍ស្មុគស្មាញ ដែលអាចចំណាយពេលរាប់ខែឬរាប់ឆ្នាំ សូម្បីតែ Guardiola, Jurgen Klopp និង Mauricio Pochettino សុទ្ធតែមិនជោគជ័យនៅរដូវកាលដំបូងរបស់ខ្លួននៅ Premier League៕

ប្រភព៖ Sky Sports ប្រែសម្រួល៖ សុខ លាងហ៊ត