ដល់ម៉ោងចេញក្រៅបានដឹងថ្មសល់ ២%! នេះវិធីសាកមួយភ្លែត ឡើង % ចង់កប់

2019-02-11 03:53:37
ចំនួនមតិ 0 | ចំនួនចែករំលែក 0

ចន្លោះមិនឃើញ

បទពិសោធន៍បែបនេះ អ្នកណាក៏ធ្លាប់ជួបដែរ ដោយរៀបចំទាញស្បែកជើងទៅក្រៅហើយ បែរជានឹកឃើញរឿងថ្មទូរសព្ទខ្លួនឯងអស់សឹងចង់រលត់ទៅហើយ។ សម្រាប់អ្នកមាន Power Bank អាចថាមិនមែនជាបញ្ហាទេ តែសម្រាប់អ្នកអត់ អាចមកសាកប្រើវិធីខាងក្រោម ដែល Admin កំពុងតែប្រើរាល់ថ្ងៃ។

១. ដោតកន្លែងដែលត្រឹមត្រូវ

ភាគច្រើននៅពេលដែលអ្នកប្រញាប់ អ្វីដែលនៅក្បែរដៃអាចទាកមកសាកបានគឺប្រើភ្លាមដូចជា Laptop ជាដើម។ ប៉ុន្តែជាទូទៅរន្ធ USB 2.0 របស់កុំព្យូទ័របញ្ចេញកម្លាំងបានត្រឹម ២,៥ វ៉ាត់ និង USB 3.0 បញ្ចេញបានត្រឹម ៤,៥ វ៉ាត់ប៉ុណ្ណោះ ខណៈដែលទូរសព្ទបច្ចុប្បន្នខ្លះអាចទប់ទល់រហូតដល់កម្លាំង ១៥ វ៉ាត់ឯណោះ។ វិធីដោះស្រាយគឺព្យាយាមដោតព្រីដែលនៅជាប់ជញ្ជាំង ជាជាងដោតនៅកុំព្យូទ័រ។

២. ប្រើខ្សែ និងឆ្នាំងសាកដែលត្រឹមត្រូវ

មិនប្រាកដថាឆ្នាំងសាកដែលគេដាក់ឲ្យក្នុងប្រអប់សុទ្ធតែល្អ ហើយសាកលឿនទាំងអស់នោះទេ។ ជាក់ស្ដែង Smartphone Apple ជំនាន់ក្រោយៗសុទ្ធតែមានមុខងារសាកថ្មលឿន ប៉ុន្តែក្រុមហ៊ុនមិនបានដាក់ដុំសាកលឿនឲ្យនោះទេ។ ដូច្នេះបើអ្នកកំពុងស្ថិតក្នុងស្ថានភាពបែបនេះ អ្នកប្រហែលត្រូវចំណាយប្រាក់ទិញហើយ។

៣. ដោះស្រោមចេញ

ជាទូទៅរាល់ពេលអ្នកសាកថ្ម តិចក្ដីច្រើនក្ដី ទូរសព្ទអ្នកនឹងឡើងកម្ដៅ ហើយប្រសិនអ្នកកំពុងប្រើសម្បកការពារទូរសព្ទផងនោះ វានឹងបន្តឲ្យមានកម្ដៅកាន់តែខ្លាំង ដែលវាក៏ជាមូលហេតុធ្វើឲ្យពន្យារដល់ការបញ្ចូលថ្មផងដែរ។

៤. បិទអ្វីដែលមិនចាំបាច់

Bluetooth, WiFi, 4G, GPS សុទ្ធតែអ្វីដែលអ្នកគួរតែពិចារណាបិទ ដោយសារទោះបីអ្នកមិនបានប្រើ ឬចុចវាក៏ដោយ តែមុខងារទាំងនេះក៏នៅតែដំណើរការដដែល។ ថ្វីត្បិតវាមិនលើសខ្វះគ្នាច្រើនក៏ពិតមែន តែក៏អាចជាចំនួនមួយឲ្យទូរសព្ទអ្នករស់ ២ ៣ ម៉ោងបន្ថែមដូចគ្នា។

៥. កុំប៉ះ

ចុងក្រោយនេះជាចំណុចស្រួលនិយាយ តែពិបាកធ្វើ ដោយសារពេលខ្លះអាចអផ្សុកដែលអង្គុយចាំមិនមានអីចុច ឬប្រញាប់ ហើយបន់ឲ្យតែថ្មឡើងបានគួរសមអាលនឹងបានដកចេញ។ តែអ្នកកាន់តែមើល ថ្មនឹងកាន់តែយឺត ដោយរាល់ពេលអ្នកចុចមើល អេក្រង់នឹងបង្ហាញពន្លឺ ដែលជាហេតុវាកាត់បន្ថយថាមពលថ្មដូចគ្នា។ ដូចនេះបើដាក់ចិត្តសាក ២០នាទី គួរទុកពេលទាំងនេះឲ្យពេញលេញសឹមទៅដកមើល អ្នកនឹងឃើញពីភាពខុសគ្នា៕