នៅពេលតារាល្បីៗមានព័ត៌មានស្នេហានឹងគ្នា អ្នករងគ្រោះខ្លាំង គឺភាគីខាងស្រី

2019-02-13 03:40:39
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅដើមឆ្នាំ ២០១៩ ភ្នាក់ងារព័ត៌មាន Dispatch បានបង្កឲ្យមហាជនមានការភ្ញាក់ផ្អើលមិនតិចទេ ពេលទម្លាយរូបភាពណាត់ជួបគ្នារវាង Kai សមាជិកក្រុម EXO និង Jennie សមាជិកក្រុម BLACKPINK។

ព័ត៌មានស្នេហានេះ អ្នកគាំទ្រមួយចំនួនមានការអបអរសាទរពិសេសចំពោះភាគីខាងប្រុសដែលរកបានស្នេហ៍ពិត ប៉ុន្តែបើងាកទៅខាងស្រីវិញ ដូចជារងនូវព្យុះភ្លៀងជាច្រើន រហូតធ្វើឲ្យមតិរិះគន់សម្រុកមករកយ៉ាងជោគជាំ។ មិនមែនត្រឹមតែគូស្នេហ៍ Kai និង Jennie ទេ ក្នុងនោះក៏មានគូស្នេហ៍តារាជាច្រើនទៀត ដែលភាគីខាងស្រីជាអ្នករងគ្រោះ ព្រោះមតិរិះគន់អ្នកគាំទ្រ។

១. Taeyeon (ក្រុម Girls' Generation) និង Baekhyun (ក្រុម EXO)

កាលពីថ្ងៃទី ១៩ ខែមិថុនា ឆ្នាំ ២០១៤ ព័ត៌មានស្នេហារបស់ Taeyoen ជាមួយនឹងសិស្សប្អូនរបស់នាងគឺ Baekhyun បានបង្កឲ្យពិភពសិល្បៈផ្ទុះកក្រើកមិនធម្មតា។ ក្រោយផលិតកម្ម SM ប្រកាសទទួលស្គាល់ពីទំនាក់ទំនងស្នេហាអ្នកទាំង ២ Taeyeon ដែលជាសាមីខ្លួនក៏បានសុំទោសជាសាធារណៈដែរ និងទទួលខុសត្រូវនូវទង្វើរបស់នាងទាំងប៉ុន្មាន។

ទោះជាយ៉ាងណា ព្យុះភ្លៀងបាក្យពេចន៍មិនល្អពីអ្នកគាំទ្រមួយចំនួនកាន់តែបន្តធ្វើបាបផ្លូវចិត្តនាងកាន់តែខ្លាំងឡើងៗនៅពេលនោះ។ មិនយូរប៉ុន្មាន ស្នេហារបស់អ្នកទាំង ២ក៏ឈានដល់ផ្លូវបំបែកទាល់តែបាន។

២. Seolhyun (ក្រុម AOA) និង Zico

ឈានចូលថ្ងៃទី ១០ ខែសីហា ឆ្នាំ ២០១៦ Dispatch ក៏បានបង្ហាញរូបភាពណាត់ជួបគ្នារបស់តារាប្រុសស្រីទាំង ២ ស្របពេល ឆ្នាំនោះប្រជាប្រិយភាពរបស់ Seolhyun កំពុងរីកសុសសាយខ្លាំង ម្យ៉ាងអ្វីដែលកាន់តែធ្វើឲ្យនាងទទួលបានក្ដីស្រឡាញ់ខ្លាំងពីសំណាក់អ្នកគាំទ្រ ក៏ដោយសារនាងមិនដែលជាប់ពាក់ព័ន្ធនឹងរឿងស្នេហាលឹបល។ ប៉ុន្តែកេរ្តិ៍ឈ្មោះរបស់នាងត្រូវបំផ្លាញខ្ទេច ក្រោយ Dispatch បង្ហាញរូបភាពនាងស្លៀកសំពត់ខ្លីរត់ទៅផ្ទះមិត្តប្រុស។

ពេលនោះនាងត្រូវរងពាក្យសម្ដីមិនល្អគ្រោតគ្រាត ពីអ្នកគាំទ្ររបស់ Zico យ៉ាងចាស់ដៃ។ ដោយសារមិនអាចទ្រាំនឹងព័ត៌មានស្នេហានេះបាន Seolhyun និង Zico ក៏បានចែកផ្លូវគ្នាដើររៀងខ្លួនវិញ។

៣. Jiyeon និង Lee Dong Gun

អ្នកទាំង ២មានចិត្តឲ្យគ្នាពលសម្ដែងរឿង "Encounter” កាលពីឆ្នាំ ២០១៥។ ក្រោយរូបភាពទាក់ទងគ្នាត្រូវបែកខ្ចាយពេញអ៊ីនធើណិត Lee Dong Gun ក៏បានសរសេរសារមួយ ដើម្បីការពារ Jiyeon ប៉ុន្តែនៅតែមិនអាចជួយនាងបានឡើយ។ Jiyeon ត្រូវប្រឈមនឹងបញ្ហាឈឺក្បាលជាច្រើនពេលនោះ រហូតពេលខ្លះយំទៀត ពេលកំពុង Live វីដេអូលើគណនីសង្គម ដោយសារ Comment មិនល្អទាំងឡាយ។

ទោះជាយ៉ាងស្នេហាមួយនេះក៏នៅតែមិនអាចរក្សាបានយូរដែរ ហើយអ្នកទាំង ២ក៏សម្រេចដើរផ្លូវរៀងខ្លួនវិញ។

៤. Jennie (ក្រុម BLACKPINK) និង Kai (ក្រុម EXO)

ងាកចូលតារាវ័យក្មេងទាំង ២នេះវិញ ក៏បានបង្កភាពភ្ញាក់ផ្អើលដល់មនុស្សគ្រប់គ្នា ដោយសារ Dispatch ដែរកាលពីដើមឆ្នាំ ២០១៩។ អ្នកគាំទ្រច្រើនណាស់ បាននាំគ្នាថាស្ដីឲ្យ Jennie ជាមួយពាក្យពេចន៍មិនល្អ ហើយមានខ្លះបន្ទោស Jennie ជាមនុស្សអាត្មានិយម មិនគិតសមាជិកក្នុងក្រុម។

ដោយសារមុនផ្ទុះព័ត៌មានស្នេហា Jennie ជោគជាំខ្លាំងទៅហើយព្រោះចរិតសម្ដែងលើឆាកបែបខ្ជិលៗ ទើបរហូតមានព័ត៌មានជាមួយ Kai ទៀត បានជាធ្វើឲ្យប្រចាប្រិយភាពរបស់នាងកាន់តែដាប។ ប៉ុន្តែមិនដល់ ១ខែស្រួលបួលផង ក្រោយទម្លាយថាមានស្នេហា Jennie និង Kai ក៏បែកគ្នា៕

ប្រភព៖ Kenh14 ប្រែសម្រួល៖ យី សុធារី