អស់បារម្ភហើយ! ក្រសួងសុខាភិបាលបន្ថែមទីតាំងចាក់វ៉ាក់សាំងជំងឺឆ្កែឆ្កួត
- 2019-02-28 08:12:24
- ចំនួនមតិ 0 | ចំនួនចែករំលែក 0
អស់បារម្ភហើយ! ក្រសួងសុខាភិបាលបន្ថែមទីតាំងចាក់វ៉ាក់សាំងជំងឺឆ្កែឆ្កួត
ចន្លោះមិនឃើញ
បន្ទាប់ពីមនុស្សម្នាជាច្រើនកុះករបានបន្តប្រជ្រៀតគ្នាពីគ្រប់ទិសទី សម្រុកមកវិទ្យាស្ថានប៉ាស្ព័រកម្ពុជាជិតពីរសប្ដាហ៍មក ពេលនេះក្រសួងសុខាភិបាលបានបន្ថែមទីតាំងចាក់វ៉ាក់សាំងបង្ការ ការពារជំងឺឆ្កែឆ្កួតខាំ នៅរាជធានីភ្នំពេញ និងតាមបណ្ដាខេត្ត។
លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាលបានឱ្យដឹងថា ករណីពលរដ្ឋមានតម្រូវការចាក់វ៉ាក់សាំងជំងឺឆ្កែឆ្កួត អាចរកសេវាចាក់វាក់សាំងនេះ នៅវិទ្យាស្ថានជាតិសុខភាពសាធារណៈ វិទ្យាស្ថានប៉ាស្ទ័រកម្ពុជា មជ្ឈមណ្ឌលបង្ការជំងឺឆ្កែឆ្កួតខេត្តបាត់ដំបង និងគ្លីនិកឯកជនទូទាំងរាជធានី ខេត្ត។ នៅវិទ្យាស្ថានជាតិសុខភាពសាធារណៈមានទីតាំងស្ថិតនៅតាមមហាវិថី គីមអ៊ីល ស៊ុង ក្នុងខណ្ឌទួលគោករាជធានីភ្នំពេញ។
លោកជំទាវ បានបន្ថែមថា បច្ចុប្បន្នឯកឧត្ដមរដ្ឋមន្ត្រីក្រសួងសុខាភិបាល បានធ្វើកិច្ចសហប្រតិបត្តិការជាមួយវិទ្យាស្ថានប៉ាស្ទ័រកម្ពុជា ជាបន្តទៀត ដោយពង្រីក និងបង្កើតមជ្ឈមណ្ឌលចាក់ថ្នាំបង្ការជំងឺឆ្កែឆ្កួតនេះ នៅខេត្តកំពង់ចាម។
នៅក្នុងទិវាប្រារព្ធទីក្រុងស្អាត លើកទី៧ នៅព្រឹកថ្ងៃទី២៥ កុម្ភៈ សម្ដេចនាយករដ្ឋមន្ត្រី ហ៊ុន សែន ក៏បានស្នើឲ្យក្រសួងសុខាភិបាល ពង្រាយថ្នាំវ៉ាក់សាំងនៅតាមមន្ទីរពេទ្យនៅរាជធានី ខេត្ត ឬតាមគ្លីនិកឯកជនដើម្បីទុកសម្រាប់ផ្ដល់សេវាវ៉ាក់សាំង ដល់ប្រជាពលរដ្ឋទាន់ពេលវេលាផងដែរ។
លោកជំទាវ ឱ វណ្ណឌីន បានអំពាវនាវឲ្យមានការចូលរួមពីប្រជាជន យល់ដឹងពីវិធានការងាយៗនេះ ហើយចៀសវាងការមករងចាំយូរនៅវិទ្យាស្ថានប៉ាស្ទ័រកម្ពុជា។ បើក្នុងករណី មានសត្វទាំងអស់ខាងលើខាំនោះ ត្រូវលាងមុខរបួស ជាមួយអាល់កុល ឬថ្នាំបេតាឌិន(ថ្នាំក្រហម) ហើយត្រូវទៅកាន់មន្ទីរពេទ្យជាបន្ទាន់ ដើម្បីព្យាបាល។ ម្យ៉ាងទៀត ដំណាក់កាល នៃសត្វខាងលើខាំនេះ អ្នករបួស មិនត្រូវយករបស់អ្វី ដូចជា បាយកក ឬត្រាវ (តាមជំនឿបូរាណ) មកបិតមុខរបួសនោះឡើយ ព្រោះអាចនាំឱ្យគ្រោះថ្នាក់បាន៕