មេ Huawei និយាយចំៗថាការឌីហ្សាញរបស់ Galaxy Fold "មិនល្អ"

2019-03-01 04:41:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Huawei Mate X និង Samsung Galaxy Fold បានក្លាយជាតួឯកក្នុងព្រឹត្តិការណ៍ MWC ឆ្នាំ ២០១៩ ដែលធ្វើឡើងនាសប្ដាហ៍នេះ ដោយសារតែវាជាស្មាតហ្វូនបត់ដែលគ្រប់គ្នាទន្ទឹងរង់ចាំយូរឆ្នាំមកហើយ។ ស្មាតហ្វូនទាំងពីរមានរចនាបថខុសគ្នា ប៉ុន្តែលោក Richard Yu នាយកប្រតិបត្តិ Huawei បាននិយាយច្បាស់ៗថាខ្លួនចូលចិត្តមួយណាជាង។

Galaxy Fold

ក្នុងកិច្ចសម្ភាសន៍ជាមួយសារព័ត៌មាន Business Insider លោក Richard បានបង្ហាញថាក្រុមហ៊ុនរបស់ខ្លួនបានសិក្សាលើគម្រោងការស្មាតហ្វូនបត់ចំនួន ៣ ក្នុងពេលតែមួយ។ ដោយក្នុងនោះមានមួយ មានរចនាបថស្រដៀងគ្នានឹង Galaxy Fold ហើយល្អជាង Galaxy Fold ទៀតផង។ ប៉ុន្តែលោកសម្រេចចិត្តបោះចោលគម្រោងការនេះ ដោយសារវាមានចំណុចអវិជ្ជមាន។

Galaxy Fold

លោក Richard បានរៀបរាប់ថា ៖ "ខ្ញុំគិតថាការមានអេក្រង់ពីរ មានអេក្រង់មុខមួយ និងអេក្រង់ខាងក្រោយមួយ ធ្វើឲ្យទូរសព្ទមានទម្ងន់ធ្ងន់ពេក”។ លោកចង់សំដៅដល់ Galaxy Fold ដែលមានរចនាបថអេក្រង់ពីរ។

Mate X

គួរដឹងថា Mate X មានរចនាបថអេក្រង់ពន្លាចេញក្រៅ ខុសពី Galaxy Fold ដែលមានរចនាបថអេក្រង់បត់ចូលក្នុង។ ស្មាតហ្វូនទាំងពីរសុទ្ធតែមានតម្លៃខ្ទង់ ២ ពាន់ដុល្លារដូចគ្នា ប៉ុន្តែគេរំពឹងថាពេលមានក្រុមហ៊ុនច្រើនបញ្ចេញស្មាតហ្វូនបត់នេះ តម្លៃរបស់វាអាចនឹងទាបជាងនេះ៕

ចុចអាន៖

ប្រភព៖ GSMarena ប្រែសម្រួល៖ សុខហេង