Georgina បង្ហើបពីការផ្ដើមស្នេហាក្នុងគ្រាដំបូងរបស់ខ្លួនជាមួយ Ronaldo

2019-04-05 12:13:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មិត្តស្រីរបស់ខ្សែប្រយុទ្ធ Cristiano Ronaldo នាង Georgina Rodriguez បានសារភាពប្រាប់ទស្សនាវដ្ដីអ៊ីតាលី Elle ថា នាងបានធ្លាក់ក្នុងអន្លង់ស្នេហ៍របស់តារាបាល់ទាត់ព័រទុយហ្គាល់រូបនេះ បន្ទាប់ពីឃើញគ្នាជាលើកដំបូងក្នុងផ្សារទំនើប នៅទីក្រុងម៉ាឌ្រីដ កាលពីខែមិថុនា ឆ្នាំ២០១៦កន្លងទៅ។

នាងបានលើកឡើងថា៖ " ជំនួបជាមួយ Ronaldo ដំបូងបំផុតគឺនៅហាង Gucci ដែលជាកន្លែងដែលខ្ញុំធ្វើការជាជំនួយការផ្នែកលក់ " ។

Georgina បានបន្តថា៖ " ប៉ុន្មានថ្ងៃក្រោយមក ពួកយើងបានឃើញគ្នានៅកម្មវិធីរបស់ផលិតផលផ្សេងទៀត ហើយបន្ទាប់មកពួកយើងបាននិយាយជាមួយគ្នាក្នុងបរិយាកាសស្ងប់ស្ងាត់ ដែលក្រៅពីការងាររបស់ខ្ញុំ។ វាជាស្នេហាបែបឃើញភ្លាមស្រលាញ់សម្រាប់យើងទាំងពីរ " ។

គួររម្លឹកផងដែរថា កាលពីខែកុម្ភៈកន្លងទៅ Georgina បានទម្លាយប្រាប់ទស្សនាវដ្ដីអេស្ប៉ាញ Holaថា នាងពិតជាសប្បាយចិត្តក្នុងការធ្វើជាភរិយារបស់ខ្សែប្រយុទ្ធក្លឹប Juventus នេះណាស់ ប៉ុន្តែច្រានចោលនូវពាក្យចចាមអារ៉ាមដែលថាពួកគេទាំងពីរកំពុងភ្ជាប់ពាក្យនឹងគ្នា៕

ប្រភព៖ The Sun អត្ថបទ៖ សេរី មង្គល