តារាចម្រៀងស្រីស្អាត រ៉ាប៊ី ប្រែប្រួលតម្លៃខ្លួន ខណៈត្រៀមលេចមុខក្នុងព្រឹត្តិការណ៍ធំស្អែកនេះ

2019-04-12 07:23:54
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងស្រីស្អាត រ៉ាប៊ី របស់ផលិតកម្មថោន បានប្រែប្រួលតម្លៃខ្លួនខ្លះ ខុសពីពេលមុន ចាប់តាំងពីនាងផ្ដើមមានទីផ្សារកាន់តែច្រើន ពិសេសក្នុងរដូវបុណ្យជាតិធំៗ ដូចជាបុណ្យចូលឆ្នាំប្រពៃណីជាតិខ្មែរនេះតែម្ដង។

កាលពី២០១៨ រ៉ាប៊ី ដែលផ្ទុះខ្លាំងជាមួយបទ "មាន់ស្រែ" ល្បីមានតម្លៃខ្លួនប្រមាណ១៥០០ដុល្លារសម្រាប់ការចេញច្រៀងតាមកម្មវិធីតន្ត្រីធំៗ។ ជាមួយតម្លៃពលកម្មប៉ុណ្ណេះ ក៏មានព័ត៌មានទៀតថា នាងអាចរកចំណូលដល់រាប់ម៉ឺនដុល្លារក្នុង១ខែ ស្របពេលសាមីខ្លួនធ្លាប់បានសារភាពថា នាងទទួលបានកម្មវិធីច្រើនរហូតស្ទើរមិនអាចចែកខ្លួនទៅធ្វើបានទៀតកាលពីវេលានោះ។

ដោយឡែក មកដល់ឆ្នាំ ២០១៩ មានប្រភពមួយបង្ហើបទៀត តម្លៃខ្លួនរបស់ រ៉ាប៊ី នាពេលនេះ បានឈានដល់ជាង ២០០០ដុល្លារទៅហើយ។ ប្រភពម្នាក់បង្ហើបថា "អូហ៍តាមដឹង នាងស៊ីថ្លៃចង់ចូល២០០០ជាងអីហើយ"។តាមតួលេខនេះ បង្ហាញថា រ៉ាប៊ី ប្រែប្រួលតម្លៃពលកម្មស្ទើរ ៥០% ទៅនឹងតួលេខចាស់។ យ៉ាងនេះក្ដី ប្រភពមិនហ៊ានអះអាងទេថា វាតម្លៃថេរសម្រាប់កម្មវិធីទូទៅ ឬគ្រាន់តែជាតួលេខឡើងបណ្ដោះអាសន្នក្នុងរដូវបុណ្យជាតិធំៗដូច្នេះនោះឡើយ។

រ៉ាប៊ី រួមជាមួយមិត្តរួមអាជីពផ្សេងទៀត ដូចជា លោក ខេម លោក ខាន់ ជេមស៍ និងកញ្ញា កែវ សុបញ្ញា ជាដើម គ្រោងនឹងឡើងឆាកតន្ត្រីជាមួយគ្នាក្នុងព្រឹត្តិការណ៍តន្ត្រីដ៏ធំមួយសម្រាប់អបអរបុណ្យចូលឆ្នាំប្រពៃណីជាតិខ្មែរឆ្នាំ ២០១៩។ ព្រឹត្តិការណ៍ ត្រូវគេហៅថា "សង្ក្រាន្តស្កាយលេនស៍" ដោយសារប្រារព្ធធ្វើឡើងនៅក្នុងទីតាំង ស្កាយលេនស៍ ស្ថិតនៅតំបន់អរិយក្សត្រ ដែលគេដឹងថាជារបស់ ឧកញ៉ា ស្រី ចាន់ថន។

តាមលោក បានី វីរៈរិទ្ធ ហៅ ពៅ ជាអ្នកគ្រប់គ្រងកម្មវិធីតន្ត្រីខាងលើបានឲ្យដឹងថា កម្មវិធីដែលតារាចម្រៀងផលិតកម្មថោន រ៉ាប៊ី និងតារាចម្រៀងល្បីៗរបស់កម្ពុជាមួយចំនួន នឹងត្រូវចូលរួមនេះ គឺជាព្រឹត្តិការណ៍តន្ត្រីដ៏ធំមិនធ្លាប់មាន ដោយនឹងត្រូវធ្វើនៅទីតាំងក្រោមដីថែមទៀត។ កម្មវិធីគ្រោងនឹងប្រារព្ធឡើងរយៈពេល៣ថ្ងៃ ដោយដើរទន្ទឹមគ្នានឹងពិធីបុណ្យចូលឆ្នាំប្រពៃណីជាតិខ្មែរតែម្ដង ដើម្បីលើកកម្ពស់សិល្បៈវប្បធម៌ និងផ្ដល់ភាពសប្បាយរីករាយដល់បងប្អូនប្រជាពលរដ្ឋក្នុងតំបន់។

រូបភាព៖ ហ្វេសប៊ុក រ៉ាប៊ី

វិលមករឿងតម្លៃពលកម្មរបស់កញ្ញា ផាន វីរ៉ាទី ហៅ រ៉ាប៊ី អ្នកគ្រប់គ្រងកម្មវិធី សុំមិនអធិប្បាយវែងឆ្ងាយលើករណីនេះ ដោយលោកលើកឡើងថា មិនបានដឹងទេ។ "អូហ៍ បើសួររឿងកម្មវិធីហ្នឹងម៉េចអីម៉េច អាហ្នឹងខ្ញុំដឹង ខ្ញុំអាចនិយាយបាន តែនិយាយតម្លៃខ្លួនអីហ្នឹង ប្រាប់អត់កើតទេ"។ លោក ពៅ បញ្ជាក់ថា ម្យ៉ាងក៏លោកអត់ដឹងដែរពីរឿងនេះដែរ ព្រោះមានមនុស្សផ្សេងទៀត ក្នុងក្រុមការងារលោកជាអ្នកធ្វើការលើរឿងនេះ៕

អត្ថបទ៖ ទារិកា