បញ្ជីឈ្មោះកម្ពុជាចេញប្រហែលជា៣ថ្ងៃមុនប្រកួតប៉ុណ្ណោះ

2019-05-30 02:22:40
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់មិញនេះគ្រូបង្វឹកបាល់ទាត់ជម្រើសជាតិកម្ពុជាលោក Felix G. Dalmas និងអ្នកចាត់ការទូទៅលោក ឈូក ពិសិដ្ឋ បានសំណេះសំណាល់ជាមួយអ្នកគាំទ្រអំពីស្ថានភាពរបស់ក្រុមបាល់ទាត់ជម្រើសជាតិកម្ពុជាដែលត្រៀមខ្លួនប្រកួតវគ្គជម្រុះ FIFA World Cup 2022 និង Asian Cup 2023 នាថ្ងៃទី៦ ខែមិថុនាខាងមុខនេះ។

ក្រុម U23 កម្ពុជា

ក្នុងការផ្សាយផ្ទាល់លើផេកផ្លូវការសំណេះសំណាល់នេះ អ្នកគាំទ្រជាច្រើនដែលបានចូលមើលចង់ដឹងអំពីការបញ្ចេញបញ្ជីឈ្មោះក្រុមជម្រើសជាតិកម្ពុជា ពីព្រោះការប្រកួតកាន់តែខិតជិតមកដល់ហើយ។ ឆ្លើយតបនឹងការចង់ដឹងនេះ លោក Felix បានប្រាប់ថា **ការប្រកាសបញ្ជីឈ្មោះក្រុមជម្រើសជាតិកម្ពុជាអាចនឹងធ្វើនៅយប់ថ្ងៃអាទិត្យ ទី២ ខែមិថុនា ឬ ព្រឹកថ្ងៃចន្ទ ទី៣ ខែមិថុនា ខាងមុខនេះ** ។

ប្រសិនបើការប្រកាសបញ្ជីឈ្មោះក្រុមជម្រើសជាតិនៅថ្ងៃទី២ ឬទី៣ ខែមិថុនាខាងមុននេះគឺមានន័យថា ក្រុមជម្រើសជាតិកម្ពុជាមានពេលប្រហែលជា៣ថ្ងៃប៉ុណ្ណោះដើម្បីប្រមូលផ្តុំហ្វឹកហាត់ ខណៈការប្រកួតផ្លូវការនឹងធ្វើនៅថ្ងៃទី៦ ខែមិថុនា។

លោក Felix

ជុំវិញការប្រកាសបញ្ជីឈ្មោះ និងប្រមូលផ្តុំហ្វឹកហាត់រយៈពេលខ្លីនេះត្រូវបានលោកគ្រូបង្វឹកជនជាតិប្រេស៊ីល Felix បានលើកហេតុផលថា ការពិតនរណាក៏ចង់បានពេលវេលាវែងដើម្បីប្រមូលផ្តុំហ្វឹកហាត់ដែរ ប៉ុន្តែការប្រមូលផ្តុំរយៈពេលខ្លីនេះគឺផ្អែកលើស្ថានភាព៣យ៉ាង។

ទី១៖ អនុលោមតាមពេលវេលាប្រមូលផ្តុំរបស់ FIFA ដែលបានកំណត់។ សហព័ន្ធកីឡាបាល់ទាត់ពិភពលោក FIFA បានកំណត់ថ្ងៃប្រមូលផ្តុំគឺ ទី៣ ខែមិថុនា។
ទី២៖ លីគបាល់ទាត់កំពូលកម្ពុជានៅបន្តប្រកួតចុងសប្តាហ៍នេះពោលគឺសៅរ៍ អាទិត្យ ទី២ និងទី៣ ខែមិថុនា។ ដូច្នេះសហព័ន្ធកីឡាបាល់ទាត់កម្ពុជាចង់ឲ្យមានការទំនាក់ទំនងល្អជាមួយក្លឹបក្នុងលីគដោយមិនរំខាន់ ឬក៏ធ្វើឲ្យប៉ះពាល់ដល់ការប្រើប្រាស់កីឡាកររបស់ក្លឹបឡើយ ខណៈពេលលីគកំពុងដំណើរការប្រកួត។
ទី៣៖ ទោះជាមានពេលប្រមូលផ្តុំខ្លីក៏ដោយ ប៉ុន្តែគ្មានផលប៉ះពាល់ជាដុំកំភូនឡើយ។ គ្រប់គ្នាដឹងហើយ កីឡាករមានកម្លាំងគ្រប់គ្រាន់ និងមានបច្ចេកទេសស្រាប់ហើយដោយសារពួកគេលេងក្នុងលីគជាប់រហូត។

ក្រុមបាល់ទាត់ជម្រើសជាតិកម្ពុជានឹងបើកទ្វារស្វាគមន៍ក្រុមជម្រើសជាតិប៉ាគីស្ថាន នៅថ្ងៃទី៦ ខែមិថុនា ឆ្នាំ២០១៩ខាងមុខនេះ ជើងទី១នៃយុទ្ធនាការណ៍ World Cup 2022 និង Asian Cup 2023 ខណៈជើងទី២ថ្ងៃទី១១ ខែមិថុនា នៅប្រទេសកាតារ៕

អត្ថបទ៖ ជាន ចាន់រ៉ា