ព្រោះហេតុផលពិសេសនេះ ទើបឡាន ដូណាល់ ត្រាំ តែងបង្ហាញមុខ ២ គ្រឿងដំណាលគ្នា
- 2019-06-04 07:26:08
- ចំនួនមតិ 0 | ចំនួនចែករំលែក 0
ព្រោះហេតុផលពិសេសនេះ ទើបឡាន ដូណាល់ ត្រាំ តែងបង្ហាញមុខ ២ គ្រឿងដំណាលគ្នា
ចន្លោះមិនឃើញ
The Beast គឺជារថយន្តពាសដែកល្បីឈ្មោះ ដែលត្រូវបានប្រើជាមធ្យោបាយសម្រាប់ប្រធានាធិបតីសហរដ្ឋអាមេរិកយូរឆ្នាំមកហើយ។ មកទល់ពេលនេះ The Beast ចេញបានពីរជំនាន់ហើយ ដោយជំនាន់ចុងក្រោយនេះបានប្ដូររូបរាងថ្មី និងបន្ថែមសមត្ថភាពការពារខ្លាំងក្លាជាងមុន។ ខាងក្រោមនេះជាការពិតដ៏អស្ចារ្យ ៩ ចំណុចពីរថយន្តដឹកប្រធានាធិបតីអាមេរិក ដែលអាចឲ្យអ្នកភ្ញាក់ផ្អើលមិនស្ទើរពេលដឹងរួច ៖
១. តម្លៃចំណាយលើការស្រាវជ្រាវនិងអភិវឌ្ឍ
រថយន្ត The Beast 2.0 បានស្ថិតក្នុងការអភិវឌ្ឍអស់រាប់ឆ្នាំមកហើយ។ រយៈពេលកន្លងមកនេះមានពាក្យចចាមអារ៉ាមថាក្រុមហ៊ុន General Motor បានចំណាយប្រមាណ ១៥ លានដុល្លារទៅលើការស្រាវជ្រាវនិងអភិវឌ្ឍតែមួយមុខ ដើម្បីបង្កើនភាពខ្លាំងរបស់រថយន្ត។
២. រថយន្តដែលដូចជារថក្រោះ
ការចំណាយរាប់លានដុល្លារលើការស្រាវជ្រាវនិងអភិវឌ្ឍធ្វើឲ្យគេផលិតបានរថយន្តដែលរឹងមាំដូចជារថក្រោះដោយទ្វាររថយន្តមានកម្រាស់ដល់ ២០ ស.ម, កញ្ចក់ដែលអាចបញ្ឈប់គ្រាប់កាំភ្លើង A.44 Magmum, តួខ្លួនពាសដែកកម្រាស់ ១២,៧ ស.ម និង បាតរថយន្តពាសដែកដែលអាចការពារប្រធានាធិបតីពីគ្រាប់បែកដៃ និង គ្រាប់បែកដែលបោះចូលក្រោមរថយន្តបាន។ មិនតែប៉ុណ្ណោះធុងផ្ទុកប្រេងឥន្ធនៈក៏ពាសដែកដែរ ដោយវាមានផ្ទុកនូវសារធាតុហ្វូមពិសេស ប្រសិនបើធ្លុះធ្លាយកន្លែងណាហ្វូមនឹងទៅផ្ចិតរន្ធនោះភ្លាម។
៣. តម្លៃ
ដោយសារភាពខ្លាំងទាំងប៉ុន្មានខាងលើធ្វើឲ្យរថយន្តនីមួយៗរបស់ប្រធានាធិបតីត្រូវចំណាយ ១,៥ លានដុល្លារដើម្បីផលិតឡើង។ តម្លៃថ្លៃហើយសូម្បីតែប្រេងឥន្ធនៈក៏ស៊ីច្រើនដែរដោយ ១០០ គីឡូម៉ែត្រចំណាយប្រេងឥន្ធនៈអស់ ៥៨,៨ លីត្រឯណោះ។
៤. ល្បឿន
រថយន្តដឹកប្រធានាធិបតីដើម្បីបង្កើនសន្ទុះដល់ ១០០ គ.ម/ម៉ បានត្រូវប្រើពេល ១៥ វិនាទីឯណោះ។ ត្បិតថារថយន្តអាចបង្កើនសន្ទុះយឺត ប៉ុន្តែអ្នកបើកបរដែលជាភ្នាក់ងារសម្ងាត់ទទួលបានការហ្វឹកហាត់ដ៏ពិសេសអាចធ្វើឲ្យរថយន្តដ៏ធ្ងន់នេះបើកដូចជារថយន្ត Ferrari យ៉ាងអ៊ីចឹង។ វគ្គបើកបរពិសេសដែលតៃកុងបានឆ្លងកាត់នឹងធានាថាគេអាចបញ្ជារថយន្តចេញពីស្ថានភាពគ្រោះថ្នាក់បានគ្រប់ពេល។
៥. មិនមែនមានតែមួយ
នៅក្នុងក្បួនដង្ហែនីមួយៗអ្នកអាចនឹងឃើញថាមានរថយន្តម៉ូដែល Limousineនេះប្រហែល ២-៣ គ្រឿងបានបង្ហាញខ្លួន ដោយគេប្រើវាសម្រាប់ដឹកបុគ្គលសំខាន់ៗ ហើយអ្វីដែលសំខាន់ប្រើជានុយ។ ពេលដែលរថយន្តដូចគ្នាបង្ហាញខ្លួនក្នុងពេលតែមួយ នោះឃាតកមិនអាចកំណត់បានទេថារថយន្តមួយណាដែលដឹកប្រធានាធិបតីនោះ។
៦. តែងដឹកទៅមុន
ពេលដែលប្រធានាធិបតីធ្វើដំណើរទៅកាន់ប្រទេសណាមួយ គេតែងប្រើយន្តហោះចម្បាំងរបស់កងទ័ពអាមេរិកដើម្បីដឹករថយន្តទៅដល់គោលដៅមុន ដើម្បីត្រៀមសម្រាប់ការមកដល់របស់ប្រធានាធិបតី។
៧. ក្បួនដង្ហែមិនតូចឡើយ
តាមការឲ្យដឹងរបស់អតីតភ្នាក់ងារឲ្យដឹងថាក្បួនដង្ហែប្រធានាធិបតីអាមេរិកតែងមានការចូលរួមពីរថយន្តយ៉ាងតិចបំផុត ១០ គ្រឿងដើម្បីធានាឲ្យបានសុវត្ថិភាពខ្ពស់។ ប្រសិនបើស្ថិតនៅតំបន់ដែលគេយល់ថាមានគ្រោះថ្នាក់ខ្ពស់នោះក្បួនដង្ហែកាន់តែធំដោយអាចមានការចូលរួមពីរថយន្ត ៤០ គ្រឿង បូករួមនឹងម៉ូតូជាច្រើនគ្រឿងទៀត។
៨. អង្កេតជាប់ជានិច្ច
ក្រៅពីអង្កេតមើលមនុស្សស្ថានភាពនៅជុំវិញដោយមិនងាយនឹងប៉ប្រិចភ្នែកហើយ ភ្នាក់ងារពិសេសទាំងអស់ថែមទាំងស្ដាប់រលកសញ្ញាដែលអាចផ្ដល់ជាការគំរាមកំហែងដល់ប្រធានាធិបតីទៀតផង។
៩. មុខងារការពារពិសេសមិនចាញ់រថយន្តក្នុងរឿង 007
មុខងារពិសេសៗនិងទំនើបៗរួមមាន កាមេរ៉ាសម្រាប់មើលពេលយប់, គ្រាប់បែកទឹកភ្នែក, ឧបករណ៍ពន្លត់អគ្គីភ័យ និង អាចទប់ទល់នឹងការវាយលុកដោយសារធាតុគីមីជាដើម៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
