ធនាគារអាមេរិកកំពុងភ័យខ្លាច នឹងកម្មវិធីទូទាត់លុយរបស់ចិន
- 2019-06-05 04:42:13
- ចំនួនមតិ 0 | ចំនួនចែករំលែក 0
ធនាគារអាមេរិកកំពុងភ័យខ្លាច នឹងកម្មវិធីទូទាត់លុយរបស់ចិន
ចន្លោះមិនឃើញ
នៅប្រទេសចិន ពលរដ្ឋភាគច្រើនប្រើប្រាស់កម្មវិធីទូរសព្ទដែលគ្រប់គ្រងដោយ Alibaba និង Tencent ដើម្បីធ្វើរឿងជាច្រើនយ៉ាង ដូចជា Chat, ទិញទំនិញអនឡាញ, ផ្ញើលុយឲ្យគ្នាទៅវិញទៅមក និងអាចទិញទំនិញពីហាងខាងក្រៅបានទៀតផង។
នេះជាចំណុចគួរឲ្យព្រួយបារម្ភមួយសម្រាប់ថ្នាក់ដឹកនាំផ្នែកហិរញ្ញវត្ថុរបស់សហរដ្ឋអាមេរិក ដោយសារវិធីសាស្ត្រមួយនេះធ្វើឲ្យធនាគារមិនអាចរកប្រាក់កម្រៃបានពីការទូទាត់។ ជាក់ស្ដែងទៅប្រជាជនចិនភាគច្រើនមិនមានគណនីធនាគារ។ ចិនជាប្រទេសមួយដែលបានបង្ហាញថាការទូទាត់សាច់ប្រាក់អាចធ្វើឡើងងាយស្រួល និងចំណាយកម្រៃតិច ដោយមិនត្រូវការគណនីធនាគារ ឬកាតធនាគារនោះឡើយ។
ផ្ទុយទៅវិញអតិថិជននៅអាមេរិក នៅតែពឹងផ្អែកលើធនាគារសម្រាប់ការទូទាត់សាច់ប្រាក់ភាគច្រើន។ សូម្បីតែការទូទាត់តាមទូរសព្ទ ដែលធ្វើឡើងតាមរយៈ Apple Pay, Uber ឬ Venmo គឺមានភ្ជាប់ជាមួយនឹងគណនីធនាគារ ឬកាតធនាគាររបស់អ្នកប្រើប្រាស់។
វិធីនេះអាចឲ្យក្រុមហ៊ុនដែលទទួលរ៉ាប់រងលើដំណើរការនៃការទូទាត់នេះ រកចំណូលបានច្រើនសន្ធឹកពីការគិតកម្រៃ។ នៅសហរដ្ឋអាមេរិក ការទិញទំនិញតាមកាតធនាគារចំនួន ១០០ ដុល្លារ មាន ៩៧,២៥ ដុល្លារបានទៅហាងទំនិញ ហើយនៅសេសសល់គឺត្រូវចែកគ្នាជាមួយប្រព័ន្ធកាត (Visa ឬ Mastercard), ធនាគាររបស់អតិថិជន, ក្រុមហ៊ុនផ្ដល់សេវាទូទាត់ និងធនាគាររបស់ហាង។ ទំហំលុយតិចតួចនេះ ប្រមូលផ្ដុំគ្នាអាចឲ្យធនាគារកើបលុយបានរាប់ពាន់ដុល្លារក្នុងមួយឆ្នាំៗ។
ប្រសិនបើកម្មវិធីទូទាត់ដូចនៅចិន អាចដណ្ដើមទីផ្សារពីធនាគារបាន ក្នុងទំហំប៉ុនគ្នាដូចនៅប្រទេសចិននោះ ធនាគារអាចនឹងបាត់បង់ចំណូលប្រមាណ ៤៣ ពាន់លានដុល្លារ ពីជំនួញដែលងាយស្រួលកើបលុយរបស់ពួកគេ៕
ចុចអាន ៖ រថយន្ត SUV ខ្នាតតូចវៀតណាមចេញលក់ពេញប្រទេសហើយ ដាក់ឲ្យបើកសាកទៀត