Apple ជា​អ្នក​បង្កើត​ទំនោរ​ក្បាល​ឆក ២ ឆ្នាំ​មុន ពេលនេះក្រុមហ៊ុនដទៃព្យាយាមសម្លាប់វាចោល

  • 2019-06-09 07:33:41
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ស្មាតហ្វូន​មាន​រចនាបថ​ក្បាល​ឆក​បាន​លេច​មុខ​ដំបូង​នៅ​ឆ្នាំ ២០១៧ ហើយ​នៅ​ឆ្នាំ ២០១៨ វា​ចាប់​ផ្ដើម​ទទួល​បាន​ការ​ពេញ​និយម​ខ្លាំង។ ចូល​ដល់​ឆ្នាំ ២០១៩ មាន​ក្រុមហ៊ុន​ជា​ច្រើន​ព្យាយាម​សម្លាប់​ក្បាល​ឆក​នេះ​ចោល មុន Apple លើក​ដៃ​ពិឃាដ​ក្បាល​ឆក​នេះ។

  • រាប់​ឆ្នាំ​មក​ហើយ​ស្មាតហ្វូន​មាន​​​បំពាក់​អេក្រង់​រាង​បួន​ជ្រុង។
  • ក្រោយ​មក​នៅ​ឆ្នាំ ២០១៧ ​អេក្រង់​ក្បាល​ឆក​បាន​បង្ហាញ​ខ្លួន។

  • វា​កើត​មាន​មុន​គេ​​លើ​ស្មាតហ្វូន​ Sharp Aquos S2 ដែល​បាន​ឆ្កៀល​អេក្រង់​មួយ​ចំណិត​​ដើម្បី​បំពាក់​កាមេរ៉ា Selfie។

  • នៅ​ឆ្នាំ​ដដែល Apple បាន​ប្រកាស​ចេញ iPhone X ដែល​​​មាន​រចនាបថ​អេក្រង់​ក្បាល​ឆក វា​ជា​ទីតាំង​សម្រាប់​​ផ្ទុក​​ប្រព័ន្ធ​កាមេរ៉ា TrueDepth ដែល​មាន​កាមេរ៉ា Selfie និង Sensor សម្រាប់​ដំណើរ​ការ​មុខងារ​ស្កេន​មុខ Face ID។
  • ​ក្បាល​ឆក​នេះ​ជា​ចន្លោះ​ប្រហោង​នៃ​ការ​បោះ​ជំហាន​ទៅ​កាន់​ស្មាតហ្វូន​មាន​អេក្រង់​លាត​ពេញ​ផ្ទៃ។ ក្បាល​ឆក​ជា​ដំណោះ​ស្រាយ​ងាយ​ស្រួល​មួយ ដើម្បី​ផលិត​បាន​ស្មាតហ្វូន​មាន​អេក្រង់​លាត និង​មាន​​កាមេរ៉ា Selfie មក​ជា​មួយ។
  • ត្បិត​ថា​ជា​ចន្លោះ​ប្រហោង​មួយ​ ប៉ុន្តែ​ក្បាល​ឆក​នេះ​បាន​កើត​មាន​​គ្រប់​ទី​កន្លែង​នៅ​ឆ្នាំ ២០១៨ វា​មាន​នៅ​លើ​ស្ទើរ​គ្រប់​ស្មាតហ្វូន​របស់​ក្រុមហ៊ុន​​ទូរសព្ទ​ល្បីៗ។

  • ដូច​ជា LG G7 ThinQ

  • Huawei P20 Pro
  • Asus Zenfone 5
  • OnePlus 6T
  • និង Pixel 3 XL របស់ Google
  • មាន​ក្រុមហ៊ុន​ស្មាតហ្វូន​ផ្សេង​ទៀត​បាន​ក្ដោប​ឱកាស​មាស​នេះ ​ដើម្បី​ហក់​រំលង​ Apple បង្ហាញ​ចេញ​ស្មាតហ្វូន​អេក្រង់​លាត​ពេញ​ផ្ទៃ​ដែល​គ្មាន​ក្បាល​ឆក។
  • ​​​ជាក់​ស្ដែង​ខែ​មិថុនា​ឆ្នាំ​មុន ក្រុមហ៊ុន​ចិន OPPO បាន​បង្ហាញ​ចេញ​ស្មាតហ្វូន Find X ដែល​ប្រើ​ម៉ូទ័រ​ដើម្បី​បង្ហូត​ចេញ​នូវ​កាមេរ៉ា Selfie ចេញ​ពី​តួ​ខ្លួន ពេល​ចង់​ថត​ Selfie។
  • នៅ​ខែ​មករា​ឆ្នាំ​នេះ ​ក្រុមហ៊ុន​ Meizu ក៏​បាន​បង្ហាញ​ចេញ​ស្មាតហ្វូន​ដែល​គ្មាន​ប៊ូតុង, គ្មាន​រន្ធ​សំឡេង, រន្ធ​ដោត និង​គ្មាន​ក្បាល​ឆក​ទៀត​ផង។
  • ប៉ុន្តែ​ឆ្នាំ​នេះ អ្វី​ដែល​គេ​ភ្ញាក់ផ្អើល​បំផុត​គឺ​ Samsung Galaxy A80 ដែល​ប្រើ​ក្បាច់​កាមេរ៉ា​បង្វិល​ យក​កាមេរ៉ា​ក្រោយ​ធ្វើ​ជា​កាមេរ៉ា​មុខ។ ប្រើ​ក្បាច់​ស្រដៀង​គ្នា​នេះ​គឺ Asus Zenfone 6 ដែល​អាច​បង្កើត​បាន​ស្មាតហ្វូន​មាន​អេក្រង់​លាត​សន្ធឹង​ពេញ​ផ្ទៃ​គ្មាន​ក្បាល​ឆក។
  • ក្នុង​សប្ដាហ៍​នេះ​ដែរ ទាំង​ OPPO និង Xiaomi បាន​បង្ហាញ​ខ្លះៗ​អំពី​​ផលិតផល​​ស្មាតហ្វូន​គំរូ​ថ្មី ដែល​មាន​បង្កប់​កាមេរ៉ា Selfie លើ​ផ្ទៃ​អេក្រង់​តែ​ម្ដង មើល​មិន​ដឹង​ថា​ជា​កាមេរ៉ា Selfie។ ប៉ុន្តែ​មិន​ច្បាស់​ថា​ស្មាតហ្វូន​នេះ​បង្ហាញ​មុខ​ជា​ផ្លូវ​ការ​នៅ​ពេល​ណា​នោះ​ទេ៕

ប្រភព៖ Businessinsider   ប្រែ​សម្រួល៖ សុខហេង