ខ្លាំងបាត់! រដ្ឋមន្ត្រីម៉ាំល្ហុងកុម្ម៉ង់ជាងស្រុកខ្មែរធ្វើ Rolls-Royce ឲ្យដូចរបស់សេដ្ឋីអង់គ្លេស

2019-07-04 04:41:58
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពី អ្នកលក់ ម៉ាំល្ហុង លោក អ្នកប្រហែលជាស្គាល់លោក បូរ៉ា យ៉ាងច្បាស់ហើយ ត្បិតអីលោកអ្នកលក់មាំ និងជាតារាចម្រៀងផង តែងនិយមចូលចិត្តធ្វើខ្លួនប្លែកៗ ជាមួយនិងយានជំនិះ ទៅតាមអារម្មណ៍របស់ខ្លួន ដើម្បីឲ្យមហាជនចាប់អារម្មណ៍។ ថ្មីៗនេះ លោក បានបង្ហើបថា ទើបតែទិញ ឡានកញ្ចាស់១គ្រឿង ហើយកុម្ម៉ង់ឲ្យជាងច្នៃចេញជារថយន្តទំនើប Rolls-Royce ដូចទៅនឹងរថយន្តសេដ្ឋីអង់គ្លេសម្នាក់ ដែលដាក់លក់ ក្នុងតម្លៃ រហូតដល់១២លាន ដុល្លារ។

"ខ្ញុំបានឃើញព័ត៌មានសេដ្ឋីអង់គ្លេសម្នាក់ដាក់ Rolls-Royce ដេញថ្លៃដល់ទី១២លានដុល្លារ ខ្ញុំមានចិត្តស្រលាញ់ឡានហ្នឹងតែម្ដង ហើយខ្ញុំសន្យាថា និងធ្វើវាឲ្យបាន ក៏ដាច់ចិត្តខ្ចីលុយអង្គការទិញ អាកាមេរី៩១ ឲ្យជាងច្នៃឲ្យដូចតែម្ដង" លោក បូរ៉ា លើកឡើង។

Rolls-Royce ក្នុងក្ដីស្រមៃ របស់លោកបូរ៉ា ហើយនឹងក្លាយជា ឡាន Rolls-Royceទី២ របស់លោកនោះ បូកទាំងថ្លៃជាងធ្វើ ភ្លើង និង កាត់ទូសម្រាប់ដាក់ម៉ាំផងនេះ ត្រូវអ្នកលក់ម៉ា មានកំណើតមកពីខេត្តតាកែវរូបនេះ បង្ហើបថា ត្រូវចំណាយអស់ប្រហែលខ្ទង់ជា ៧០០០ ដុល្លារ ក្នុងនោះ ថ្លៃឡាន២៥០០ ដុល្លារ ថ្លៃកែ៣៥០០ ដុល្លារ ដាក់ភ្លើង ២០០ ដុល្លារ កាត់ទូកញ្ចក់ ជិត៤០០ ទៀត។

នេះមិនមែនជាលើកទី១ទេ ដែលអ្នកលក់មុំាល្បីឈ្មោះរូបនេះបានកែច្នៃឡាន កន្លងមក លោកធ្លាប់បាន ច្នៃឡាន វ៉ៃកូនហ្គោល មកជារថយន្ត Rolls-Royce ពណ៌លឿង១គ្រឿងម្ដងរួចមកហើយ បច្ចុប្បន្នកំពុងតែដឹកលក់ម៉ាំរាល់ថ្ងៃ។ កាលណោះលោកបានចំណាយក្នុងការច្នៃវាឡើង អស់ប្រាក់ជិត៥០០០ ដុល្លារឯណោះ។

មុនឈានវិវត្តទិញឡានដឹកម៉ាំ ដំបូងឡើយមុខរបររបស់លោក បូរ៉ា ផ្ដើមពីការដឹកតាមកង់លក់ ប៉ុន្តែដោយមានគំនិត ច្នៃប្រឌិតបូកទាំងទេពកោសល្យ ដូចជាការតុបតែងខ្លួនជាមួយយានជំនិះ លោកបូរ៉ា ក៏បានវិវត្តខ្លួនពីការដឹកម៉ាំលក់តាមកង់ មកដឹកជាម៉ូតូ ហើយចុងក្រោយ គឺឈានដល់ឡានតែម្ដង។ បច្ចុប្បន្នបូកទាំង Rolls-Royce ដែលកំពុងច្នៃនេះ អ្នកលក់ម៉ាំរូបនេះ មានឡាន៣គ្រឿងឯណោះ ឡានដែលសម្រាប់ជិះទៅមកណាមកណា ផ្ទាល់ខ្លួនគឺ លុចស៊ីស ៣០០ ។

បើនិយាយរឿងម៉ូតូវិញ លោកថា បានទិញម៉ូតូចាស់ មកកែអស់មិនក្រោម៣០គ្រឿងឡើយ ម៉ូតូទាំងនោះមួយចំនួនលោកបានឲ្យកូនចៅជិះលក់ តាមខេត្ត ហើយខ្លះទៀត ស៊ីដាច់ក៏មាន។

លោក បូរ៉ា អាចចាត់ទុកថា ជាមនុស្សម្នាក់ធ្វើឲ្យទីផ្សារម៉ាំ ស្រុកខ្មែរមានទីផ្សារខ្លាំងជាងមុន ត្បិតអី លោកបានបណ្ដុះអ្នកលក់ម៉ាំ ធ្វើខ្លួនដូចតារា មិនក្រោយ៥០រូបឡើយ ពួកគេទាំងនោះបច្ចុប្បន្នភាគច្រើនកំពុងតែចុះលក់តាមខេត្ត ហើយមួយចំនួនធំបានចេះ ពីរបៀបផលិតម៉ាំ ។ ទទឹមគ្នានោះដែរ កូនចៅរបស់លោក មួយចំនួនក៏មានឱកាសបានក្លាយជាតារាដូចជា លោកផងដែរ។

ងាកមកវិស័យសិល្បៈ លោក បូវ៉ា ដោយសារតែមុខរបរលក់ម៉ាំនេះ ត្រូវបានអ្នកដឹកនាំសិល្បៈហៅថតជាច្រើន ពោលគឺស្ទើរផលិតកម្មតែម្ដង ដែលសរុប MV ដែលលោកបានថតនោះ មិនក្រោម២០ទៅ៣០បទឡើយ។ ដោយឡែកស្ប៉តពាណិជ្ជកម្ម និងភាពយន្តក៏អ្នកលក់ម៉ាំរូបនេះ បានថតមួយចំនួនផងដែរ ។ Rolls-Royceពណ៌លឿង ដែលលោកច្នៃឡើងកន្លងមក ក៏ធ្លាប់បានជួល ថតភាពយន្តក៏ដូចជាខារ៉ាអូខេ ជាច្រើនលើកផងដែរ។

ចំពោះ Rolls-Royce ទី២ ដែលជាងកំពុងតែញាប់ដៃញាប់ជើងច្នៃឡើងនេះ ក៏ត្រូវបានលោកប្រាប់ថា មានអ្នកដឹកនាំសម្ដែងនៅតាមផលិតកម្មចាប់អារម្មណ៍ច្រើនណាស់ ពេលធ្វើរួច គឺច្បាស់ជា មានគេជួលថតជាបន្តបន្ទាប់ ជាក់ជាមិនខាន។

លោក បូរ៉ា បានបញ្ជាក់ជាចុងក្រោយថា ការច្នៃឡានទាំងអស់ឡើង មិនមែនមានគោលដៅសម្រាប់លក់ឡើយ គឺសម្រាប់តែជាការកម្សាន្តជាមួយ នឹងមុខរបរលក់ម៉ាំ របស់លោក ឲ្យមហាជនចាប់អារម្មណ៍សប្បាយចិត្តប៉ុណ្ណោះ។ ទទឹមគ្នានោះដែរ លោកក៏សូមស្នើទៅដល់សមត្ថកិច្ចមេត្តាយោគយល់ កុំចាប់ពិន័យលោកអី ព្រោះដូចបានលើកឡើង គឺលោកធ្វើឡើង គឺសម្រាប់តែជាការកម្សាន្ត ឲ្យមហាជនចាប់អារម្មណ៍សប្បាយចិត្តប៉ុណ្ណោះ៕