សម័យបច្ចេកវិទ្យា បើរៀនមិនចេះ ត្រូវបន្ទោសខ្លួនឯង

2019-07-08 07:02:42
ចំនួនមតិ 0 | ចំនួនចែករំលែក 0

ចន្លោះមិនឃើញ

"សម័យនេះបើអ្នករៀនមិនចេះ កុំបន្ទោសនរណាទាំងអស់ ត្រូវបន្ទោសខ្លួនឯង"។ ការលើកឡើងបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡា។

នាឱកាសបើកសម្ពោធគម្រោងប្រកួតប្រជែងគំនិតអាជីវកម្មបែបបច្ចេកវិទ្យា SmartStart កាលពីម្សិលមិញលោក ហង់ ជួនណារ៉ុន បានលើកឡើងថា ក្នុងសម័យឌីជីថលដែលកំពុងរីកចម្រើនឥតឈប់ឈរដូច្នេះ សិស្សានុសិស្សទាំងអស់ អាចស្វែងរកព័ត៌មានយ៉ាងទូលំទូលាយនិងគ្មានដែនកំណត់លើ Google។

រដ្ឋមន្ត្រីរូបនេះ បន្ថែមថា ពេលនិស្សិតមិនយល់ត្រង់ចំណុចណាមួយនៃមេរៀន ពួកគេអាចស្វែងរកព័ត៌មាននិងសិក្សាបន្ថែមលើអនឡាញ ដូចជាតាមរយៈ Google ជាដើម។ ដូច្នេះ គ្មានពាក្យថា មកពីសាលា គ្រូ ឬដោយសារក្រសួងទៀតឡើយ។

ការថ្លែងដូច្នេះ លោកសង្កត់ធ្ងន់ចង់ឲ្យសិស្សនិស្សិតទាំងអស់ផ្លាស់ប្ដូរការគិតនិងរបៀបរៀនសូត្រ តាមរយៈការប្រឹងប្រែងបន្ថែមដោយខ្លួនឯង និងប្រើបច្ចេកវិទ្យាទំនើប ដើម្បីទទួលចំណេះដឹងថ្មីៗលើសពីអ្វីដែលបានពីសាលា។

លោកបានបញ្ជាក់ថា បដិវត្តន៍ឧស្សាហកម្មទី ៤ ដែលផ្ដោតលើបច្ចេកវិទ្យាឌីជីថល និងការធ្វើស្វ័យប្រវត្តិកម្មជាដើម នឹងមកដល់នាពេលដ៏ឆាប់ខាងមុខ។ ដូច្នេះយុវជនកម្ពុជាជំនាន់ក្រោយ ត្រូវបំប៉នសមត្ថភាពខ្លួន លើចំណេះដឹងនិងជំនាញផ្នែកព័ត៌មានវិទ្យាឲ្យខ្លាំងក្លាឡើង ដើម្បីជួយជាតិឲ្យកាន់តែរីកចម្រើន៕

អត្ថបទ៖ ប៉ែត ផាន់និត