៣ វិធីអាចធ្វើឲ្យម៉ាស៊ីនត្រជាក់ឡាន ត្រជាក់បានលឿន មិនសូវស៊ីសាំងទៀត

2019-07-12 04:47:35
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវក្ដៅ មិនថារថយន្តរបស់អ្នកបានចតនៅក្នុងម្លប់នៅពេលទុកចោលយូរ វានឹងឡើងកម្ដៅជាក់ជាមិនខាន។ បើនិយាយពីរថយន្តដែលចតក្រោមកម្ដៅថ្ងៃវិញគឺចប់តែម្ដង ក្ដៅដូចឡដុតឥដ្ឋអ៊ីចឹង។

លើសពីនេះទៅទៀត ដោយសារតែរថយន្តមានបង្អួចកញ្ចក់ វាបង្កើតបានជាឧស្ម័នផ្ទះកញ្ចក់ ដែលធ្វើឲ្យកម្ដៅចូលមកក្នុងរថយន្តបាន តែចេញក្រៅវិញមិនបាន ជាហេតុធ្វើឲ្យក្នុងរថយន្តមានសីតុណ្ហភាពក្ដៅជាងខាងក្រៅទៅទៀត គឺក្ដៅជាងប្រហែល ១០ អង្សារ (ពេលទុកចោលយូរ)។

ដោយហេតុថា ក្នុងរថយន្តក្ដៅខ្លាំងយ៉ាងនេះ ទើបមានអ្នកប្រើប្រាស់មួយចំនួន បើកម៉ាស៊ីនត្រជាក់មួយកប់លេខ។ ប៉ុន្តែវិធីសាស្ត្រនេះ មិនសូវមានប្រសិទ្ធភាពទេ ដែលវាអាចចំណាយពេលដល់ទៅជាង ៥ នាទី ឯណោះល្មមបានសីតុណ្ហភាពត្រជាក់តាមចិត្តចង់។ វិធី ៣ យ៉ាងធ្វើឲ្យម៉ាស៊ីនត្រជាក់រថយន្តអ្នក ធ្វើការបានលឿន មិនសូវប្រឹងខ្លាំង និងជួយឲ្យវាស៊ីសាំងតិចជាងមុនផងដែរ។

១. ឲ្យខ្យល់ក្ដៅចេញពីរថយន្តឲ្យអស់សិន

វិធីងាយៗដើម្បីឲ្យខ្យល់ក្ដៅចេញពីរថយន្តគឺ ត្រូវទម្លាក់កញ្ចក់ទាំង ៤ ចោល ១នាទីសិន មុនពេលចូលទៅក្នុងរថយន្ត ឬក៏ចំហកញ្ចក់ចោលពេលចូលបើកបរប្រហែល ៣០វិនាទី សឹមបើកម៉ាស៊ីនត្រជាក់។ បើសិនឡានមានដំបូលបើក នោះវារឹតតែជាការល្អ ព្រោះខ្យល់ក្ដៅមានមាឌធំ ទម្ងន់ស្រាល អាចហោះឡើងទៅលើបានលឿន។

វិធីមួយទៀតគឺ យើងបើកកញ្ចក់ខាងអ្នកអង្គុយទាំង ៣ (ខាងមុខ ១ ជាប់អ្នកបើកបរ និងខាងក្រោយ ២ កន្លែងអ្នកដំណើរ) ទុកខាងអ្នកបើកបរ ហើយទាញទ្វារខាងអ្នកបើកបរ បិទ បើកៗ ចំនួន ៥ ដង។ វិធីនេះគឺដូចជាប្រើទ្វារខាងអ្នកបើកបរធ្វើជាស្នប់នាំយកខ្យល់ខាងក្រៅចូល និងយកខ្យល់ខាងក្នុងដែលក្ដៅចេញ។

២. ពេលចាប់ផ្ដើមបើកម៉ាស៊ីនត្រជាក់ភ្លាម កុំបើកអស់លេខ

មនុស្សភាគច្រើនយល់ច្រឡំថា ការបើកម៉ាស៊ីនត្រជាក់កប់លេខអាចឲ្យរថយន្តត្រជាក់បានលឿន។ ផ្ទុយទៅវិញ ការបើកម៉ាស៊ីនត្រជាក់ខ្លាំងផុតលេខ ត្រូវការប្រើខ្យល់ក្នុងរថយន្តសុទ្ធដែលជាខ្យល់ក្ដៅជាងខាងក្រៅ។

បើបើកម៉ាស៊ីនត្រជាក់ត្រឹមកម្រិតទាបល្មម វាងាយនឹងទាញយកខ្យល់ខាងក្រៅខ្លះៗ ដែលជាខ្យល់ត្រជាក់ជាងខាងក្នុងជាហេតុធ្វើឲ្យវាត្រជាក់បានលឿន។ ម៉្យាងទៀត ការបើកម៉ាស៊ីនត្រជាក់ខ្លាំង ក៏នាំឲ្យម៉ាស៊ីនប្រឹងខ្លាំង ស៊ីសាំងច្រើនជាងមុនផងដែរ។

៣. ឧស្សាហ៍ពិនិត្យមើលហ្គាសរបស់ម៉ាស៊ីនត្រជាក់

ប្រសិនបើអ្នកអនុវត្តតាមវិធីខាងលើ អស់ហើយម៉ាស៊ីនត្រជាក់នៅដំណើរការយឺតដដែល ឬមិនត្រជាក់តែម្ដង នេះអាចមកពីការលេចធ្លាយហ្គាសត្រជាក់ ដែលជ័រកៅស៊ូសម្រាប់ទប់កុំឲ្យហ្គាសហើរចេញនោះ អាចចាស់ រឹងមិនស្វិតដូចមុន អាចឲ្យមានការលេចធ្លាយបាន។ ប្រការល្អ គួរឲ្យជាងពិនិត្យមើលលើបញ្ហានេះ ឬអាចប្ដូរចេញតែម្ដង។

ចុចអាន៖

ប្រភព៖ acquiringman អត្ថបទ៖ ផាត សុវត្ថិ