Chelsea បានដាក់បម្រាមមិនឲ្យអ្នកគាំទ្រម្នាក់ ចូលមើលប្រកួតក្នុងកីឡដ្ឋានរបស់ខ្លួនអស់មួយជីវិត

2019-07-30 12:36:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Chelsea បានដាក់បម្រាមអ្នកគាំទ្រម្នាក់ មិនឲ្យចូលមើលការប្រកួតរបស់ខ្លួនក្នុងកីឡដ្ឋាន Stamford Bridge ដែលជាការពិន័យលើករណី ស្រែករើសអើង និងមាក់ងាយពូជសាសន៍ ពណ៌សម្បុរ កាលពីខែធ្នូ ឆ្នាំ២០១៨។

អ្នកគាំទ្រចំនួន ៥នាក់ទៀត ក៏ត្រូវបានជាប់បម្រាមក្នុងករណីដូចគ្នាដែរ ប៉ុន្តែហាមមិនឲ្យចូលមើលក្នុងកីឡដ្ឋាន Stamford តែ ២ឆ្នាំទេ។

ខាងក្លឹប Chelsea បានចេញសេចក្ដីថ្លែងការណ៍ថា ក្លឹបពន្យារចាត់វិធានការបែបនេះគឺ ដោយសារតែរង់ចាំការស៊ើបអង្កេតរបស់អាជ្ញាធរ។

សេចក្ដីថ្លែងការណ៍របស់ក្លឹបបានបន្តថា ក្រោយពេលដែលខាងអាជ្ញាធរបានសម្រេចថា ជនជាប់ចោទមិនមានទោសអ្វីឡើយ ក្លឹបក៏បើកការស៊ើបអង្កេតដោយខ្លួនឯង ហើយសម្រេចពិន័យអ្នកគាំទ្រម្នាក់មិនឲ្យចូលមើលការប្រកួតក្នុង Stamford Bridge អស់មួយជីវិត ហើយ ៥រូបទៀត ហាមក្នុងរយៈពេល ២ឆ្នាំ។

គួរបញ្ជាក់ផងដែរថា កាលពីខែធ្នូ ឆ្នាំ២០១៨ កន្លងទៅ អ្នកគាំទ្រ Chelsea ត្រូវបានជាប់ចោទថា បានស្រែករើសអើងពូជសាសន៍ និងពណ៌សម្បុរទៅលើខ្សែស្លាបក្លឹប Manchester City កីឡាករ Raheem Sterling៕

ប្រភព៖ Sky Sports ប្រែសម្រួល៖ ហ៊ីម រស្មី