ពលរដ្ឋឥណ្ឌូនេស៊ី ខឹងសម្បារខ្លាំងក្រោយពេលដាច់ភ្លើងច្រើនម៉ោងនៅចាកាតា

2019-08-06 07:32:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាពលរដ្ឋជាង ៣០លាននាក់ ដែលកំពុងរស់នៅក្នុងរដ្ឋធានីចាកាតានៃប្រទេសឥណ្ឌូនេស៊ី បានបង្ហាញការខឹងសម្បារខ្លាំងក្រោយពេលដាច់ភ្លើងរាប់ម៉ោងកាលពីថ្ងៃអាទិត្យកន្លងទៅ។

ការដាច់ភ្លើងនេះ បណ្ដាលឲ្យអគាររាប់ពាន់ខ្នងនៅរដ្ឋធានីចាកាតា ជួបប្រទះការលំបាកខណៈពេលដែលប្រព័ន្ធធ្វើដំណើរថ្មី ត្រូវបានផ្អាកជាបណ្ដោះអាសន្ន។ ជាមួយគ្នា យោងតាមប្រតិបត្តិករទូរគមនាគមន៍ឲ្យដឹងថាអ្នកធ្វើដំណើរជាច្រើននាក់ ត្រូវបានជួយជម្លៀសចេញពីទូរថភ្លើងប៉ុន្តែមិនមានអ្នករងរបួសនោះទេ។ ចំណែកឯខាងមន្ទីរពេទ្យធំៗ និងព្រលានយន្ដហោះអន្ដរជាតិ Seokarno-Hataa មិនបានទទួលរងផលប៉ះពាល់ពីការដាច់ភ្លើងនោះទេដោយសារពួកគេមានម៉ាស៊ីនភ្លើងសម្រាប់ទុកបម្រុង។

ជាការឆ្លើយតប អ្នកនយោបាយកំពូលម្នាក់របស់រដ្ឋធានីចាកាតា បានធ្វើការស្នើសុំឲ្យពលរដ្ឋកាត់បន្ថយការធ្វើដំណើរ និងការប្រើប្រាស់ទឹកជាបណ្ដោះអាសន្នសិន មុនពេលដែលអគ្គិសនីត្រូវបានតភ្ជាប់ឡើងវិញ។ យោងតាមពលរដ្ឋវ័យ ៣០ឆ្នាំម្នាក់ត្អូញត្អែរថា "ការដាច់ភ្លើង បានបន្ដអស់ពេលជាច្រើនម៉ោង ហើយវាពិតជាក្ដៅខ្លាំងណាស់នៅអាផាតមែនរបស់ខ្ញុំដោយសារមិនមានម៉ាស៊ីនត្រជាក់។”

គួរឲ្យដឹងថា ការដាច់ចរន្ដអគ្គិសនីនេះ បានកើតឡើងកាលពីវេលាម៉ោង ៥ល្ងាច (ម៉ោងក្នុងតំបន់) កាលពីថ្ងៃអាទិត្យកន្លងទៅ ប៉ុន្តែរហូតមកដល់ម៉ោង ១១យប់ថ្ងៃដដែល ផ្ទះសម្បែង និងអគារភាគច្រើន ត្រូវបានតភ្ជាប់ឲ្យមានអគ្គិសនីប្រើប្រាស់វិញហើយ៕