មានតែក្លឹប PL ៣ប៉ុណ្ណោះ ដែលចំណេញពីទីផ្សារកីឡាករនៅរដូវក្ដៅនេះ

2019-08-12 01:31:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីផ្សារកីឡាករនៅលីគកំពូលអង់គ្លេសបានបិទបញ្ចប់ទៅហើយកាលពីថ្ងៃព្រហស្បតិ៍កន្លងទៅ ដោយក្នុងនោះលីគកំពូលទាំងមូលចំណាយទឹកប្រាក់ជាង ១.៧ប៊ីលានដុល្លារ។

ក្លឹបភាគច្រើនសុទ្ធតែខាតក្នុងទីផ្សារកីឡាករ ដោយក្នុងនោះក្លឹបចំណូលថ្មី Aston Villa ជាអ្នកខាតខ្លាំងជាងគេ ដោយចំណាយជាង ១៧៣លានដុល្លារ ហើយមិនមានចំណូលអ្វីឡើយ ពីទីផ្សារកីឡាកររដូវក្ដៅនេះ។

ខណៈក្លឹបដែលចំណេញពីទីផ្សារមានតែ ៣ទេគឺ Liverpool, Crystal Palace និងក្លឹប Chelsea។

ក្លឹប Chelsea ជាក្លឹបដែលចំណេញច្រើនជាងគេ ក្នុងទីផ្សាររដូវក្ដៅនេះ ដែលចំណេញជាង ៩៣លានដុល្លារ ដោយចំណាយជាង ៥០លានដុល្លារ ហើយចំណូលដល់ទៅជាង ១៤៣លានដុល្លារ។ ចំណូលច្រើនបំផុតលក់ខ្សែបម្រើ Eden Hazard ចេញទៅ Real Madrid ដោយបានលើសពី ១០០លានដុល្លារ។ ចំណែកឯការចំណាយតិចវិញគឺដោយសារ Chelsea ជាប់បម្រាមក្នុងការនាំចូលកីឡាករ ប៉ុន្តែគេនៅតែអាចនាំចូលខ្សែបម្រើក្រូអាតកីឡាករ Mateo Kovacic។

ក្លឹប Crystal Palace ក្លឹបនេះចំណាយត្រឹមតែជិត ១០លានដុល្លារប៉ុណ្ណោះក្នុងទីផ្សាររដូវក្ដៅនេះ ហើយទទួលបានចំណូលរហូតដល់ ៦១លានដុល្លារ។ នេះដោយសារតែក្លឹបបានលក់ខ្សែការពារស្លាបស្ដាំ Aaron Wan Bissaka ទៅកាន់ Manchester United។

ក្លឹប Liverpool ក្លឹបនេះហាក់ស្ងប់ស្ងាត់ក្នុងទីផ្សារកីឡាកររដូវក្ដៅនេះ ដោយចំណាយត្រឹមតែជាង ២លានដុល្លារប៉ុណ្ណោះលើ ខ្សែការពារហុល្លង់វ័យក្មេងកីឡាករ Sepp van den Berg ហើយលក់កីឡាករមួយចំនួនដូចជា ខ្សែប្រយុទ្ធ Danny Ings និងអ្នកចាំទី Simon Mignolet ដែលបានចំណូលសរុបជាង ៤០លានដុល្លារ៕