Apple ត្រូវក្រុមហ៊ុនអ៊ីស្រាអែលប្ដឹងម្ដងទៀតរឿងល្មើសប៉ាតង់ iPhone កាមេរ៉ាភ្លោះ

2019-08-16 04:56:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Corephotonics ដែលមានមូលដ្ឋាននៅអ៊ីស្រាអែល បានដាក់ពាក្យបណ្ដឹងប្ដឹង Apple ដោយអះអាងថា iPhone កាមេរ៉ាភ្លោះម៉ូដែលបច្ចុប្បន្ននេះ បានល្មើសនឹងប៉ាតង់មួយចំនួនរបស់ខ្លួន។

ក្រុមហ៊ុនអ៊ីស្រាអែលនេះ បានដាក់ពាក្យបណ្ដឹងច្រើនលើកមកហើយ នៅរយៈពេលប៉ុន្មានឆ្នាំនេះ ហើយចុងក្រោយនេះគឺរំពឹងថានឹងអាចបញ្ចប់រឿងបាន។ ផ្អែកតាម Corephotonics បានឲ្យដឹងថា ក្រុមហ៊ុនរបស់ខ្លួន និង Apple បានស្ថិតក្នុងការចរចាលើមុខជំនួញតាំងពីឆ្នាំ ២០១២។ Corephotonics បានពិភាក្សាជុំវិញដង្គុំកាមេរ៉ាភ្លោះ ដោយលម្អិតជាក្រុមវិស្វករ Apple។

បន្ថែមពីនេះ Apple ទទួលបានសិទ្ធក្នុងការប្រើធាតុចំនួន ៥ ក្នុងឡេន Telephoto នៅឆ្នាំ ២០១២, Board សម្រាប់តេស្ត និងឡេននៅឆ្នាំ ២០១៤ និងប្រអប់ខ្មៅដែលមានផ្ទុកឯកសារជុំវិញការឌីហ្សាញឡេនកាមេរ៉ាភ្លោះ, Software និងគំរូ System ផងដែរ។ ពាក្យបណ្ដឹងបានចោទប្រកាន់ថា ទាំងនេះជាចំណុចសំខាន់ សម្រាប់ការអភិវឌ្ឍដង្គុំកាមេរ៉ាភ្លោះលើ iPhone ដែលបានចេញកន្លងមក។

Apple បានប្រកាសចេញ iPhone 7 Plus នៅឆ្នាំ ២០១៦ ដោយមិនបានចុះកិច្ចព្រមព្រៀងជាមួយ Corephotonics មុននោះទេ។ តាមពិតទៅបុគ្គលិកជាប់ខ្ពស់នៅ Corephotonics បានសុំជួប Apple ម្ដងទៀត ដើម្បីបន្តការចរចាក្នុងភាពជាដៃគូ មុនការប្រកាស iPhone 7 Plus មួយខែ ប៉ុន្តែមិនបានជោគជ័យនោះទេ។

ក្រោយមកក្រុមហ៊ុនអ៊ីស្រាអែល បានដាក់ពាក្យបណ្ដឹងប្ដឹងលើការរំលោភសិទ្ធប៉ាតង់ជាលើកដំបូងនៅខែវិច្ឆិកា ឆ្នាំ ២០១៧ បន្ទាប់ពីគេសិក្សាលើកាមេរ៉ា iPhone 7 Plus និង iPhone 8 Plus និងអះអាងថាបច្ចេកវិទ្យា Zoom ប្រើលើស្មាតហ្វូនទាំងពីរគឺផ្អែកលើប៉ាតង់របស់ Corephotonics។

ពាក្យបណ្ដឹងទីពីរបានដាក់ប្ដឹងនៅខែមេសា ឆ្នាំ ២០១៨ សំដៅដល់ iPhone X ខណៈដែលពាក្យបណ្ដឹងចុងក្រោយនេះសំដៅដល់ iPhone XS និង XS Max ហើយអះអាងថា Apple ក៏បានដឹងពីការល្មើសប៉ាតង់នេះដែរ។

គួរឲ្យចាប់អារម្មណ៍នោះគឺមានការរាយការណ៍ថា Samsung បានទិញយកក្រុមហ៊ុន Corephotonics ក្នុងទំហំទឹកប្រាក់ ១៥០ លានដុល្លារ។ ប៉ុន្តែមិនមានភាគីមួយណា បានបញ្ជាក់ជាផ្លូវការអំពីការទិញយកនេះទេ៕

ចុចអាន ៖ Apple ដូចបានបង្ហាញពីថ្ងៃប្រកាសចេញ iPhone 11

ប្រភព៖ GSMarena ប្រែសម្រួល៖ សុខហេង