FIFA ពិចារណាប្រើមនុស្សយន្តជំនួសអាជ្ញាកណ្ដាលខ្សែបន្ទាត់

2019-08-25 10:03:00
ចំនួនមតិ 0 | ចំនួនចែករំលែក 0

ចន្លោះមិនឃើញ

FIFA កំពុងស្វែងរកលទ្ធភាពប្រើមនុស្សយន្ត (Robots) ជំនួសអាជ្ញាកណ្ដាលខ្សែបន្ទាត់។ នេះបើតាម The Mirror ទើបបានចុះផ្សាយ។

អាជ្ញាកណ្ដាលខ្សែបន្ទាត់ នឹងត្រូវជំនួសដោយរ៉ូបូត បើការសាកល្បងរបស់ FIFA ជោគជ័យ

វីដេអូជំនួយការអាជ្ញាកណ្ដាល (VAR) បានក្លាយជាបច្ចេកវិទ្យាកាត់ក្តីយ៉ាងសុក្រឹត ហើយប្រសិនបើមនុស្សយន្តនឹងត្រូវបានដាក់ឲ្យប្រើជំនួសអាជ្ញាកណ្ដាលខ្សែបន្ទាត់មែន នោះទង់ offside នឹងក្លាយទៅប្រវត្តិសាស្រ្ត ពោលគឺលែងមានទៀតហើយអាជ្ញាកណ្ដាលខ្សែបន្ទាត់ជាមនុស្ស ផ្ទុយទៅវិញ ពួកគេគឺជារ៉ូបូត។

ប្រភពខាងលើបន្តថា " FIFA មាននាយកដ្ឋានមួយដែលបានធ្វើការស្រាវជ្រាវទៅលើរឿងនេះរួចហើយ។ តើពួកគេនឹងជំនួសអាជ្ញាកណ្ដាលខ្សែបន្ទាត់ទាំងស្រុងដោយកាមេរ៉ា និង កុំព្យូទ័រ ដើម្បីធ្វើការសម្រេចចិត្តផ្តាច់មុខ និង គ្រប់គ្រង offside ឬ? វាអាចកើតឡើងនៅថ្ងៃណាមួយ"។

មនុស្សមួយចំនួននៅមិនទាន់ទទួលយកបាននូវការសម្រេចចិត្តរបស់ VAR នៅឡើយកុំថាឡើយដល់ថ្នាក់ FIFA ប្រើឲ្យរ៉ូបូតរត់លើខ្សែបន្ទាត់ជំនួសជំនួយការអាជ្ញាកណ្តាល។

នៅក្នុងកិច្ចសម្ភាសន៍ផ្ដាច់មុខរបស់ Daily Star Sunday លោក Neil Swarbrick ប្រធាន VAR របស់ក្របខ័ណ្ឌ Premier League បាននិយាយថាមូលហេតុដែលអ្នកគាំទ្រយល់ថា VAR បង្អាក់ការអបអររបស់ពួកគេគឺជាអ្វីដែលមិនអាចទទួលយកបាន មកពីពួកគេមិនទាន់ស៊ាំ។

ដូចគ្នានេះដែរសម្រាប់លោក ជីអានី អ៊ីនហ្វាន់ទីណូ (Gianni Infantino) ប្រធាន FIFA យល់ថាវាគ្មានអ្វីអាចបញ្ឈប់នូវឥទ្ធិពលបច្ចេកវិទ្យាដែលកំពុងវិវត្តន៍ឥតឈប់ឈរនៅក្នុងពិភពបាល់ទាត់បានឡើយ៕

អាន៖ VAR បង្កើតប្រវត្តិសាស្ត្រច្រំដែលរវាង Man City និង Spurs

ប្រភព៖ Mirror ប្រែសម្រួល៖ សុខ លាងហ៊ត